2 Peter 2

Shekhawati

← Chapter 1 Jump to: Chapter 3 →

1बि टेम का बी मिनखा म झूठा परमेसर की खेबाळा हा जंय्यां क आज थारै मांयनै झूठी सीख देबाळा हीं। बे नास करबाळा अर ओलैछानै पाखंड करसी, बे बि मालिक बेई नटसी जखो बानै मोल लिओ हो, अंय्यां बे तावळाई खुदको नास कर लेसी।

2अर बोळा मिनख बाका कूगेला प चालसी अर बाका करमाऊँ सचाई का गेला की बदनामी होसी।

3अर बे लालची होबा की बजेऊँ थानै दिखावटी बाता बोलर थारूँ धन कमासी। अर बाकी सजा तो पेल्याऊँई परमेसर ते कर राखी ह। अर बाको नास बानै उडिकर्यो ह।

4क्युं क परमेसर बा दुतानै जखा पाप कर्या हा बानैई कोनी बकस्यो। अर बानै पताळ क मांयनै अँधेरा कूंड म गेर दिओ, जिऊँ क बे न्यायहाळै दिन ताँई बिकै मांयनै केद रेह्‍वै।

5परमेसर बि पुराणी दुनियानै कोनी बकस्यो, पण बो नूहनै जखो धारमिक्‍ता को परचार करतो हो बिनै अर सात मिनखानै छोडर सगळा पापी मिनखानै बाढऊँ नास कर दिओ।

6परमेसर सदोम अर अमोरा जंय्यां की नगर्यानै बाळर राख को ढेर बणा दिओ जिऊँ की पापी मिनखानै सबक मिलै क पापी मिनखा क सागै काँई होसी।

7पण लुत धरमी मिनख हो इ ताँई परमेसर बिनै बचा लिओ। बो पापी मिनखा क पाप करबा की बजेऊँ दुखी होतो हो।

8क्युं क बो धरमी मिनख बा पापी मिनखा क मांयनै रेह्ता-सेह्ता बाका बुरा कामानै देखर अर बाका बुरा कामा क बारां म सुणर, रोजकी आपका हिया म दुखी होतो हो।

9अ बाता आ दिखावै ह क परबु, परमेसरनै मानबाळा मिनखानै दुखऊँ बचाबो अर न्यायहाळै दिन ताँई पाप्यानै दुख भोगबा की दसा म राखबो जाणै ह।

10आ बात खासकर बा मिनखा प लागू होवै ह जखा काया की बुरी इंछ्या गेल चालीं हीं। अर परमेसर का अधिकारनै कोनी मानी। बे ढिट अर बादिला हीं, अर अंय्यां का मिनख ईस्बर नगरी की सक्‍तिया की बुराई करबाऊँ कोनी डरै।

11जदकी ईस्बर नगरी दुत सक्‍ति अर म्हानता म आ मिनखाऊँ बोळा बडा हीं, बे बी परबु क सामै ईस्बर नगरी की सक्‍तिया की बुराई कोनी करै अर बापै दोस कोनी लगावीं।

12पण अ मिनख निरबुदी ज्यानबरा की जंय्यां हीं, जखा को जलम पकड़्या जाबा अर नास होबा ताँई होयो ह। अ मिनख जखी बाता क बारां म जाणैई कोनी बाकै बारां म दुसरा की बुराई करीं हीं, अर जंय्यां ज्यानबर मार्या जावीं हीं बंय्यांई अ मिनख बी मार्या ज्यासी।

13अ बुराई करी ह, जणा अ बुराई को फळ भोगसी। आनै रात-दिन कुकरम करबो चोखो लागै ह। अ मिनखा क नाम प कळंक हीं। अ मिनख जद थारै सागै बार त्युंहार प खाबा-पीबा ताँई भेळा होवीं हीं जणा अ खुद क कानिऊँ खाबो-पीबो कर आपकी इंछ्यानै पूरी करीं हीं।

14बे सदाई बि कुकरमी लूगाई की तक म रेह्‍वै जिकै सागै अ कुकरम कर सकै। अर बे पाप कर्या बिना कोनी सकै। अ भोळा-भाळा मिनखानै भूळा-फुसळार आपकै सागै कर लेवीं हीं आको हियो लालची ह अ सराप की ओलाद हीं।

15अ सई गेलानै छोडर भटकगा हीं। अ मिनख बओर का छोरा बिलाम का गेला प चालीं हीं; बिलाम जिनै हराम की कमाई प्यारी ही।

16पण बिका इ बावळापुणा का काम की बजेऊँ बेजुबान गधेड़ी मिनख की उवाज म बोलर बिनै दकाली अर बि परमेसर का खेबाळानै बावळापुणा को काम करबाऊँ रोकी।

17अ धोकेबाज मिनख सूकेड़ा कुआ की जंय्यां अर आँधी म उडबाळा बादळ की जंय्यां हीं। परमेसर आ ताँई नरक म अँधेरी झघा त्यार कर राखी ह।

18क्युं क अ मिनख बा मिनखानै जखा पेल्या भटकेड़ा हा पण इबारई सई गेला प आया हीं, बाऊँ गुमान हाळी बाता कर बाकी बुरी इंछ्यानै जगावीं हीं। अर बानै गेलो भटकावै ह।

19बे मिनख बाऊँ छुटकारो देबा की तो जबान करीं हीं पण बे खुदई छुटकारो कोनी पायो। क्युं क जखो मिनख जिऊँ हार ज्यावै बो बिको दास बणज्यावै ह।

20ज अ मिनख परबु अर छुटकारो देबाळा ईसु मसी की बजेऊँ दुनिया की बुराईऊँ बचाया गया हा इकै वावजुद बी ज बे बुराई करीं हीं जणा आकी दसा पेलड़ी दसाऊँ बेसी बुरी होसी।

21आ मिनखा ताँई तो ओ चोखो होतो क अ इ धारमिक्‍ता का गेलानैई कोनी जाणता, अर जखो हुकम बानै दिओ गयो हो बिऊँ बे मुंडो फेर लेता।

22बापै आ खेबत सई बेठै ह, “गंडक्ड़ो आपकी उल्टी चाटै ह अर न्हूवायड़ी सूलडी पाछी कादा म जावै ह।”

← Chapter 1 Jump to: Chapter 3 →