2 Thessalonians 3

Tulu (ಪೊಸ ಒಡಂಬಡಿಕೆ)

← Chapter 2 Jump to:

1ಕಡೆತ ಪಾತೆರ ದಾನೆಂದ್ಂಡ ಸಹೋದ್ರೆರೇ, ನಿಕುಲು ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪುಲೆ. ಕರ್ತವ ಪಾತೆರೊಲು ಎಂಚ ನಿಕ್ಲೆಗ್ ಮುಟ್ಟುದು ನಿಕ್ಲೆಡ್ ಎಂಚ ಪ್ರಖ್ಯಾತ ಆದ್ ಪರಡೊಂದು ಉಂಡಾ ಅಂಚೆನೇ ಆ ಪಾತೆರೊಲು ಅಲ್ಪಲ್ಪ ಬೇಗನೆ ಪರಡಡ್.

2ದೇವೆರ್ ಎಂಕ್ಲೆನ್ ದುಷ್ಟೆರಾದುಪ್ಪು ಹಾಳ್ ಜನೊಕುಲೆಡ್ದ್ ತಪ್ಪಾವೊಡಂದ್‌ದ್ ಪ್ರಾರ್ಥನೆ ಮಲ್ತೊಂದುಪ್ಪುಲೆ, ದಾಯೆಗಂದ್ಂಡ ಮಾತೆರೆಡ್ ಕ್ರಿಸ್ತ ನಂಬಿಕೆ ಉಪ್ಪುಜತ್ತಾ.

3ಆಂಡ ಕರ್ತವೆ ನಂಬಿಗಸ್ತೆ, ಆಯೆ ನಿಕ್ಲೆನ್ ಗಟ್ಟಿ ಮಲ್ತ್‌ದ್ ಪಡಿಕೆಂತಿನಾಯಡ್ದ್ ತಪ್ಪಾದ್ ಕಾಪುವೆ.

4ಎಂಕುಲು ನಿಕ್ಲೆಗ್ ಕೊರ್ತಿನ ಅಪ್ಪಣೆದಂಚೆನೇ, ನಿಕುಲು ನಡತೊಂದುಲ್ಲರ್. ಅಂಚೆನೇ ನನಲಾ ದುಂಬಗ್ ನಡಪುವರ್ ಅಂದ್‌ದ್ ಕರ್ತವಡ್ ಎಂಕ್ಲೆಗ್ ಭರವಸ ಉಂಡು.

5ಕರ್ತವೆ ನಿಕ್ಲೆ ಉಡಲ್‌ನ್ ದೇವೆರೆ ಪ್ರೀತಿಡ್ಲಾ ಕ್ರಿಸ್ತನ ತಾಳ್ಮೆಡ್ಲಾ ಉಪ್ಪುಲೆಕ್ಕ ನಡಪಾವಡ್.

6ಆಂಡ ಸಹೋದ್ರೆರೇ, ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಪುದರ್‌ಡ್ ಎಂಕುಲು ನಿಕ್ಲೆಗ್ ಅಪ್ಪಣೆ ಕೊರ್ಪ ದಾನೆ ಪಂಡ ಎಂಕ್ಲೆಡ್ದ್ ತಿಕ್ಕಿನ ಬೋಧನೆನ್ ಬುಡ್ದು ಸೋಮಾರಿತನೊಟು ಉಪ್ಪುನ ಸಹೋದ್ರೆರೆಡ್ದ್ ದೂರಾದುಪ್ಪುಲೆ.

7ಎಂಕ್ಲೆನ್ ತೂದು ಎಂಚ ನಡಪುಡೊಡು ಅಂದ್‌ದ್ ನಿಕ್ಲೆಗೇ ಗೊತ್ತುಂಡು. ಎಂಕುಲು ನಿಕ್ಲೆ ಒಟ್ಟುಗು ಉಪ್ಪುನಗ ಸೋಮಾರಿತನೊಟು ಏಪಲಾ ಇತ್ತ್‌ಜ.

8ಕಾಸ್ ಕೊರಂದೆ ಏರೆನಲಾ ರೊಟ್ಟಿ ಪೊಕ್ಕಡೆಗ್ ತಿಂತ್‌ಜ. ಎಂಕುಲು ರಾತ್ರೆ ಪಗೆಲ್ ಕಷ್ಟೊಡು ಬೆಂದ್‌ದ್ ನಿಕ್ಲೆಗ್ ಏರೆಗ್ಲಾ ದುನ್ನ ಆವಂದಿಲೆಕ್ಕ ಜೀವನ ಮಲ್ತೊಂದಿತ್ತ.

9ಎಂಕ್ಲೆಗ್ ನಿಕ್ಲೆಡ್ದ್ ನಿಜಾದ್ ವಣಸ್ ದೆತ್ತೊನುನ ಹಕ್ಕ್ ಇತ್ತ್ಂಡ್, ಆಂಡ ಎಂಕುಲು ಇಂಚ ಮಲ್ತಿನಿ ದಾಯೆಗ್ ಪಂಡ ನಿಕ್ಲೆಗ್ ಒಂಜಿ ಮಾದ್ರಿ ಆದ್ ನಿಕುಲು ಎಂಕುಲೆ ಲೆಕ್ಕನೆ ಉಪ್ಪೊಡು ಪಂಡ್ದ್.

10ಎಂಕುಲು ನಿಕ್ಲೆ ಒಟ್ಟುಗು ಉಪ್ಪುನಗ, ಬೇಲೆ ಮಲ್ಪಂದಿನಾಯೆ ವಣಸ್‌ಲಾ ಮಲ್ಪೆರೆ ಬಲ್ಲಿ ಪಂಡ್ದ್‌ಲಾ ಅಪ್ಪಣೆ ಕೊರ್ತ.

11ಆಂಡ ನಿಕ್ಲೆಡ್ ಕೆಲೆವೆರ್ ಸೋಮಾರಿತನೊಟು ಇತ್ತ್‌ದ್ ಬೇತೆಕ್ಲೆನ ಕೆಲಸೊಗು ತರೆ ಪಾಡ್ದ್, ದಿನ ದೆಪ್ಪುನಾಕುಲಾದ್ ಉಲ್ಲರಂದ್‌ದ್ ಎಂಕುಲು ಇಂಚಲಾ ವರ್ತಮಾನ ಕೇನೊಂದುಲ್ಲ.

12ಇಂಚಿತ್ತಿನಾಕುಲೆಗ್ ಎಂಕುಲು ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ ಅಪ್ಪಣೆ ಕೊರ್ದು ಎಚ್ಚರಿಕೆ ಕೊರೊಂದುಲ್ಲ ದಾನೆ ಪಂಡ, ಶಾಂತೊಡು ಸ್ವಂತ ಕೆಲಸೊನು ಮಲ್ತ್‌ದ್, ತನ್ಕುಲು ಸಂಪಾದನೆ ಮಲ್ತಿನೆಟ್ಟೇ ದಿನ ದೆಪ್ಪೊಡು.

13ಸಹೋದ್ರೆರೇ, ನಿಕುಲು ಎಡ್ಡೆ ಮಲ್ಪುನೆಕ್ಕ್ ಬೇಜಾರ್ ಮಲ್ಪೊಡ್ಚಿ.

14ಆಂಡ ಎಂಕುಲು ಪತ್ರಿಕೆಡ್ ಬರೆತಿ ಪಾತೆರದ ಲೆಕ್ಕ ಒರಿ ನಡತಿಜೆಡ, ಆಯನ್ ಗುರ್ತ ದೀದ್, ಆಯಗ್ ನಾಚಿಗೆ ಆಪಿಲೆಕ್ಕ ಆಯನ ಸುದ್ಧಿಗ್ ಪೋವೊಡ್ಚಿ.

15ಆಂಡಲಾ ಆಯನ್ ಪಗೆನಾಯೆ ಅಂದ್‌ದ್ ಎನ್ನಂದೆ, ಸಹೋದರೆ ಅಂದ್‌ದ್ ಎನ್ನ್‌ದ್ ಬುದ್ಧಿ ಪನ್ಲೆ.

16ಸಮಾಧಾನದ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ತಾನೇ ನಿಕ್ಲೆಗ್ ಏಪಲಾ, ಪ್ರತಿಯೊಂಜಿ ವಿಷಯೊಡ್ಲಾ, ಸಮಾಧಾನ ಕೊರಡ್. ಕರ್ತವೆ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.

17ಪೌಲು, ಯಾನ್ ಎನ ಸ್ವಂತ ಕೈಟ್ ನಿಕ್ಲೆಗ್ ವಂದನೆ ಬರೆಪಿನಿ. ಎನ ಮಾತ ಪತ್ರಿಕೆಡ್ಲಾ ಉಂದೇ ಗುರ್ತ ಇಂಚೆನೆ ಬರೆಪೆ.

18ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.

← Chapter 2 Jump to: