2 John 1

Tulu (ಪೊಸ ಒಡಂಬಡಿಕೆ)

Jump to:

1ಸಭಾ ಹಿರಿಯಾಯೆ ಆದುಪ್ಪು ಯಾನ್ ದೇವೆರೆಡ್ದ್ ಅಜತ್‌ದಿನ ಅಪ್ಪಿಯಗ್ಲಾ ಆಲೆನ ಜೋಕುಲೆಗ್ಲಾ, ಈ ಪತ್ರಿಕೆನ್ ಬರೆವೊಂದುಲ್ಲೆ. ಯಾನ್ ನಿಕ್ಲೆನ್ ಸತ್ಯೊಡು ಪ್ರೀತಿ ಮಲ್ತೊಂದುಲ್ಲೆ, ಅತ್ತಂದೆ ಸತ್ಯೊನು ತೆರಿನ ಮಾತೆರ್ಲಾ ನಿಕ್ಲೆನ್ ಪ್ರೀತಿ ಮಲ್ಪುವೆರ್. ದಾಯೆಗಂದ್ಂಡ ಸತ್ಯ ನಮಡ ಉಂಡು, ಬೊಕ್ಕ ನಮ ಒಟ್ಟುಗು ಏಪೊಗ್ಲಾ ಉಪ್ಪುಂಡು.

3ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ, ಆ ಅಮ್ಮೆ ಮಗೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ದಯಲಾ, ಕರುಣೆಲಾ, ಸಮಾಧಾನಲಾ ನಮಡೊಪ್ಪ ಸತ್ಯೊಡ್ಲಾ ಪ್ರೀತಿಡ್ಲಾ ನಿಲೆ ಆದುಪ್ಪಡ್.

4ಅಮ್ಮೆರೆಡ್ದ್ ನಂಕ್ ಅಪ್ಪಣೆ ಆಯಿಲೆಕ್ಕನೇ, ಸತ್ಯೊಡು ನಡತೊನುನಾಕುಲು ನಿನ ಜೋಕುಲೆಡ್ ಎಂಕ್ ತೂವೆರೆ ತಿಕ್ಕಿನೆಡ್ದ್ ಎಂಕ್ ದಿಂಜ ಸಂತೋಷ ಆಂಡ್.

5ಪ್ರೀತಿದ ಅಪ್ಪೆ, ನಮ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಅಂದ್‌ದ್ ಕುಡ ನೆನೆಪು ಪುಟ್ಟಾವೆರೆಗಾದ್ ಯಾನ್ ಉಂದೆನ್ ಬರೆವೊಂದುಲ್ಲೆ. ಉಂದು ಒಂಜಿ ಪೊಸ ಅಪ್ಪಣೆ ಅತ್ತ್, ನಮ ದುಂಬುಡ್ದಿಂಚಿ ಕೇಂಡಿನವೇ ಆದುಂಡು.

6ನಮ ದೇವೆರೆ ಅಪ್ಪಣೆಗ್ ಸರಿಯಾದ್ ನಡಪುನವೇ ಆಯನ್ ಪ್ರೀತಿ ಮಲ್ಪುನವು ಆದುಂಡು. ಬೊಕ್ಕ ಒರಿಯನ್ ಒರಿ ಪ್ರೀತಿ ಮಲ್ಪೊಡಂದ್‌ದೇ ನಿಕುಲು ದುಂಬುಡ್ದಿಂಚಿ ಕೇಂಡಿನ ಅಪ್ಪಣೆ ಆದುಂಡು.

7ಯೇಸು ಕ್ರಿಸ್ತೆ ಶರೀರೊಡು ಬೈದೆ ಇನ್ಪಿನೆನ್ ಅರಿಕೆ ಮಲ್ಪಂದಿ ಮಸ್ತ್ ಮಂದಿ ಮೋಸಗಾರೆರ್ ಲೋಕೊಗು ಪಿದಾಡಿಯೆರ್. ಅಕುಲು ಮೋಸಗಾರೆರ್‌ಲಾ, ಕ್ರಿಸ್ತ ವಿರೋಧಿಲುಲಾ ಆದುಲ್ಲೆರ್.

8ಎಂಕುಲು ಕಷ್ಟ ಮಲ್ತಿನವು ನಷ್ಟ ಆದ್ ಪೋವಂದಿಲೆಕ್ಕ ನಿಕುಲು ಜಾಗ್ರತೆಡುಪ್ಪುಲೆ. ನಿಕುಲು ಪೂರ್ತಿ ಉಡಿಗೆರೆ ತಿಕ್ಕುಲೆಕ್ಕ ಬುಡಂದೆ ಬೆನ್ಲೆ.

9ಏರಾಂಡಲಾ ಕ್ರಿಸ್ತನ ಬೋಧನೆಗ್ ಸರಿಯಾದ್ ನಡಪಂದೆ ದೂರ ಪೋಯೆಡ ಆಯಡ ದೇವೆರ್ ಉಪ್ಪುಜೆ. ಆಂಡ ಕ್ರಿಸ್ತನ ಬೋಧನೆಗ್ ಸರಿಯಾದ್ ನಡಪುನಾಯಡ ಅಮ್ಮೆಲಾ ಉಲ್ಲೆ ಮಗೆಲಾ ಉಲ್ಲೆ.

10ಈ ಬೋಧನೆಗ್ ಸರಿಯಾದ್ ನಡಪಂದಿನಾಯೆ ಏರ್ಲಾ ಒರಿ ನಿಕ್ಲೆ ಕೈತಲ್‌ಗ್ ಬರ್ಪೆಡ, ಆಯನ್ ನಿಕ್ಲೆ ಇಲ್ಲಗ್ ಸೇರಾವೊನೊಡ್ಚಿ.

11ಅಂಚಿತ್ತಿನಾಯಗ್ ಎಡ್ಡೆ ಆವಡ್ ಪಂಡ್ದ್ ಪನ್ಪಿನಾಯೆ ಆಯನ ಹಾಳ್ ಕೆಲಸೊಡು ಪಾಲ್‌ದಾರೆ ಆದುಪ್ಪುವೆ.

12ನಿಕ್ಕ್ ಬರೆವೆರೆ ಎಂಕ್ ಮಸ್ತ್ ಸಂಗತಿಲು ಇತ್ತ್ಂಡಲಾ, ಅವೆನ್ ಶಾಯಿಡ್ಲಾ ಪತ್ರಿಕೆಡ್ಲಾ ಬರೆವೆರೆ ಎಂಕ್ ಮನಸ್ ಇಜ್ಜಿ. ಆಂಡ ಯಾನ್ ನಿಕ್ಲೆ ಕೈತಲ್‌ ಬರ್ಪಿನ ಭರವಸ ಎಂಕುಂಡು. ನಿಕ್ಲೆಡೊಪ್ಪ ಎದುರೆದುರಾದ್ ಕುಲ್ಲುದು ಪಾತೆರ್‌ವೆ. ಅಪಗ ನಮ ಸಂತೋಷ ಪೂರ್ತಿ ಆವು.

13ದೇವೆರೆಡ್ದ್ ಅಜತ್‌ದಿನ ನಿನ ಸಹೋದ್ರಿನ ಜೋಕುಲುಲಾ ನಿಕ್ಕ್ ವಂದನೆ ಪನ್ಪೆರ್.

Jump to: