Titus 1

Tulu (ಪೊಸ ಒಡಂಬಡಿಕೆ)

Jump to: Chapter 2 →

1ದೇವೆರೆ ದಾಸೆಲಾ ಯೇಸು ಕ್ರಿಸ್ತನ ಅಪೊಸ್ತಲೆಲಾ ಆಯಿ ಪೌಲು ನಂಕ್ ಒಟ್ಟುಗುಪ್ಪು ನಂಬಿಕೆದ ಬಗೆಟ್ ತನ ನಿಜ ಮಗೆ ಆದುಪ್ಪು ತೀತಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ರಕ್ಷಕೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಕ್ ದಯಲಾ, ಸಮಾಧಾನಲಾ ಆವಡ್.

3ದೇವೆರ್ ಅಜತಿನಾಕುಲೆ ನಂಬಿಕೆನ್ಲಾ, ಭಕ್ತಿನ್ಲಾ ಉಂಡು ಮಲ್ಪುನ ಸತ್ಯದ ಗೇನೊಗ್ಲಾ ಅಭಿವೃದ್ಧಿ ಮಲ್ಪೆರೆಗಾದ್ರಲಾ ಯಾನ್ ಅಪೊಸ್ತಲೆ ಆತೆ. ಆ ನಂಬಿಕೆಗ್ಲಾ ಸತ್ಯದ ಗೇನೊಗ್ಲಾ ನಿತ್ಯಜೀವದ ನಿರೀಕ್ಷೆನೇ ಆಧಾರ ಆದುಂಡು.

4ಸುಳ್ಳು ಪನಂದಿನ ದೇವೆರ್ ಆ ನಿತ್ಯಜೀವೊನು ಕೊರ್ಪೆ ಅಂದ್‌ದ್ ಆದಿಡ್ದೇ ವಾಗ್ದತ್ತ ಮಲ್ತ್‌ದ್ ಸರಿಯಾಯಿನ ಸಮಯೊಡು ವಾಗ್ದಾನೊನು ಮುಗಿತ್‌ದ್ ಪ್ರಸಂಗೊಡು ಪ್ರಕಟ ಮಲ್ತೆ. ಆ ಬೋಧನೆದ ಉದ್ಯೋಗೊನು ನಮ ರಕ್ಷಕೆ ಆದುಪ್ಪು ದೇವೆರೆನ ಅಪ್ಪಣೆದ ಮಿತ್ತ್ ಎಂಕ್ ಒಪ್ಪಿಸಾದ್ ಕೊರ್ತೆ.

5ಯಾನ್ ನಿಕ್ಕ್ ಅಪ್ಪಣೆ ಕೊರ್ತಿಲೆಕ್ಕ ಕ್ರೇತ್ ದ್ವೀಪೊಡು ಒರಿದಿ ಕೆಲಸೊನು ಈ ತೀರಿಸಾದ್ ಸಮ ಮಲ್ಪೊಡಂದ್‌ದ್‌ಲಾ, ಊರು ಊರುಡು ಹಿರಿಯಾಕುಲೆನ್ ನೇಮಕ ಮಲ್ಪೊಡಂದ್‌ದ್‌ಲಾ ನಿನನ್ ಅವುಲು ಬುಡ್ದು ಬತ್ತೆ.

6ಸಭೆತ ಹಿರಿಯಾಯೆ ದೂರುದಾಂತಿನಾಯೆಲಾ, ಒರ್ತಿ ಬೊಡೆದಿ ಇತ್ತಿನಾಯೆಲಾ ಆದುಪ್ಪೊಡು. ಆಯನ ಜೋಕುಲು ಪಟಿಂಗೆರ್ ಇಜ್ಜಿಂಡ ಎದುರುಂತುನಾಕುಲು ಆದುಪ್ಪಂದೆ ನಂಬಿಕೆದಾಕುಲು ಆದುಪ್ಪೊಡು.

7ಒರಿ ಸಭಾದ್ಯಕ್ಷೆ ದೇವೆರೆ ಇಲ್ಲದ ಪಾರುಪತ್ತೆಗಾರೆ ಆದುಲ್ಲೆ. ಅಂಚಾದ್ ಆಯೆ ದೂರುದಾಂತಿನಾಯೆ ಆದುಪ್ಪೊಡು. ಆಯೆ ಛಲತಾಯೆಲಾ ಎದುರು ಕೋಪ ಮಲ್ಪುನಾಯೆಲಾ ಪರ್ದ್ ಲಡಯಿ ಮಲ್ಪುನಾಯೆಲಾ ಪೆಟ್ಟು ಪಾಡುನಾಯೆಲಾ ದುಡ್ಡುದಾಶೆದಾಯೆಲಾ ಆದುಪ್ಪೆರೆ ಬಲ್ಲಿ.

8ಐತ ಪಗತೆಗ್ ತನ ಇಲ್ಲಡ್ ಬಿನ್ನೆರೆನ್ ಸೇರಾವೊನುನಾಯೆ ಆದಿತ್ತ್‌ದ್, ಎಡ್ಡೆಂತಿನೆನ್ ಪ್ರೀತಿ ಮಲ್ಪುನಾಯೆ ಆದುಪ್ಪೊಡು. ಬುದ್ದಿವಂತಿಕೆಡುಪ್ಪುನಾಯೆಲಾ ನೀತಿದಾಯೆಲಾ ಪರಿಶುದ್ಧದಾಯೆಲಾ ಮಿತಿಟುಪ್ಪುನಾಯೆಲಾ ಆದಿತ್ತ್‌ದ್,

9ಆಯೆ ಎಡ್ಡೆ ಬೋಧನೆದ ವಿಚಾರೊಡು ಬೇತೆಕ್ಲೆಗ್ ಉಮೇದ್ ಕೊರಿಯೆರೆಗ್ಲಾ ವಿರೋಧ ಮಲ್ಪುನಾಕುಲೆನ ಬಾಯಿ ಕಟ್ಟಿಯೆರೆಗ್ಲಾ ಬೋಧನೆಗ್ ಸಮಾದುಪ್ಪು ನಂಬಿಕೆದ ಪಾತೆರೊನು ದೃಢಾದ್ ಕೈಕೊನುನಾಯೆಲಾ ಆದುಪ್ಪೊಡು.

10ದಾಯೆಗಂದ್ಂಡ ಐಟ್ಟ್ ಹೆಚ್ಚಿನಾಕುಲು ಸುನ್ನತಿದಾಕುಲು, ಬಜೀ ವ್ಯರ್ಥ ಹರಟೆಲೆಡ್ ಮುರ್ಕುದು ಬೇತೆಕ್ಲೆನ್ ಮೋಸೊಗು ಪಾಡ್ದ್ ಅಧಿಕಾರೊಗು ಎದುರುಂತುನಾಕುಲು ಮಸ್ತ್ ಜನ ಉಲ್ಲೆರ್,

11ಮೊಕುಲು ವಾ ತರೊಟುಲಾ ಲಾಭ ಮಲ್ತೊನೊಡಂದ್‌ದ್ ತಪ್ಪು ಬೋಧನೆನ್ ಮಲ್ತ್‌ದ್ ಇಡೀ ಇಲ್ಲ್‌ನೆ ಕಂಕಣೆ ಪಾಡ್ವೆರ್. ಅಕ್ಲೆನ ಬಾಯಿ ಮುಚ್ಚೊಡು.

12ಕ್ರೇತ್ ದ್ವೀಪದಾಕುಲು ಏಪಲಾ ಸುಳ್ಳುಗಾರೆರ್, ದುಷ್ಟ ಮೃಗೊಲು, ದಡ್ಡೆರ್, ಬಂಜೆಲೆರ್ ಅಂದ್‌ದ್ ಅಕ್ಲೆನ ಉಲಯಿಡೇ ಇತ್ತಿನ ಒರಿ ಪ್ರವಾದಿ ಪನ್ತೆ,

13ಈ ಸಾಕ್ಷಿ ನಿಜನೇ. ಅಂಚಾದ್ ಅಕ್ಲೆನ್ ನಂಬಿಕೆಡ್ ದೃಢ ಮಲ್ಪೆರೆಗಾದ್, ಅಕುಲು ಯೆಹೂದ್ಯೆರೆ ಆಚಾರೊಲೆನ್ಲಾ ಸತ್ಯೊಡ್ದು ದೂರ ಪೋತಿನ ಜನೊಕುಲೆನ ಅಪ್ಪಣೆನ್ಲಾ ಕೇನುನೆನ್ ಬುಡ್ಪಿಲೆಕ್ಕ ಅಕ್ಲೆನ್ ಬಲವಾದ್ ಖಂಡಿಸಾಲ.

15ನಿರ್ಮಲದಾಕುಲೆಗ್ ಮಾತಲಾ ಶುದ್ಧನೇ, ಆಂಡ ಮೈಲೆದಾಕುಲೆಗ್ಲಾ ನಂಬಿಕೆದಾಂತಿನಾಕುಲೆಗ್ಲಾ ಒವುಲಾ ಶುದ್ಧ ಆದುಪ್ಪುಜಿ. ಅಕ್ಲೆ ಮನಸ್‌ಲಾ ಮನಸಾಕ್ಷಿಲಾ ರಡ್ಡ್‌ಲಾ ಮೈಲೆ ಆದುಪ್ಪುಂಡು.

16ಅಂಚಿತ್ತಿನಾಕುಲು ದೇವೆರೆನ್ ತೆರಿದ ಅಂದ್‌ದ್ ಪಂಡೆರ್ಡಲಾ ತನ್ಕುಲೆ ನಡತೆಡ್ ಆಯನ್ ಅರೆಂಜುನಕುಲಾದುಲ್ಲೆರ್. ಅಕುಲು ಅಸಹ್ಯದಾಕುಲುಲಾ ತಗ್ಗಂದಿನಾಕುಲುಲಾ ಒವುಲಾ ಎಡ್ಡೆ ಕೆಲಸೊನು ಮಲ್ಪೆರೆ ಆವಂದಿನಾಕುಲುಲಾ ಆದುಲ್ಲೆರ್.

Jump to: Chapter 2 →