bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Shekhawati
/
Shekhawati
/
Matthew 10
Matthew 10
Shekhawati
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 11 →
1
ईसु आपका बारा चेलानै आपकै कनै बुलार बानै सूगली ओपरी बलायानै काडबा की अर रोगलानै निरोगो करबा अर कमजोरीनै दूर करबा को अधिकार दिओ।
2
बा बारानै भेजेड़ा चेला खेर बुलायो जाका नाम अंय्यां ह: सऊँ पेल्या तो समोन जिनै पतरस बी खेवै ह बिको भाईड़ो अंदरिआस, जब्दि को बेटो याकूब अर बिको भाईड़ो यहून्ना,
3
फलिपूस, बरतुल्मै, थोमा, चुंगी लेबाळो मत्ती, हलफई को बेटो याकूब अर तद्दे,
4
देस भगत समोन, अर यहूदा इस्करोती ओ बोई ह जखो ईसुनै धोकाऊँ पकड़ायो हो।
5
ईसु बा बारानै ओ अधिकार दिओ अर हुकम देर भेज्यो: “गैर-यहूदि मिनखा की नगरी म मना जायो अर नइ सामरी नगरी म जायो।
6
पण इजरायल का मिनखा क कनैई जायो जखा गुमेड़ी लल्ड्या की जंय्यां ह।
7
अर बाकन जाओ अर हेलो पाड़ो क ‘ईस्बर नगरी को राज सांकड़ै आगो ह’
8
अर रोगलानै निरोगा करो, मरेड़ानै जीवाओ, कोढ्या का कोढनै धोवो अर ओपरी बलायानै भगाओ। जंय्यां थानै सितमित म मिल्यो ह थे बी सितमित म द्यो।
9
थे नइ तो सोनो-चाँदी ल्यो नइ तामा का सीक्का अर नइ बटूओ लिज्यो।
10
अर नइ गेला ताँई झोळो नइ कुर्तो, नइ चपल नइ हात म लाठी लिज्यो, क्युं क ध्यानग्यानै रोट्या को तो हक होवैई ह।
11
थे जद बी कोई नगरी नहिस गाँव म जाओ जणा पेल्या बेरो करज्यो क बठै गत को मिनख कूण ह। अर जद ताँई थे बठैऊँ नइ जाओ बाकै सागैई रेहज्यो।
12
जि घर की थळी प पग धरो जणा बि घर का मिनखानै आसिरबाद दिज्यो।
13
ज बि घर का मिनखा म एक जणो बी आसिरबाद क जोगो होसी जणा थारो आसिरबाद बिकै लागसी। नहिस तो थारो आसिरबाद ओज्यु थारै कनै आज्यासी।
14
अर ज कोई थारो मान कोनी करै अर नइ थारी बाता सुणै जणा थे बि घर अर बि नगरीऊँ बारनै आर थारी पगा की धूळ झाड़ दिज्यो। अंय्यां कर थे बानै आ चेता दिज्यो क परमेसर बानै सजा देसी क्युं क बे बिकी बात कोनी सुणी।
15
म थारूँ सची खेऊँ हूँ जद न्याय होसी, बि दिन बि नगरी की दसा सदोम अर अमोरा नगरीऊँ बी बेकार होसी।
16
“सुणो म थानै ल्याळ्या क मांयनै लल्ड्या की जंय्यां भेजर्यो हूँ। इ ताँई थे साँप जंय्यां चलाक अर कबूतर की जंय्यां भोळा रेहज्यो।
17
अर थे मिनखाऊँ हुस्यार रेहज्यो क्युं क बे थानै पकड़र पंचा क हाता सूप देसी अर बे थानै अरदास करबाळी झघा लेज्यार बेत पड़वासी।
18
थे मेरै बारां म सीख द्यो हो इ बजेऊँ थानै राजा अर अधिकार्या क सामै लेज्यायो जासी, पण थानै बि टेम यहूदि अर गैर-यहूदि मिनखा म मनै साबित करबा को मोको मिलसी।
19
जद बे थानै पकड़सी जणा थे आ चिंत्या मना करज्यो क थानै इब काँई खेणो ह क्युं क बि घड़ी पबितर आत्मा थानै बतासी काँई खेणो ह।
20
क्युं क बोलबाळा थे कोनी पण थारा परम-पिता की पबितर आत्मा थारै मऊँ होर बोलसी।
21
सागे भाई-भाण भाई-भाणानै पकड़ा'र मरवासी, माँ-बाप टाबरानै मरवासी अर टाबर माँ-बापा क सामै होर बानै मरवा गेरसी।
22
मेरा नाम की बजेऊँ लोग थारूँ नफरत करसी पण जखो मिनख आपकी अंतघड़ी ताँई सक्यु सेह्सी बोई बचायो ज्यासी।
23
बे थानै थारी एक नगरी म सतावै जणा थे दुसरी नगरी म भागजाज्यो। अर म थारूँ सची खेऊँ हूँ इजरायल देस की सगळी नगर्या म थारै घूमबाऊँ पेलीई मिनख को बेटो आज्यासी।
24
क्युं क चेलो गरूऊँ बडो कोनी होवै अर नइ दास आपका मालिकऊँ बडो होवै ह।
25
इ ताँई चेलानै गरूजी क बराबर होबा म अर दासनै मालिक क बराबर होबा मई सबर राखबो चाए। अर जद बे मिनख घर का मालिकनैई बालजबुल खेवै ह जणा बिका घर का मिनखा क सागै तो ओर बी बुरो सलुक करसी!
26
“इ ताँई थे बा मिनखाऊँ मना डरो, क्युं क जोक्यु बी लुखेड़ो ह बिनै परमेसर चोड़ामै ल्यासी अर जखो बी ओला म ह बिनै सामै ल्यासी।
27
इ ताँई म जोक्यु बी थानै अँधेरा म बोल्यो हूँ थे बिनै दिन का च्यानणा म जोरऊँ बोलो अर जखी बाता म थानै ओला म खेऊँ हूँ बाको थे कोठा प चढर हेलो पाड़ो।”
28
“थे बा मिनखाऊँ मना डरो जखा थारी कायानै नास कर सकीं हीं पण थारी आत्मानै नास कोनी कर सकीं। पण परमेसरऊँ डरो जखो थारी आत्मा अर काया दोन्यानै नरक म गेर'र नास कर सकै ह।
29
क्युं क एक डबली हाळा सीक्का की दो चिड़कल्या कोनी बिकै के? पण बामैऊँ एक बी धरती प मरै ह जणा बाकै बारां म थारा परम-पितानै बेरो होवै ह।
30
अठै ताँई क परमेसर थारै सीर का एक-एक बाळ बी गिण राख्या ह।
31
इ ताँई डरो मना क्युं क परमेसर की नजर्या म थारो मोल तो चिड़कल्याऊँ बी बोळो ह।
32
“जखो बी मिनख लोगा क सामै मनै मान लेसी जणा म बी ईस्बर नगरी म रेह्बाळा परम-पिता क सामै बानै मानस्युं।
33
पण जखो बी मिनख मनै लोगा क सामै कोनी मानसी जणा म बी ईस्बर नगरी म रेह्बाळा परम-पिता क सामै बिनै कोनी मानस्युं।
34
“थे अंय्यां मना सोचो क म धरती प मिनखा को सुळजेटो कराबा आयो हूँ पण म तो बानै लड़ाबा आया हूँ ।
35
म ओ करबा आयो हूँ क बेटो बाप क खिलाप, बेटी माँ क खिलाप अर भू सासू क खिलाप होवै।
36
मिनख का बेरी बिका घरकाई होसी।”
37
“जखो बी मिनख मेरूँ बेत्ती आपका माँ-बापानै नहिस आपका बाळबच्चानै परेम करै बो मेरै जोगो कोनी।”
38
अर जखो बी मेरै ताँई दुख दरद सेह्बा ताँई अर मरबानै त्यार कोनी बो मेरो चेलो होबा जोगो कोनी।
39
“जखो बी आपका पिराण बचावै ह बो बिकी हानी उठावै ह, अर जखो बी मेरी बजेऊँ आपका पिराण देवै ह बो बिनै पासी।
40
“जखो बी थारो मान करै ह, बो मेरो बी मान करै ह; अर जखो मेरो मान करै ह बो मनै अधिकार क सागै भेजबाळा परमेसर को बी मान करै ह।
41
जखो बी परमेसर की खेबाळा को आ जा'णर मान करै ह की बो परमेसर की खेबाळो ह बिनै बोई फळ मिलसी जखो परमेसर की खेबाळानै मिलै ह। अर जखो बी धरमी मिनख को आ सोचर मान करै ह क बो धरमी मिनख ह जणा बिनै बी बोई फळ मिलसी जखो धरमी मिनखनै मिलणो चाए।
42
अर म थानै सची खेऊँ हूँ ज कोई आ छोटा मऊँ एकनै बी मेरो चेलो जा'णर एक गिलास पाणी प्यावै, बिनै बिको फळ मिलसी।”
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28