Jude 1

Tulu (ಪೊಸ ಒಡಂಬಡಿಕೆ)

Jump to:

1ಅಮ್ಮೆ ಆದುಪ್ಪು ದೇವೆರ್ ಏರೆನ್ ಪ್ರೀತಿಡ್ ಲೆತ್ತ್‌ದ್ ಯೇಸು ಕ್ರಿಸ್ತಡ್ ಕಾತೊಂದುಲ್ಲೆರಾ ಅಕ್ಲೆಗ್ ಯೇಸು ಕ್ರಿಸ್ತನ ದಾಸೆಲಾ ಯಾಕೋಬುನ ಸಹೋದ್ರೆಲಾ ಆದುಪ್ಪು ಯೂದೆ ಬರೆಪಿನಿ ದಾನೆಂದ್ಂಡ, ದೇವೆರೆ ಕರುಣೆಲಾ, ಸಮಾಧಾನಲಾ, ಪ್ರೀತಿಲಾ ನಿಕ್ಲೆಗ್ ಹೆಚ್ಚೆಚ್ಚಾದ್ ತಿಕ್ಕಡ್.

3ಪ್ರೀತಿದಾಕುಲೇ, ನಂಕ್ ಒಟ್ಟುಗುಪ್ಪು ರಕ್ಷಣೆದ ಅನುಭವೊನು ಬರೆವೊಡು ಅಂದ್‌ದ್ ದಿಂಜ ಪ್ರಯಾಸ ಮಲ್ಪುನಗ ದೇವಜನೊಕುಲೆಗ್ ಒಂಜೇ ಸರ್ತಿ, ಒಚ್ಚಿದ್ ಕೊರ್ದು ನಂಬಿಕೆಗ್ ಬೋಡಾದ್ ಉರ್ಡಾಟ ಮಲ್ಪೊಡು ಅಂದ್‌ದ್ ಉಮೇದ್ ಕೊರ್ದು, ನಿಕ್ಲೆಗ್ ಬರೆಪಿನವು ಅಗತ್ಯ ಅಂದ್‌ದ್ ಎಂಕ್ ತೋಜ್ಂಡ್.

4ದಾಯೆಗಂದ್ಂಡ, ಭಕ್ತಿದಾಂತಿನಾಕುಲು, ದೇವೆರೆ ದಯೊನು ಲಾಭ ಮಲ್ತೊಂದು ನಾಚಿಗೆ ಪುಟ್ಟಾವು ಕೆಲಸೊಲೆನ್ ಮಲ್ತೊನುವೆರ್. ಇಂಚಿತ್ತಿನಾಕುಲು ನಮ ಒರಿಯೇ ಯಜಮಾನೆಲಾ ನಮ ಕರ್ತವೆಲಾ ಆದುಪ್ಪು ಯೇಸು ಕ್ರಿಸ್ತನ್ ಆರೆಂಜುವೆರ್. ಇಂಚಿತ್ತಿ ಕೆಲವು ಜನೊಕುಲು ಸಭೆಕ್ ಕಲ್ವತನೊಟು ಪೊಗ್ಗುದೆರ್. ಅಕ್ಲೆಗ್ ದೇವೆರೆ ದಂಡನೆ ಆಪುಂಡು ಅಂದ್‌ದ್ ಆದಿಡೇ ಅಕ್ಲೆನ ಸಂಗತಿಡ್ ಬರೆತ್ಂಡ್.

5ಉಂದು ಮಾತ ನಿಕ್ಲೆಗ್ ದುಂಬು ಗೊತ್ತು ಇತ್ತ್ಂಡಲಾ ನಿಕ್ಲೆಗ್ ನೆನೆಪು ಪುಟ್ಟಾವೆರೆ ಎಂಕ್ ಮನಸಾಂಡ್. ಕರ್ತವೆ ತನ ಜನೊಕುಲೆನ್ ಐಗುಪ್ತ ದೇಶೊಡ್ದು ಒರಿಪಾಂಡಲಾ ಅಕ್ಲೆಡ್ ನಂಬಂದಿನಾಕುಲೆನ್ ಬೊಕ್ಕ ನಾಶ ಮಲ್ತೆ.

6ಬೊಕ್ಕ ತನ್ಕುಲೆಗ್ ಪರಲೋಕೊಡು ತಿಕ್ಕಿನ ಅಧಿಕಾರೊನು ಕಾತೊನಂದೆ, ಅಕ್ಲೆನ ಸ್ವಂತ ಜಾಗ್‌ನ್ ಬುಡ್ದು ಬೈದಿನ ದೂತೆರೆನ್ಲಾ ಆ ಮಲ್ಲ ದಿನತ ನ್ಯಾಯತೀರ್ಪುಗು ನಿತ್ಯೊಡು ಉಪ್ಪುನ ಸಂಕಲೆಡ್ ಕಟ್ಟ್‌ದ್ ಕತ್ತಲೆಡ್ ಪಾಡಿಯೆ.

7ಅಂಚೆನೇ, ಸೋದೋಮು ಗೊಮೋರ ಐತ ಸುತ್ತುಮುತ್ತು ಇತ್ತಿ ಪಟ್ಟಣದಾಕುಲುಲಾ ಆ ದೂತೆರ್‌ಲೆಕ್ಕನೇ ನಡತೊಂಡೆರ್. ಅವ್ವತ್ತಂದೆ ಹಾದ್ರ ಮಲ್ಪುನಾಕುಲಾದ್, ಪೇಸಿಗೆದ ಕೆಲಸೊಲೆನ್ ಮಲ್ತೊಂದಿತ್ತೆರ್. ಉಂದೆಡ್ದಾದ್ ಅಕುಲು ನಿತ್ಯ ತೂತ ಶಿಕ್ಷೆನ್ ಅನುಭವ ಮಲ್ತೊಂದು, ಇತ್ತೆ ಪಾಪೊಡಿತ್ತಿನಾಕುಲೆಗ್ ಒಂಜಿ ಮಾದ್ರಿ ಆದುಲ್ಲೆರ್.

8ಉಂದೇ ರೀತಿಡ್, ಈ ಜನೊಕುಲು ಕನೊಟುಪ್ಪುನಾಕುಲಾದ್ ತನ್ಕುಲೆ ಶರೀರೊನು ಪೇಸಿಗೆ ಕೆಲಸೊಗು ಒಪ್ಪಿಸಾವೆರ್. ದೇವೆರೆ ಅಧಿಕಾರೊನು ಅಸಡ್ಡೆ ಮಲ್ಪುವೆರ್, ಬೊಕ್ಕ ಮೈಮೆದ ದೂತೆರೆನ್ ದೂಷಿಪುವೆರ್.

9ಆಂಡ ಮುಖ್ಯ ದೂತೆ ಆದಿತ್ತಿನ ಮಿಕಾಯೇಲ್ ಇಂಚ ಮಲ್ತ್‌ದಿತ್ತಿಜೆ. ಮೋಶೆನ ಶರೀರದ ಸಂಗತಿಡ್ ಸೈತಾನಡ ತರ್ಕ ಮಲ್ಪುನಗ, ಸೈತಾನನ್ ದೂಷಿದ್, ನ್ಯಾಯತೀರ್ಪು ಮಲ್ಪೆರೆ ಧೈರ್ಯದಾಂತೆ, “ಕರ್ತವೆ ನಿನನ್ ಕಂಡಿಸಾವಡ್” ಅಂದ್‌ದ್ ಪಂಡೆ.

10ಆಂಡ ಈ ಜನೊಕುಲು ತನ್ಕುಲೆಗ್ ಗೊತ್ತುದಾಂತಿನೆನ್ ದೂಷಿಯುವೆರ್, ಬುದ್ಧಿದಾಂತಿ ಪ್ರಾಣಿಲೆ ಲೆಕ್ಕ ಪುಟ್ಟು ಸ್ವಭಾವೊಡ್ದು ತನ್ಕುಲೆನ್ ಹಾಳ್ ಮಲ್ತೊನುವೆರ್.

11ಮೊಕುಲು ಮೆಗ್ಯನ್ ಕೆರ್ತಿ ಕಾಯಿನನ ಮಾರ್ಗೊಡು ನಡಪುವೆರ್, ದ್ರವ್ಯ ಸಂಪಾದನೆಗಾದ್ ಬಿಳಾಮನ ತಪ್ಪು ಮಾರ್ಗೊನು ಪತ್ತೊಂದೆರ್, ಕೋರಹ ಲೆಕ್ಕನೇ ದಂಗೆ ಮಲ್ತ್‌ದ್ ನಾಶಾದ್ ಪೋಪೆರ್. ಅಯ್ಯೋ ಮೊಕ್ಲೆನ ಗತಿ ದಾನೆ ಆವು?

12ನಿಕ್ಲೆ ಲೇಸ್‌ಡ್ ಪ್ರೀತಿಡ್ ಮೊಕುಲು ಸೇರೊಂದು, ನಾಚಿಗೆದಾಂತೆ ತಿನ್ಪೆರ್ ಪರ್ಪೆರ್. ಸ್ವಂತ ಬಂಜಿನೇ ತೂವೊಂದುಪ್ಪುನ ಕುರುಬೆರೆ ಲೆಕ್ಕ ಉಲ್ಲೆರ್, ಮೊಕುಲು ಗಾಳಿ ಲಕ್ಕಾದ್ ಕೊನೊಪೋಪಿ ನೀರ್‌ದಾಂತಿ ಮುಗಲ್‌ದ ಲೆಕ್ಕ ಉಲ್ಲೆರ್, ಫಲದಾಂತಿನ, ಬಾಡ್ದಿನ, ಬೇರ್‌ಡ್ದ್ ಒಯ್ತ್ ಪೋತಿನ ರಡ್ಡ್ ಸರ್ತಿ ಸೈತಿನ ಮರೊಕುಲು ಆದುಲ್ಲೆರ್.

13ಮೊಕುಲು ಸ್ವಂತ ನಾಚಿಗೆದ ನುರೆ ಕಕ್ಕುನ ಕಡಲ್ದ ಮರ್ಲ್ ಸೆರೆತ್ತ ಲೆಕ್ಕಲಾ, ಅಲೆವೊಂದುಪ್ಪು ಬೊಳ್ಳಿಲೆ ಲೆಕ್ಕಲಾ ಉಲ್ಲೆರ್. ಮೊಕ್ಲೆನ ಪಾಲ್‌ಗ್ ಗರ್ಗಂಡ ಕತ್ತಲೆ ಸದಾಕಾಲೊಗು ದೀತ್ತ್ಂಡ್.

14ಆದಾಮುಡ್ದು ಏಳನೆ ತರೆತಾಯೆ ಆದಿತ್ತಿನ ಹನೋಕೆಲಾ ಮೊಕ್ಲೆ ಸಂಗತಿಡ್ ಪ್ರವಾದನೆ ಮಲ್ತ್‌ದೆ. “ತೂಲೆ, ಕರ್ತವೆ ತನ ಲೆಕ್ಕದಾಂತಿ ಪರಿಶುದ್ಧ ದೂತೆರೆಡೊಪ್ಪ ಬರ್ಪೆ.

15ಬತ್ತ್‌ದ್ ಮಾತೆರೆಗ್ ನ್ಯಾಯತೀರ್ಪು ಮಲ್ತ್‌ದ್, ಭಕ್ತಿದಾಂತಿ ಮಾತೆರೆಗ್ಲಾ ಅಕುಲು ಮಲ್ತಿ ಮಾತ ಅನ್ಯಾಯದ ಕೆಲಸೊಲೆಗಾದ್‌ಲಾ ಭಕ್ತಿದಾಂತಿ ಪಾಪಿಲು ತನ್ಕ್ ವಿರೋಧಾದ್ ಪಾತೆರಿ ಮಾತ ಕಠಿಣ ಪಾತೆರೊಲೆಗಾದ್‌ಲಾ ಶಿಕ್ಷೆ ಕೊರಿಯೆರೆ ಬರ್ಪೆ,” ಅಂದ್‌ದ್ ಪಂಡೆ.

16ಇಂಚಿತ್ತಿನಾಕುಲು ಗುಣುಗುಟ್ಟುನಾಕುಲು, ಒರಿಯನ ತಪ್ಪುನು ನಾಡ್ ಪತ್ತುನಾಕುಲು, ತನ್ಕುಲೆ ಇಚ್ಚೆಲೆಗ್ ತಕ್ಕ ನಡಪುನಾಕುಲು, ಬೂಟು ಪಾತೆರುನಾಕುಲು, ಅವ್ವತ್ತಂದೆ ಲಾಭೊಗಾದ್ರ ಮೋನೆಗ್ ತಕ್ಕ ಪಾತೆರುನಾಕುಲು ಆದುಲ್ಲೆರ್.

17ಪ್ರೀತಿದಾಕುಲೇ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಪೊಸ್ತಲೆರ್ ಮಲ್ತಿ ಪ್ರವಾದನೆಲೆನ್ ನೆನೆಪು ಮಲ್ತೊನ್ಲೆ.

18“ಅಂತ್ಯಕಾಲ ಬನ್ನಗ ತಮಾಷೆ ಮಲ್ಪುನಾಕುಲು ತೋಜಿದ್ ಬರುವೆರ್. ಅಕ್ಲೆನ ಇಚ್ಚಾನುಸಾರ ಭಕ್ತಿಗ್ ವಿರೋಧಾದ್ ನಡತೊನ್ವೆರ್.”

19ಈ ಜನೊಕುಲು ನಿಕ್ಲೆ ನಡುಟು ಭೇದೊನು ಉಂಡು ಮಲ್ಪುನಾಕುಲುಲಾ ಪ್ರಪಂಚದಾಕುಲುಲಾ ಶುದ್ಧ ಆತ್ಮದಾಂತಿನಾಕುಲುಲಾ ಆದುಲ್ಲೆರ್.

20ಆಂಡ ಪ್ರೀತಿದಾಕುಲೇ, ನಿಕುಲಾಂಡಲಾ ನಿಕ್ಲೆಡುಪ್ಪುನ ಪರಿಶುದ್ಧವಾಯಿನ ಕ್ರಿಸ್ತ ನಂಬಿಕೆನ್ ಆಧಾರ ಮಲ್ತೊಂದು ಭಕ್ತಿಡ್ ಅಭಿವೃದ್ಧಿ ಹೊಂದೊಂದು ಪರಿಶುದ್ಧಾತ್ಮೊಡು ಪ್ರಾರ್ಥನೆ ಮಲ್ತೊಂದುಪ್ಪುಲೆ.

21ದೇವೆರೆ ಪ್ರೀತಿಡ್ ನಿಕ್ಲೆನ್ ಜೋಕೆಡ್ ಕಾತೊನ್ಲೆ. ನಿತ್ಯಜೀವೊಗಾದ್ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಕರುಣೆನ್ ಎದುರು ತೂಲೆ.

22ನಂಬಿಕೆದ ಸಂಗತಿಡ್ ಸಂಶಯದಾಕುಲೆಗ್ ಕರುಣೆ ತೋಜಪಾಲೆ.

23ಕೆಲೆವೆರೆನ್ ತೂತ ಬಾಯಿಡ್ದ್ ಪಿದಯಿ ಒಯಿತ್‌ದ್ ಒರಿಪಾಲೆ. ಕೆಲವು ಜನೊಕುಲೆಗ್ ಕರುಣೆ ತೋಜಪಾನಗ ಪೋಡಿಗೆ ಉಪ್ಪಡ್, ಶರೀರೊಡು ಹಾಳ್ ನಡತೆಡ್ ಉಪ್ಪುನಾಕುಲೆನ ಕುರೆತ ಕುಂಟುನು ಅಸಹ್ಯ ಮಲ್ಪುಲೆ.

24ದಂಟ್‌ದ್ ಬೂರಂದಿಲೆಕ್ಕ ನಿಕ್ಲೆನ್ ಕಾತ್‌ದ್ ದೋಷದಾಂತಿನಾಕುಲಾದ್ ಸಂತೋಷೊಡು ತನ ಮೈಮೆದ ಎದುರು ನಿಕ್ಲೆನ್ ಉಂತಾವೆರೆ ಸಾಮರ್ಥ್ಯ ಇತ್ತಿ ನಮ ರಕ್ಷಕೆ ಆದುಪ್ಪು ಒರಿಯೇ ದೇವೆರೆಗ್, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ಮೈಮೆ, ಮಾನಾದಿಗೆ, ಬಲ, ಅಧಿಕಾರ ಮಾತ ಕಾಲೊಡು ಇತ್ತಿಲೆಕ್ಕ ಇತ್ತೆಲಾ ಏನಿತ್ಯೇನಿಗ್ಲಾ ಉಪ್ಪಡ್, ಆಮೆನ್.

Jump to:

Recommended Reading

Commentary Jude Commentaries → Devotional Jude Devotional Guide → Get This Bible Tulu (ಪೊಸ ಒಡಂಬಡಿಕೆ) Study Bible →