Philemon 1

Tulu (ಪೊಸ ಒಡಂಬಡಿಕೆ)

Jump to:

1ಕ್ರಿಸ್ತ ಯೇಸುಗಾದ್ ಕೈದ್‌ಡುಪ್ಪು ಪೌಲುಲಾ ಸಹೋದರೆ ತಿಮೋಥಿಲಾ ಎಂಕ್ಲೆಗ್ ಪ್ರೀತಿದಾಯೆಲಾ ಜತೆಸೇವಕೆಲಾ ಆಯಿ ಫಿಲೆಮೋನುಗ್ಲಾ

2ಸಹೋದ್ರಿ ಅಪ್ಫಿಗ್ಲಾ ಎಂಕುಲೆ ಜತೆಸಿಪಾಯಿ ಆಯಿ ಅರ್ಖಿಪ್ಪಗ್ಲಾ ನಿನ ಇಲ್ಲಡ್ ಕೂಡುದು ಬರ್ಪಿ ಸಭೆಕ್ಲಾ ಬರೆಪಿನಿ ದಾನೆ ಪಂಡ,

3ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

4ಕರ್ತವೆ ಆದುಪ್ಪು ಯೇಸು ಮಿತ್ತ್ ದೀತಿನ ನಂಬಿಕೆನ್ಲಾ ದೇವಜನೊಕುಲೆ ಮಿತ್ತ್ ದೀತಿ ಪ್ರೀತಿದ ಸಂಗತಿಡ್ಲಾ ಕೇಂಡ್ದ್, ಯಾನ್ ಪ್ರಾರ್ಥನೆ ಮಲ್ಪುನಾತ್ ಸರ್ತಿ ನಿನನ್ ನೆನೆಪು ಮಲ್ತೊಂದು ಯಾನ್ ದೇವೆರೆಗ್ ಏಪಲಾ ಉಪಕಾರ ಮಲ್ತ್‌ದ್ ನಿಕ್ಲೆಗಾದ್ ದೇವೆರೆಡ ನಟ್ಟೊನ್ವೆ.

6ಕ್ರಿಸ್ತಡ್ ನಂಕ್ ಒದಗ್‌ದ್ ಬೈದಿನ ಮಾತ ಎಡ್ಡೆ ವರೊಕ್ಲೆ ಸಂಗತಿಡ್ ಈ ತಿಳುವಳಿಕೆನ್ ಪಡೆತಿನಾಯೆ ಆದ್ ಕ್ರಿಸ್ತ ನಂಬಿಕೆಡ್ ಉಪ್ಪುನ ನಿನ ಅನ್ಯಮನ್ಯ ಕ್ರಿಸ್ತಗ್ ಹೆಚ್ಚಿಗೆದ ಮೈಮೆನ್ ಮಲ್ಪೊಡು ಅಂದ್‌ದ್ ಪ್ರಾರ್ಥನೆ ಮಲ್ಪುವೆ.

7ಸಹೋದ್ರ, ನಿನಡ್ದಾವರ ದೇವಜನೊಕುಲೆ ಉಡಲ್‌ಡ್ ಉಮೇದ್ ಉಂಡಾಯಿನೆಡ್ದ್, ನಿನ ಪ್ರೀತಿಡ್ದಾವರ ಎಂಕ್ ಮಸ್ತ್ ಸಂತೋಷಲಾ ಆಧರಣೆಲಾ ಉಂಡಾಂಡ್.

8ಅಂಚಾಯಿನೆಡ್ದ್ ನಿಕ್ಕ್ ಬೋಡಾಪಿನೆನ್ ಅಪ್ಪಣೆ ಕೊರಿಯೆರೆ ಎಂಕ್ ಕ್ರಿಸ್ತಡ್ ಪೂರ ಅಧಿಕಾರ ಇತ್ತ್ಂಡಲಾ ಅಂಚ ಮಲ್ಪಂದೆ

9ಪರಬೆಲಾ ಇತ್ತೆ ಕ್ರಿಸ್ತ ಯೇಸುಗಾದ್ ಸೆರೆಮನೆಟುಪ್ಪು ಪೌಲು ಪ್ರೀತಿಡ್ ನಿನಡ ಕೇನೊನ್ವೆ.

10ಯಾನ್ ಸೆರೆಮನೆಟುಪ್ಪುನಗ ಎಂಕ್ ತಿಕ್ಕ್‌ದಿನ ಎನ ಮಗೆ ಆದುಪ್ಪು ಒನೇಸಿಮಗಾದ್ ನಿನಡ ಕೇನೊನ್ವೆ.

11ಆಯೆ ದುಂಬು ನಿಕ್ಕ್ ಪ್ರಯೋಜನದಾಂತಿನಾಯೆ ಆದಿತ್ತೆ, ಇತ್ತೆ ಕಂಡಿತಾದ್ ನಿಕ್ಕ್‌ಲಾ ಎಂಕ್‌ಲಾ ಬೋಡಾಪಿನಾಯೆ ಆದುಲ್ಲೆ.

12ಆಯೆ ಎನ ಪ್ರಾಣದಲೆಕ್ಕ ಇತ್ತೆಡಲಾ ಆಯನ್ ನಿನ ಕೈತಲ್‌ ಪಿರ ಕಡಪುಡ್ದು ಕೊರ್ತೆ.

13ಯಾನ್ ಸುವಾರ್ತೆಗಾದ್ ಸೆರೆಮನೆಟುಪ್ಪುನಗ ನಿನ ಪಗತೆಗ್ ಆಯೆ ಎಂಕ್ ಸೇವೆ ಮಲ್ಪುಲೆಕ್ಕ ಆಯನ್ ಎನ ಕೈತಲೇ ದೀವೊನೊಡು ಅಂದ್‌ದ್ ಆಲೋಚನೆ ಮಲ್ತ್‌ದಿತ್ತೆ.

14ಆಂಡ ನಿನ ಉಪಕಾರ ಬಲತ್ಕಾರೊಡು ಆವಂದೆ ಎಡ್ಡೆ ಮನಸ್‌ಡ್ದೇ ಆಪಿಲೆಕ್ಕ ನಿನ ಒಪ್ಪಿಗೆದಾಂತೆ ದಾಲ ಮಲ್ಪೆರೆ ಎಂಕ್ ಮನಸ್ ಇತ್ತ್‌ಜಿ.

15ಆಯೆ ಏಪೊಗ್ಲಾ ನಿನ್ನಾಯೆ ಆಯಿನೆಕ್ಕಾದ್ ಒಂತೆ ದಿನ ನಿನಡ್ದ್ ದೂರ ಆಯೆ.

16ನನ ಮಿತ್ತ್ ಆಯೆ ಗುಲಾಮೆ ಆದುಪ್ಪಂದೆ ಗುಲಾಮಡ್ದ್ ಹೆಚ್ಚಿಗೆದಾಯೆ ಆದ್ ಪ್ರೀತಿದ ಸಹೋದರೆ ಆದುಪ್ಪೊಡು. ಆಯೆ ಎಂಕ್ ಬಾರಿ ಪ್ರೀತಿದಾಯೆ ಆದುಪ್ಪುನೆಡ್ದ್ ನಿಕ್ಕ್ ಲೋಕದೃಷ್ಟಿಡ್ಲಾ ಕರ್ತವ ಸಮ್ಮಂಧೊಡ್ಲಾ ನನಲಾ ಏತೋ ಪ್ರೀತಿದಾಯೆ ಆದುಪ್ಪುವೆ.

17ಅಂಚಾಂಡ ಈ ಎನನ್ ನಿನ ಪಾಲ್‌ದಾರೆ ಅಂದ್‌ದ್ ಎನ್ನುವಡ ಎನನ್ ಸೇರಾವೊನುಲೆಕ್ಕನೇ ಆಯನ್ಲಾ ಸೇರಾವೊನ್ಲ.

18ಆಯಡ್ದ್ ನಿಕ್ಕ್ ದಾಲ ಅನ್ಯಾಯ ಮಲ್ತಿನವು ಉಂಡುಡ, ಅತ್ತ್‌ಡ ಆಯೆ ದಾಲ ಸಾಲ ತೀರಿಸಾವೆರೆ ಇತ್ತ್ಂಡಲಾ ಅವೆನ್ ಎನ ಲೆಖ್ಖೊಗು ಪಾಡ್ಲ.

19ಯಾನೇ ಕೊರ್ದು ತೀರಿಸಾವೆ ಅಂದ್‌ದ್ ಪೌಲು ಪನ್ಪಿ ಯಾನ್ ಎನ ಕೈಡ್ದೇ ಬರೆತೆ, ನಿನ ಆತ್ಮದ ಸಂಗತಿಡ್ ಈಯೇ ಎನ ಸಾಲೊಡುಲ್ಲ ಅತ್ತಾ?

20ಅಂದ್, ಸಹೋದ್ರ, ಕರ್ತವಡ್ ನಿನಡ್ದ್ ಎಂಕ್ ಪ್ರಯೋಜನ ಆಪಿಲೆಕ್ಕ ಮಲ್ಪುಲ; ಕ್ರಿಸ್ತಡ್ ಎನ ಉಡಲ್‌ಗ್ ಸಂತೋಷ ಪಡೆಪಾಲ.

21ಎನ ಪಾತೆರೊನು ಕೇನ್ವ, ಅಂದ್‌ದ್ ಎಂಕ್ ಭರವಸ ಉಪ್ಪುನೆಡ್ದ್ ನಂಬಿಕೆಡ್ ಈ ಪತ್ರಿಕೆನ್ ನಿಕ್ಕ್ ಬರೆತೆ. ಯಾನ್ ಪನ್ಪಿನೆಡ್ದ್‌ಲಾ ಹೆಚ್ಚಾದ್ ಮಲ್ಪುವ ಅಂದ್‌ದ್ ಎಂಕ್ ತೆರಿದುಂಡು.

22ಉಂದತ್ತಂದೆ, ದೇವೆರ್ ನಿನ ಪ್ರಾರ್ಥನೆನ್ ಕೇಂಡ್ದ್ ಎನನ್ ನಿಕ್ಲೆ ಕೈತಲ್‌ ಬರಿಯೆರೆ ಸಹಾಯ ಮಲ್ಪುವೆ ಪನ್ಪಿ ನಿರೀಕ್ಷೆ ಉಂಡು. ಅಂಚಾಯಿನೆಡ್ದ್ ಎಂಕ್ ಉಂತಿಯೆರೆ ಬುಡಾರ ತಯಾರ್ ಮಲ್ಪುಲ.

23ಕ್ರಿಸ್ತ ಯೇಸುಡು ಎನ ಜತೆಸೆರೆತಾಯೆ ಆದುಪ್ಪು ಎಪಫ್ರೊದಿತೆ

24ಎನ ಜತೆಸೇವಕೆರಾಯಿನ ಮಾರ್ಕೆ, ಅರಿಸ್ತಾರ್ಕೆ, ದೇಮಸ್, ಲೂಕೆ ನಿನನ್ ವಂದಿಪುವೆರ್.

25ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಆತ್ಮೊಡೊಪ್ಪ ಉಪ್ಪಡ್.

Jump to: