Colossians 3

Tulu (ಪೊಸ ಒಡಂಬಡಿಕೆ)

← Chapter 2 Jump to: Chapter 4 →

1ನಿಕುಲು ಕ್ರಿಸ್ತಡ್ ಲಕ್ಕಾದಿನಾಕುಲಾದ್ ಉಪ್ಪುನೆಡ್ದ್, ನಿಕುಲು ಮಿತ್ತ್‌ದ ಸಂಗತಿಲೆಡ್ ಮನಸ್ ದೀಲೆ. ಅವುಲು ಕ್ರಿಸ್ತೆ ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಲ್ಲೆ.

2ಪರಲೋಕದ ಸಂಗತಿಲೆಡ್ ಮನಸ್ ದೀಲೆ. ಲೋಕದ ಸಂಗತಿಲೆಡ್ ಅತ್ತ್.

3ದಾಯೆಗಂದ್ಂಡ ನಿಕುಲು ಸೈತ್‌ದರ್. ಬೊಕ್ಕ ನಿಕ್ಲೆನ ಪೊಸ ಜೀವನ ಕ್ರಿಸ್ತಡೊಪ್ಪ ದೇವೆರೆಡ್ ಮದೆ ಆದುಂಡು.

4ನಂಕ್ ಜೀವಾದುಪ್ಪು ಕ್ರಿಸ್ತೆ ತೋಜಿದ್ ಬನ್ನಗ ನಿಕುಲುಲಾ ಆಯ ಒಟ್ಟುಗು ಆಯನ ಮೈಮೆಡ್ ದಿಂಜಿದಿನಾಕುಲಾದ್ ತೋಜಿದ್ ಬರ್ಪರ್.

5ಅಂಚಾಯಿನೆಡ್ದ್ ನಿಕ್ಲೆ ಉಡಲ್‌ಡುಪ್ಪು ಲೌಕೀಕ ಆಸೆಲೆನ್ ಕೆರ್ದ್ ಪಾಡ್ಲೆ. ಹಾದ್ರೊನು, ಬಂಡ್‌ತನೊನು, ಕಾಮೊನು, ಹಾಳ್ ಆಸೆನ್ ಬೊಕ್ಕ ಮೂರ್ತಿಪೂಜೆಗ್ ಸಮಾನಾದುಪ್ಪು ಕಾಸ್‌ದ ಆಸೆನ್ ಮಾತೆನ್ಲಾ ದೆತ್ತ್‌ದ್ ಪಾಡ್ಲೆ.

6ಉಂದೆಡ್ದಾದ್ ದೇವೆರೆ ಕೋಪ ನಂಬಂದಿನಾಕುಲೆ ಮಿತ್ತ್ ಬರ್ಪುಂಡು.

7ಸುರುಟ್ಟು ನಿಕುಲುಲಾ ಈ ಹಾಳ್ ಸ್ವಭಾವೊಡು ಬದುಕೊಂದುಪ್ಪುನಗ ಅಂಚಿನ ಕೆಲಸೊಲೆನ್ ಮಲ್ತೊಂದಿತ್ತರ್.

8ಆಂಡ ಇತ್ತೆ ಉಗ್ರ, ಕೋಪ, ದುಷ್ಟತನ, ದೂಷಣೆ, ನಿಕ್ಲೆ ಬಾಯಿಡ್ದ್ ಬರ್ಪಿ ಹಾಳ್ ಪಾತೆರ ಉಂದು ಮಾತೆನ್ ಬುಡ್ದು ಬುಡ್ಲೆ.

9ಒರಿ ಒರಿಯಗ್ ಸುಳ್ಳು ಪನಡೆ, ದಾಯೆಗಂದ್ಂಡ ನಿಕುಲು ನಿಕ್ಲೆಡುಪ್ಪು ಹಾಳ್ ಸ್ವಭಾವೊಲೆನ್ ದೆತ್ತ್‌ದ್ ಪಾಡ್ದ್ ಪೊಸ ಸ್ವಭಾವೊನು ಪಾಡೊಂದರತ್ತಾ?

10ಈ ಸ್ವಭಾವ ದೇವೆರೆಗ್ ಸರಿಯಾದ್ ಉಂಡು. ಆಯನ ಗೇನೊಡ್ದು ಬಲತೊಂದು ಬರ್ಪಿ ಪೊಸ ನರಮಾನಿನ ರೂಪೊನು ಪಾಡೊನ್ಲೆ.

11ಉಂದೆನ್ ಪಾಡುನೆಡ್ದ್ ಗ್ರೀಕೆರ್, ಯೆಹೂದ್ಯೆರ್ ಇನ್ಪಿ ಭೇದ ಇಜ್ಜಿ; ಸುನ್ನತಿದಾಯೆ, ಸುನ್ನತಿ ಆವಂದಿನಾಯೆ ಇನ್ಪಿ ಭೇದಲಾ ಇಜ್ಜಿ; ನಾಗರಿಕ ಅನಾಗರಿಕ ಇನ್ಪಿ ಭೇದಲಾ ಇಜ್ಜಿ; ಗುಲಾಮೆ, ಸ್ವತಂತ್ರದಾಯೆ ಇನ್ಪಿ ಭೇದಲಾ ಇಜ್ಜಿ. ಆಂಡ ಕ್ರಿಸ್ತೆ ಮಾತೆರೆಡ್ಲಾ ಮಾತಲಾ ಆದುಲ್ಲೆ.

12ಅಂಚಾಯಿನೆಡ್ದ್ ನಿಕುಲು ದೇವೆರೆಡ್ದ್ ಅಜತ್‌ದ್ ದೆತ್ತೊಂಡಿನಾಕುಲಾದ್ ಪರಿಶುದ್ಧೆರ್ಲಾ ಪ್ರೀತಿದಾಕುಲುಲಾ ಆದುಪ್ಪುನೆಡ್ದಾವರ ಕನಿಕರ, ದಯ, ತಗ್ಗ್‌ದಿ ಮನಸ್, ಸಜ್ಜನಿಗೆ, ತಾಳ್ಮೆ ಇನ್ಪಿ ಸದ್ಗುಣಲೆನ್ ಪಾಡೊನ್ಲೆ.

13ಬೊಕ್ಕೊರಿಯನ ಮಿತ್ತ್ ತಪ್ಪು ಪಾಡಿಯೆರೆ ಕಾರಣ ಇತ್ತ್ಂಡಲಾ ತಪ್ಪು ಪಾಡಂದೆ ಒರಿಯನ್ ಒರಿ ಸೈಸೊಂದು ಮಾಪು ಮಲ್ಪುಲೆ. ಕರ್ತವೆ ನಿಕ್ಲೆನ್ ಮಾಪು ಮಲ್ತಿ ಲೆಕ್ಕನೇ ನಿಕುಲುಲಾ ಮಾಪು ಮಲ್ಪುಲೆ.

14ಉಂದು ಮಾತೆತ್ತ ಮಿತ್ತ್ ಪ್ರೀತಿನ್ ಪೊದೆತೊನ್ಲೆ; ಅವು ಮಾತೆನ್ಲಾ ಪೂರ್ತಿ ಮಲ್ಪುನ ಕಟ್ಟ್ ಆದುಂಡು.

15ಬೊಕ್ಕ ಕ್ರಿಸ್ತಡ್ದ್ ಬರ್ಪಿನ ಸಮಾಧಾನ ನಿಕ್ಲೆ ಉಡಲ್‌ನ್ ಆಳಡ್. ನಿಕುಲು ಒಂಜೇ ಶರೀರೊಗು ಸೇರ್ದಿನಾಕುಲಾದುಪ್ಪುನೆಡ್ದ್ ಸಮಾಧಾನೊಡು ಬದುಕುನೆಕ್ಕಾದ್ ಲೆಪ್ಪು ಇತ್ತಿನಾಕುಲಾದುಲ್ಲರ್. ಉಂದತ್ತಂದೆ ಉಪಕಾರ ಎನ್ನುನಾಕುಲಾದುಪ್ಪುಲೆ.

16ಕ್ರಿಸ್ತನ ಪಾತೆರ ನಿಕ್ಲೆಡ್ ದಿಂಜಿದ್ ಉಪ್ಪಡ್. ಆಯೆ ಕೊರ್ಪಿನ ಮಾತ ಗೇನೊಡ್ದಾದ್ ಒರಿಯಡೊರಿ ಬೋಧನೆ ಮಲ್ಪುಲೆ, ಬುದ್ಧಿ ಪನೊಂದುಪ್ಪುಲೆ. ಕೀರ್ತನೆ, ರಾಗ, ಆತ್ಮಭಾವದ ಪದ ಮಲ್ತೊಂದು ಉಪಕಾರ ದಿಂಜಿದಿ ಉಡಲ್‌ಡ್ದ್ ದೇವೆರೆಗ್ ರಾಗ ಮಲ್ಪುಲೆ.

17ಬೊಕ್ಕ ನಿಕುಲು ಬಾಯಿದ ಪಾತೆರೊಡಾವಡ್ ನಡಾವಳಿಕೆಡಾವಡ್ ಎಂಚಿನ ಮಲ್ತರ್ಡಲಾ ಮಾತೆನ್ಲಾ ಕರ್ತವೆ ಆದುಪ್ಪು ಯೇಸುನ ಪುದರ್‌ಡೇ ಮಲ್ಪುಲೆ. ಆಯಡ್ದ್ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಸಂದಾಲೆ.

18ಬೊಡೆದಿಯಾಡ್ಲೇ, ನಿಕ್ಲೆ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ. ಉಂದು ಕರ್ತವಗ್ ಸೇರ್ದಿನಾಕುಲೆಗ್ ಯೋಗ್ಯಾದುಂಡು.

19ಕಂಡನಿಯಾಡ್ಲೇ, ನಿಕ್ಲೆ ಬೊಡೆದಿಯಾಡ್ಲೆನ್ ಪ್ರೀತಿ ಮಲ್ಪುಲೆ; ಅಕ್ಲೆಗ್ ಕೈಪೆ ಆದುಪ್ಪಡೆ.

20ಜೋಕುಲೇ, ಮಾತ ವಿಚಾರೊಡು ನಿಕ್ಲೆನ ಅಪ್ಪೆಅಮ್ಮಾಡ್ಲೆಗ್ ಒಳಗಾದುಪ್ಪುಲೆ. ಉಂದು ಕರ್ತವಗ್ ಮೆಚ್ಚಿಗೆದವು ಆದುಂಡು.

21ಅಪ್ಪೆಅಮ್ಮಾಡ್ಲೇ, ನಿಕ್ಲೆ ಜೋಕುಲೆನ್ ಕೋಪ ಲಕ್ಕಾವಡೆ; ಇಜ್ಜಾಂಡ ಅಕುಲು ಕುಗ್ಗುದು ಪೋವೆರ್.

22ದಾಸೆರೇ, ನಿಕುಲು ಲೋಕದ ಯಜಮಾನೆರೆಗ್ ಮಾತೆಟ್ಟ್ ತಗ್ಗ್‌ದ್ ನಡಪುಲೆ. ನರಮಾನಿಲೆನ್ ಮೆಚ್ಚಾವುನಾಕುಲು ಮಲ್ಪುಲೆಕ್ಕ ನಿಕ್ಲೆ ಯಜಮಾನ್ಯೆರ್ ತೂವೊಂದುಪ್ಪುನಗ ಮಾತ್ರ ಚಾಕ್ರಿ ಮಲ್ಪಂದೆ ಕರ್ತವಗ್ ಪೋಡಿಯುನಾಕುಲಾದ್ ಸಜ್ಜನಿಗೆದ ಉಡಲ್‌ಡ್ದ್ ಚಾಕ್ರಿ ಮಲ್ಪುಲೆ.

23ನಿಕುಲು ವಾ ಬೇಲೆ ಮಲ್ತ್ಂಡಲಾ ಅವೆನ್ ನರಮಾನಿಲೆಗಾದ್ ಅತ್ತ್, ಕರ್ತವಗಾದೇ ಮಲ್ತೊಂದುಲ್ಲ ಅಂದ್‌ದ್ ಮನಸ್ ದೀದ್ ಮಲ್ಪುಲೆ.

24ಕರ್ತವೆ ನಿಕ್ಲೆಗ್ ಬಾಧ್ಯಸ್ತಿಗೆನ್ ಉಡಿಗೆರೆ ಆದ್ ಕೊರ್ಪೆ ಇನ್ಪಿನೆನ್ ಎನ್ನೊನ್ಲೆ. ನಿಕುಲು ಕರ್ತವೆ ಆದುಪ್ಪು ಕ್ರಿಸ್ತಗೇ ಚಾಕ್ರಿದಾಕುಲಾದುಲ್ಲರ್.

25ಆಂಡ ನಿಕುಲು ಅನ್ಯಾಯ ಮಲ್ತರ್ಡ, ಆ ಅನ್ಯಾಯೊಗು ತಕ್ಕ ಪ್ರತಿಫಲ ತಿಕ್ಕು. ದೇವೆರೆಡ ಪಕ್ಷಪಾತ ಇಜ್ಜಿ.

← Chapter 2 Jump to: Chapter 4 →