Luke 23

Tulu (ಪೊಸ ಒಡಂಬಡಿಕೆ)

1ಅಲ್ಪ ಸೇರ್ದಿನಾಕುಲು ಮಾತೆರ್ ಆಯನ್ ಪಿಲಾತನ ಕೈತಲ್‌ ಲೆತ್ತೊಂದು ಪೋದು.

2ಅಕುಲು ಉಂಬೆನೇ ರಕ್ಷಕೆ ಆದುಪ್ಪು ಕ್ರಿಸ್ತೆ ಪನ್ಪಿ ಒರಿ ಅರಸು ಪಂಡ್ದ್‌ಲಾ ಕೈಸರಗ್ ತೆರಿಗೆ ಕೊರಿಯೆರೆ ಬಲ್ಲಿ ಅಂದ್‌ದ್ ಅಡ್ಡಿ ಮಲ್ತ್‌ದ್ ಎಂಕ್ಲೆನ ದೇಶದ ಜನೊಕುಲೆನ ಮನಸ್‌ನ್ ಹಾಳ್ ಮಲ್ಪುನೆನ್ ತೂಯ ಅಂದ್‌ದ್ ಆಯನ ಮಿತ್ತ್ ದೂರು ಕೊರಿಯೆರ್.

3ಪಿಲಾತೆ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಪಂಡ್ದ್ ಕೇನ್ನಗ ಯೇಸು, “ಈಯೆ ಪನೊಂದುಲ್ಲತ್ತಾ,” ಅಂದ್‌ದ್ ಪನ್ನಗ,

4ಪಿಲಾತೆ ಪ್ರಧಾನಯಾಜಕೆರೆಗ್ಲಾ ಜನೊಕುಲೆ ಗುಂಪುಗ್ಲಾ, “ಈ ನರಮಾನಿಗ್ ಶಿಕ್ಷೆ ಕೊರ್ಪಿಲೆಕ್ಕ ಅಂಚಿನ ತಪ್ಪು ದಾಲಾ ಎಂಕ್ ತೋಜುಜಿ ಪಂಡೆ.”

5ಐಕ್ ಅಕುಲು ಉಂಬೆ ಗಲಿಲಾಯೊಡು ಸುರು ಮಲ್ತ್‌ದ್ ಯೂದಾಯದ ಮುಟ್ಟಲಾ ಬೋಧನೆ ಮಲ್ತೊಂದು ಜನೊಕುಲೆ ನಡುಟು ಲಡಯಿ ಮಲ್ಪಾವೆ ಅಂದ್‌ದ್ ಒತ್ತುದು ಪಂಡೆರ್.

6ಉಂದೆನ್ ಪಿಲಾತೆ ಕೇಂಡ್ದ್ ಈ ನರಮಾನಿ ಗಲಿಲಾಯದಾಯೆ ಅಂದ್‌ದ್ ಗೊತ್ತಾದ್

7ಉಂಬೆ ಹೆರೋದನ ಅಧಿಕಾರೊಗು ಸೇರ್ದಿತ್ತಿನಾಯೆ ಅಂದ್‌ದ್ ಆಯನ್ ಹೆರೋದನ ಕೈತಲ್‌ ಕಡಪುಡಿಯೆ. ಹೆರೋದೆ ಆ ದಿನೊಕುಲೆಡ್ ಯೆರೂಸಲೇಮುಡೇ ಇತ್ತೆ.

8ಹೆರೋದೆ ಯೇಸುನು ತೂದು ಸಂತೋಷ ಪಡೆಯೆ. ಹೆರೋದೆ ಯೇಸುನ ಸಂಗತಿಡ್ ಮಸ್ತ್ ಸಂಗತಿಲೆನ್ ಕೇನಿನೆಡ್ದ್ ಆಯನ್ ತೂವೊಡು ಅಂದ್‌ದ್ ಮಸ್ತ್ ಸಮಯೊಡ್ದಿಂಚಿ ನಿರೀಕ್ಷೆ ಮಲ್ತೊಂದಿತ್ತೆ. ಆಯಡ್ದ್ ಒವ್ವಾಂಡಲಾ ಕಾರ್ನಿಕೊಲೆನ್ ತೂವೊಡು ಅಂದ್‌ದ್ ಎನ್ನ್‌ದಿತ್ತೆ.

9ಆಯೆ ಮಸ್ತ್ ಪಾತೆರೊಲೆಡ್ದ್ ಯೇಸುಗು ಪ್ರಶ್ನೆ ಮಲ್ತ್ಂಡಲಾ ಯೇಸು ಆಯಗ್ ದಾಲಾ ಉತ್ತರ ಕೊರ್ಜೆ.

10ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಉಂತೊಂದು ಆಯನ ಮಿತ್ತ್ ಕಠಿಣಾದ್ ದೂರುನು ಪನೊಂದಿತ್ತೆರ್.

11ಕಡೆಕ್ಕ್ ಹೆರೋದೆ ತನ ಸಿಪಾಯಿಲೆನ್ ಸೇರೊಂದು ಆಯಗ್ ತಿರಸ್ಕಾರಲಾ ಗೇಲಿಲಾ ಮಲ್ತ್‌ದ್ ಎಡ್ಡೆ ಅಂಗಿ ಪಾಡಾದ್ ಪಿಲಾತನ ಕೈತಲ್‌ ಪಿರ ಕಡಪುಡ್ದು ಕೊರಿಯೆ.

12ಅವ್ವೇ ದಿನೊಟು ಹೆರೋದೆಲಾ ಪಿಲಾತೆಲಾ ಒರಿಯಗ್ ಒರಿ ಸ್ನೇಹಿತೆರ್ ಆಯೆರ್; ಅವೆಡ್ದುಂಬು ಪಗೆಟಿತ್ತೆರ್.

13ಬೊಕ್ಕ ಪಿಲಾತೆ ಪ್ರಧಾನಯಾಜಕೆರೆನ್ಲಾ ಯೆಹೂದ್ಯೆರೆ ಅಧಿಕಾರಿಲೆನ್ಲಾ ಜನೊಕುಲೆನ್ಲಾ ಒಟ್ಟಾದ್ ಲೆಪ್ಡಾದ್,

14ಅಕ್ಲೆಡ ಪಂಡಿನಿ, “ಈ ನರಮಾನಿ ಜನೊಕುಲೆನ್ ತಪ್ಪು ಸಾದಿಗ್ ತಿರ್ಗಾವುನಾಯೆ ಅಂದ್‌ದ್ ಉಂಬ್ಯನ್ ಎನ ಕೈತಲ್‌ ಕನತ್‌ದ್ ದೂರು ಕೊರಿಯರ್. ಯಾನ್ ನಿಕ್ಲೆನ ಎದುರುಡೇ ವಿಚಾರಣೆ ಮಲ್ಪುನಗ ಉಂಬ್ಯಗ್ ಶಿಕ್ಷೆ ಕೊರ್ಪಿನಂಚಿನ ಒಂಜಿ ತಪ್ಪುಲಾ ಎಂಕ್ ತೋಜಿಜಿ;

15ಹೆರೋದಗ್ಲಾ ತೋಜಿಜಿ; ಆಯೆ ಉಂಬ್ಯನ್ ಪಿರ ಎಂಕ್ಲೆನ ಕೈತಲ್‌ ಕಡಪುಡುದೆ ಅತ್ತಾ. ಇಂದಾ, ಉಂಬೆ ಮರಣ ದಂಡನೆಗ್ ತಕ್ಕವಾಯಿನೆನ್ ಮಲ್ತಿನಾಯೆ ಅತ್ತ್;

16ಅವೆಡ್ದಾವರ ಯಾನ್ ಉಂಬ್ಯಗ್ ಹಾಕಾದ್ ಬುಡ್ದು ಬುಡ್ಪೆ,” ಪಂಡೆ.

17ಪಿಲಾತಗ್ ಪರ್ಬದ ಸಮಯೊಡು ಒರಿಯನ್ ಸೆರೆಮೆನೆಡ್ದ್ ಬುಡ್ದು ಕೊರ್ಪಿನ ಕ್ರಮ ಇತ್ತ್ಂಡ್.

18ಆಂಡ ಅಕುಲು, “ಆಯನ್ ಕೆರ್ಪಾಲ, ಎಂಕ್ಲೆಗ್ ಬರಬ್ಬನ್ ಬುಡ್ದು ಕೊರು,” ಅಂದ್‌ದ್ ಒಟ್ಟಾದ್ ಬೊಬ್ಬೆ ಪಾಡಿಯೆರ್.

19ಈ ಬರಬ್ಬನ್ ಪಟ್ಟಣೊಡು ಗಲಾಟೆ ಮಲ್ತ್‌ದ್ ಒರಿಯನ್ ಕೆರ್ತಿನೆಡ್ದ್ ಸೆರೆಮನೆಟ್ ಪಾಡ್ದ್ ಇತ್ತೆರ್.

20ಪಿಲಾತಗ್ ಯೇಸುನು ಬುಡ್ಪಾವುನ ಮನಸ್ ಇತ್ತಿನೆಡ್ದ್ ಕುಡ ಅಕ್ಲೆಡ ಪಾತೆರಿಯೆ.

21ಆಂಡ ಅಕುಲು, “ಯೇಸುನು ಕ್ರುಸ್ಸುಗು ಪಾಡ್ಪಾಲ, ಕ್ರುಸ್ಸುಗು ಪಾಡ್ಪಾಲ,” ಅಂದ್‌ದ್ ಬೊಬ್ಬೆ ಪಾಡೊಂದಿತ್ತೆರ್.

22ಮೂಜನೆ ಸರ್ತಿ ಅಕ್ಲೆಡ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್‌ದೆ? ಎಂಕ್ ಆಯಡ ಮರಣದ ದಂಡನೆಗ್ ತಕ್ಕಂತಿ ಅಪರಾಧ ದಾಲಾ ತೋಜುಜಿ. ಐಡ್ದಾವರ ಉಂಬ್ಯನ್ ಹಾಕಾದ್ ಬುಡ್ದು ಬುಡ್ಪೆ,” ಅಂದ್‌ದ್ ಅಕ್ಲೆಗ್ ಪಂಡೆ.

23ಆಂಡ ಅಕುಲು ಮಲ್ಲ ಅರಬಾಯಿ ದೀವೊಂದು, “ಆಯನ್ ಕ್ರುಸ್ಸುಗು ಪಾಡೊಡು,” ಅಂದ್‌ದ್ ಬಲವಂತ ಮಲ್ತೆರ್; ಅಕ್ಲೆನ ಅರಬಾಯಿ ಗೆಂದ್‌ಂಡ್.

24ಪಿಲಾತೆ, “ನಿಕುಲು ಕೇಂಡೊಂಡಿ ಲೆಕ್ಕ ಆವಡ್,” ಅಂದ್‌ದ್ ಯೇಸುನು ಕೆರಿಯೆರೆ ತೀರ್ಪು ಕೊರಿಯೆ.

25ಗಲಾಟೆ ಮಲ್ತ್‌ದ್ ಮಾನ್ಯ ಕೆರ್ದ್ ಸೆರೆಮನೆಟ್ ಇತ್ತಿ ಬರಬ್ಬನ್ ಅಕುಲು ಕೇಂಡೊಂಡಿ ಪ್ರಕಾರ ಬುಡ್ದು ಕೊರ್ದು ಯೇಸುನು ಅಕ್ಲೆ ಚಿತ್ತೊಗು ಒಚ್ಚಿದ್ ಕೊರಿಯೆ.

26ಸಿಪಾಯಿಲು ಆಯನ್ ಲೆತ್ತೊಂದು ಪೋನಗ ಕಂಡೊಡ್ದು ಬರೊಂದಿತ್ತಿ ಕುರೇನೆ ಪೇಂಟೆದ ಸೀಮೋನೆ ಪನ್ಪಿನಾಯನ್ ಪತ್ತ್‌ದ್ ಕ್ರುಸ್ಸುನು ಆಯನ ಪುಗೆಲ್‌ಡ್ ದೀದ್ ಯೇಸುನ ಪಿರವುಡೆ ತುಂಬೊಂದು ಬರಿಯೆರೆ ಪಂಡೆರ್.

27ಜನೊಕುಲುಲಾ ಪೊಂಜೊವುಲುಲಾ ಮಲ್ಲ ಗುಂಪಾದ್ ಆಯನ ಬೆರಿಯೆ ಪೋಯೆರ್. ಆ ಪೊಂಜೊವುಲು ತಿಗಲೆ ದರ್ತೊಂದು ಆಯಗಾದ್ ಬುಲ್ತೊಂದು ಇತ್ತೆರ್.

28ಯೇಸು ಅಕ್ಲೆನ ಕಡೆಕ್ಕ್ ತಿರ್ಗ್‌ದ್, “ಯೆರೂಸಲೇಮುದ ಪೊಂಜೊವುಲೇ, ಎಂಕಾದ್ ಬುಲ್ಪೊಡ್ಚಿ; ನಿಕ್ಲೆಗಾದ್‌ಲಾ ನಿಕ್ಲೆನ ಜೋಕುಲೆಗಾದ್‌ಲಾ ಬುಲ್ಪುಲೆ.

29ದಾಯೆಗಂದ್ಂಡ ಬಂಜಿನಾಕುಲು ಆವಂದಿನಾಕುಲುಲಾ ಮಿರೆ ಪೇರ್ ಪರ್ಪಾವಂದಿನಾಕುಲುಲಾ ಭಾಗ್ಯವಂತೆರ್ ಅಂದ್‌ದ್ ಜನೊಕುಲು ಪನ್ಪಿ ದಿನೊಕುಲು ಬರ್ಪುಂಡು.

30ಆ ಕಷ್ಟದ ಕಾಲೊಡು ಜನೊಕುಲೆಗ್ ತಡೆವೊನೆರೆ ಬಲ ಇಜ್ಜಂದಿನಪಗ, ‘ಪರ್ವತಲೇ ಎಂಕ್ಲೆನ ಮಿತ್ತ್ ಬೂರ್ಲೆ!’ ಗುಡ್ಡೆಲೇ ‘ಎಂಕ್ಲೆನ್ ಮುಚ್ಚೊನ್ಲೆ!’ ಪನ್ಪರ್.

31ಮರ ಪಜ್ಜಿ ಉಪ್ಪುನಗನೇ ಇಂಚ ಮಾತ ಮಲ್ತ್ಂಡ ನುಂಗೆಲ್ ಮರೊಕು ದಾದ ಅವು?”

32ಯೇಸುನ ಒಟ್ಟುಗು ಕೆರಿಯೆರೆ ಕಲ್ವೆರಾದಿತ್ತಿ ಬೇತೆ ಇರ್ವೆರೆನ್ ಲೆತ್ತೊಂದು ಪೋಯೆರ್.

33ಅಕುಲು “ಕಪಾಲ,” ಪನ್ಪಿ ಜಾಗ್‌ಗ್ ಬನ್ನಗ ಅಲ್ಪ ಆಯನ್ಲಾ ಆ ಕಲ್ವೆರೆನ್ಲಾ ಕ್ರುಸ್ಸುಗು ಪಾಡಿಯೆರ್ ಒರಿಯನ್ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್‌ಡ್ ಪಾಡಿಯೆರ್.

34ಅಪಗ ಯೇಸು, “ಅಮ್ಮೆರೇ, ಅಕ್ಲೆಗ್ ಮಾಪು ಮಲ್ಪು; ತನ್ಕುಲು ದಾದ ಮಲ್ಪುವೆರ್ ಪನ್ಪಿನೆನ್ ತೆರಿದಿಜೆರ್,” ಅಂದ್‌ದ್ ಪಂಡೆ. ಐಡ್ದ್ ಬೊಕ್ಕ ಆಯನ ಕುಂಟುನು ಪಾಲ್ ಮಲ್ತ್‌ದ್ ಚೀಟಿ ಪಾಡಿಯೆರ್.

35ಜನೊಕುಲು ತೂವೊಂದೇ ಉಂತಿಯೆರ್. ಉಂದತ್ತಂದೆ ಅಧಿಕಾರಿಲು ಮಸ್ಕಿರಿ ಮಲ್ತ್‌ದ್, “ಆಯೆ ಬೇತೆಕ್ಲೆನ್ ಬಚವು ಮಲ್ತೆ. ಆಯೆ ದೇವೆರ್ ಅಜತ್ ದೆತ್ತೊಂಡಿ ಕ್ರಿಸ್ತೆ ಆದಿತ್ತೆಡ, ತನನ್ ತಾನೇ ಬಚವು ಮಲ್ತೊನಡ್ ಅಂದ್‌ದ್ ಗೇಲಿ ಮಲ್ತೆರ್.”

36ಸಿಪಾಯಿಲು ಆಯನ್ ಗೇಲಿ ಮಲ್ತೆರ್. ಅಕುಲು ಆಯನ ಕೈತಲ್‌ ಬತ್ತ್‌ದ್ ಪುಳಿರಸೊನು ತೋಜಾದ್

37“ಈ ಯೆಹೂದ್ಯೆರೆ ಅರಸು ಆದಿತ್ತಡ ನಿನನ್ ಬಚವು ಮಲ್ತೊನ್ಲ,” ಪಂಡೆರ್.

38ಉಂದತ್ತಂದೆ ಆಯನ ಕ್ರುಸ್ಸುದ ಮಿತ್ತ್‌ಡ್ “ಯೆಹೂದ್ಯೆರೆ ಅರಸು,” ಅಂದ್‌ದ್ ಒಂಜಿ ಪಲಯಿಡ್ ಬರೆದ್ ಪಾಡ್ದ್ ಇತ್ತೆರ್.

39ನೇಲಾದಿ ಆ ಕಲ್ವೆರೆಡ್ ಒರಿ ಆಯನ್ ದೂಷಣೆ ಮಲ್ತ್‌ದ್, “ಈ ಬರೊಡಾಯಿನ ಕ್ರಿಸ್ತೆ ಅತ್ತಾ, ನಿನನ್ ಬಚವು ಮಲ್ತೊನ್ಲ, ಎಂಕ್ಲೆನ್ಲಾ ಬಚವು ಮಲ್ಪು,” ಪಂಡೆ.

40ಐಕ್ ರಡ್ಡನೆದಾಯೆ ಆಯನ್ ದಟ್ಟಿದ್, “ಈ ಉಂದೇ ನ್ಯಾಯತೀರ್ಪುಡು ಉಪ್ಪುನಗ ದೇವೆರೆಗ್ ಪೋಡಿಯುಜನ?

41ನಮಾಂಡಲಾ ನ್ಯಾಯದ ದಂಡನೆಡ್ ಉಪ್ಪುನವು ನ್ಯಾಯನೇ. ನಮ ಮಲ್ತಿನೆಕ್ಕ್ ತಕ್ಕ ಪ್ರತಿಫಲೊನು ಪಡೆಯೊಂದು ಉಲ್ಲ; ಉಂಬೆ ಅಂಚಿನ ದಾಲಾ ಮಲ್ತ್‌ಜೆ,” ಅಂದ್‌ದ್ ಪಂಡ್ದ್

42“ಯೇಸೋ, ಈ ನಿನ ರಾಜ್ಯೊಗು ಬನ್ನಗ ಎನನ್ ನೆನೆಪು ಮಲ್ಪು,” ಪಂಡೆ.

43ಐಕ್ ಯೇಸು, “ಇನಿಯೇ ಎನಡೊಪ್ಪ ಪರದೈಸೊಡು ಉಪ್ಪುವ ಅಂದ್‌ದ್ ನಿಕ್ಕ್ ಸತ್ಯಾದ್ ಪನ್ಪೆ,” ಪಂಡ್ದ್ ಉತ್ತರ ಕೊರಿಯೆ.

44ಈತಾನಗ ಮಧ್ಯಾಹ್ನ ಆಂಡ್. ಸೂರ್ಯನ ದೊಂಬು ಮಾಜಿದ್ ಮೂಜಿ ಗಂಟೆ ಮುಟ್ಟ ಆ ದೇಶದ ಮಿತ್ತ್ ಕತ್ತಲೆ ಆಂಡ್; ಆತಿ ಪರಿಶುದ್ಧ ಆದುಪ್ಪು ದೇವಾಲಯದ ಪರದೆ ನಡುಟು ಪರಿದ್ ರಡ್ಡ್ ಪಾಲ್ ಆಂಡ್.

46ಐಡ್ದ್ ಬೊಕ್ಕ ಯೇಸು, “ಅಮ್ಮೆರೆ, ಎನ ಆತ್ಮೊನು ನಿನ ಕೈಕ್ ಒಪ್ಪಿಸಾವೆ,” ಅಂದ್‌ದ್ ಮಲ್ಲ ಸ್ವರೊಟ್ಟು ಬುಲ್ತೆ. ಉಂದೆನ್ ಪಂಡಿ ಬೊಕ್ಕ ಪ್ರಾಣ ಬುಡಿಯೆ.

47ಶತಾಧಿಪತಿ ನಡತಿ ಸಂಗತಿನ್ ತೂದು, “ನಿಜಾದ್ ಈ ನರಮಾನಿ ನೀತಿವಂತೆ,” ಅಂದ್‌ದ್ ದೇವೆರೆನ್ ಪುಗರಿಯೆ.

48ಈ ಸಂಗತಿನ್ ತೂವೆರೆ ಸೇರ್ದಿತ್ತಿ ಜನೊಕುಲು ನಡತಿ ಸಂಗತಿನ್ ತೂದು, ತಿಗಲೆ ದರ್ತೊಂದು ಪಿರ ಪೋಯೆರ್.

49ಪೊಲಬು ಇತ್ತಿನಾಕುಲು ಮಾತೆರ್ ಗಲಿಲಾಯೊಡ್ದು ಬೈದಿನ ಪೊಂಜೊವುಲು ದೂರೊಡು ಉಂತೊಂದು ಈ ಸಂಗತಿನ್ ತೂವೊಂದಿತ್ತೆರ್.

50ಅರಿಮಥಾಯೆ ಪನ್ಪಿ ಯೆಹೂದ್ಯೆರೆ ಪಟ್ಟಣದ ಒರಿ ನರಮಾನಿ ಇತ್ತೆ. ಆಯನ ಪುದರ್ ಯೋಸೇಫೆ, ಆಯೆ ಹಿರಿಸಭೆತಾಯೆ, ಎಡ್ಡೆಂತಿನಾಯೆ, ನೀತಿದಾಯೆ, ದೇವೆರೆ ರಾಜ್ಯೊನು ಎದುರು ತೂವೊಂದಿತ್ತಿನಾಯೆ ಆದಿತ್ತೆ. ಆಯೆ ಹಿರಿಸಭೆತಾಕುಲೆನ ಆಲೋಚನೆಗ್ಲಾ ಕೆಲಸೊಗ್ಲಾ ಒಪ್ಪಿಗೆ ಕೊರ್ತುಜೆ.

52ಆಯೆ ಪಿಲಾತನ ಕೈತಲ್‌ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್‌ದ್ ನಟ್ಟೊಂಡೆ.

53ಅವೆನ್ ಕ್ರುಸುಡ್ದ್ ಜಪುಡಾದ್ ನಾರ್‌ಮಡಿತ ಕುಂಟುಡು ಸುತ್ತುದು ತೋಡ್‌ದಿತ್ತಿನ ಕಲ್ಲ್‌ದ ಸಮಾಧಿಡ್ ದೀಯೆ. ಆ ಸಮಾಧಿಡ್ ಆತ್‌ನೆಟ್ಟ ಏರೆನ್ಲಾ ದೀದಿತ್ತಿಜೆರ್.

54ಆನಿ ತಯಾರ್ ಮಲ್ಪು ದಿನ ಆದಿತ್ತ್‌ದ್ ಬೊಕ್ಕ ಸಬ್ಬತ್‌ದಿನ ಸುರು ಆವೆರೆ ಒಂತೆ ಪೊರ್ತು ಮಾತ್ರ ಇತ್ತ್ಂಡ್.

55ಗಲಿಲಾಯೊಡ್ದು ಬತ್ತಿ ಪೊಂಜೊವುಲು ಆಯ ಬೆರಿಯೆ ಪೋದು, ಸಮಾಧಿನ್ಲಾ ಆಯ ಶರೀರೊನು ದೀತಿನ ರೀತಿನ್ಲಾ ತೂಯೆರ್;

56ಇಲ್ಲಗ್ ಪಿರ ಪೋದು ಕಮ್ಮೆನ ದ್ರವ್ಯೊಲೆನ್ಲಾ ಕಮ್ಮೆನದ ಎಣ್ಣೆನ್ಲಾ ತಯಾರ್ ಮಲ್ತ್‌ದ್ ಅಪ್ಪಣೆದಲೆಕ್ಕ ಸಬ್ಬತ್‌ಡ್ ಮನಿಪಂದೆ ಇತ್ತೆರ್.

← Chapter 22 Jump to: Chapter 24 →