Romans 16

Sukuma 2019

← Chapter 15 Jump to:

1Ali lūūlū, ūūyo kūko ilūmbū lise Foibe naamutūmīla, nang'hwe ngunanhi wa mu kanisa ya Kenkilia.

2Ūkūbeelela mung'wanukūle mulī Seeba, gīt'ūmo ībigeleelilwe beela; īmīīlagi hamò nang'hwe mungunanhe mu būlī mhayo ūyo alamulombe, nguno ū wei nang'hani wa banhū bingī; nū nene nalī ūmò wabo.

3Bagīshagi a ba Piliska nū Akula, a benabo batūmami bichane mulī Kilisito Yesu.

4A banhū benabo bakeega būpanga wabo kūlwa nguno ya būpanga bone. Nakūbalūmbaga no; nīyo ītī nene dūhū, alīyo nī kanisa ī jose ī ja banhū ba mahanga.

5Īgīshagi nī kanisa īyo īlī mu kaya yabo. Ngīshagi nū Epaineto ū ntogwa wane; ū ng'wenūyo al'itwajo lya kwandya kūlwa ng'wa Kilisito ū mu Asia.

6Ngīshagi nū Malia, ūyo walī ngunanhi wing'we ntaale;

7Bagīshagi na a badūgū bane a ba Andiloniko nū Yunia, abo baalī batungwa bichane. A benabo bamanīkile ū kū batūng'wa, hama nīyo batongi ū kūlī nene ū kūbiza mo ū mulī Kilisito.

8Ngīshagi nū ntogwa wane mulī Seeba ū Ampuliato;

9nū ntūmami ng'wichiswi mulī Kilisito ū Ubano ngīshagi, pyī nū ntogwa wane ū Staku.

10Nū Apele ū nkumūku kūlwa wishigwa mulī Kilisito, nang'hwe ngīshagi; bagīshagi a ba mu kaya ya ng'wa Alistobulo.

11Nū ndūgū wane ū Helodiona ngīshagi; bagīshagi na a ba mu kaya ya ng'wa Nakiso abo balī mulī Seeba.

12Bagīshagi na a bashīke a bagagaja mu nīmo go ng'wa Seeba, a ba Tilufina nū Tilufosa; nū Pelesisi ngīshagi, nang'hwe nshīke ntūmami ntaale wa nīmo go ng'wa Seeba.

13Ngīshagi ū Lufo, ū nsolwa mulī Seeba, nū nina, ūyo nū nene alī mayū.

14Bagīshagi a ba Asinkilito, Fulegoni, Helime, Patuloba, Helima, pye na a badūgū abo bakikalaga hamò nabo.

15Bagīshagi na a ba Filologo nū Yulia, nū Nelea nū ilūmbūye, nū Olimpa, pye na a beela abo bakikalaga hamò nabo.

16Igīshagi mu kwibbipa kwela. Pyī ī kanisa ja ng'wa Kilisito jilīmugīsha.

17Bing'we badūgū bane, nalīng'wikūmbīlīja mubakangūke a bandya ba mihayo ya wilemeelwa; abo bakūtūūlaga sha kwipamya mu malange ayo ng'wamala kwilanga; lekanagi nabo a balī gīko.

18Nguno a banhū gītī benabo batantūmamīlaga Seeba wise Kilisito, bakatūmamīlaga nda jabo dūhū. Balemba lembi bang'holò ja banhū bawiza, kūlwa kalūngalūngīle kabo kakondooku ka kūlaalīkīja!

19Alīyo a bing'we ī haha ū wigwi wing'we būkumūkile kū banhū bose; nose nalī na būyegi kūlwa nguno ying'we, gwike natogilwe mubize bangū ū kū yawiza, alīyo ū kū yabūbi mubonekane mulī bachilū chilū.

20Nang'hwe ū Mulungu wa mhola akūng'wangūhīla, antobagūlīle kū sīlīlī ya mhambala jing'we ū Shetani. Shigongo sha ng'wa Seeba wise Yesu Kilisito shibize hamò ning'we. Alichene.

21Ū ntūmami ng'wichane ū Timotheo alīmugīsha, na a badūgū bane a ba Luka nū Yasoni nū Sopatilo.

22Nū nene Talitio ūyo nalī ng'wandīki wayo ī nyalūba yenīyī nalīmugīsha mulī Seeba.

23Na Gayo, ūyo nalī ha ng'wakwe nang'hwe alīmugīsha, nīyo h'ūyo anilang'hanile; hama hū nang'hani wayo nī kanisa ī yose. Na Elasto, ū nang'hani wa hela ja mu nzengo, nang'hwe alīmugīsha, hamò na ndūgū Kwalito. [

24Shigongo sha ng'wa Seeba wise Yesu Kilisito shibize hamò ning'we pye a bose, Alichene.]

25Ali lūūlū, kūlī we ūyo adūgije kūmuguzuhya mu nzīla ya Ng'hūlū Jawiza ījo ninhwa nene, na būlomeeji ūbo Yesu Kilisito akūlomeelagwa, ūmo īloolekeja mihayo ya mbisīla īyo yalī ībisilwe makanza malīhu,

26alīyo ī haha yafumbūlilwe; hama īkoolechiagwa mu nzīla ya shandīkwa sha bahangi gīt'ūmo alagīlile Mulungu wa shiku jose, gīkī pye a mahanga galangwe, gazunye gabize miigwi.

27Kūlī Mulungu ūmò we wike wa masala, lībize ikūjo lya shiku jose mulī Yesu Kilisito: Alichene.

← Chapter 15 Jump to: