1 Thessalonians 2

Teso 2020

← Chapter 1 Jump to: Chapter 3 →

1Ikanacan ka akanacan kosi, ijenete osi ikulopek ebe akipejokin kosi osi mam arait along'u.

2Ijenete osi kwape esicanere kakirata siong' ko Filipi ering'a siong' kebuno nama kus Tesolonika. Atikere kejaikina epegete lo apolo noi, abu Akuju wok koinak siong' akicasite naka alimokin osi Akiro Nukajokak alomun kama keng'.

3Nu ilipito siong' osi mam keraito aliokonu kere nukarokok, kere de mam siong' kitamakiito aking'ala itwan ipede.

4Konye inerasi siong' ng'in pak kwape ekotore Akuju siong' ejori, naarai anyu nesi ebe ilesikina siong' ainakin Akiro Nukajokak. Mam siong' kitamakiito akitalakar itung'a, konye akitalakar Akuju lo etami nu ikotosi oni.

5Ijenete osi kojokan ebe mam siong' abunete nama kus kejori kaloka akwenare, kere de kabutu siong' ketosomata akiro arapakiite emwane — Akuju nesi ekajenan kosi!

6Mam siong' akotosi akitamao alomun kamaka itung'a, mere kama kus kere alomun kamaka itwan kipede. Karaite ikiyakia ka Yesu abeikinete siong' araun alang'iru kama kus,

7Konye enapakina siong' kokiding' kus kwape idaria toto idwe keng'.

8Kanuka amina kosi osi, alokokina siong' akimor ka osi mere Akiro nukajokak bon alomun kamaka Akuju konye akijar kosi de ka ikulopek. Aminasi siong' osi noi!

9Teni ituuto osi ikanacan ka akanacan, ekipone lo esomata siong' kocani akware ka apaaran tetere emam siong' kiraunete alang'iru kama kus isiarisiarete siong' kama kus Akiro Nukajokak alomun kamaka Akuju.

10Iraito osi lukajenak kosi, atikere Akuju de ejeni ebe ejautene kosi kama kus kalu ejaasi ka akiyuun alae, adolit, komam aronus.

11Ijenete osi ebe abuutu siong' kisomakisi ng'ini itwan kama kus kwape isomanakina papa idwe keng' kelope.

12Abutu siong' kesicatata osi, ketililimoto siong' osi, bobo abutu siong' ketolototo akimaima osi akitoloto kotoma akijar na itiminaarit Akuju, lo iworit osi akimoro ajakaanut keng' kiton akibusesu keng'.

13Bobo ejii atenikina ace na iyalaminikinata siong' Akuju ng'ini pak. Na ainunata siong' osi Akirot ka Akuju, ibutu osi kopuputu ka acamun, mere kwape ka akirot alomun kamaka etung'anan konye erait akirot ka Akuju. Naarai isomae Akuju asoma kotoma kus kalu iyuuto.

14Ikanacan ka akanacan kosi, iboro lu abutu kisomakinosi kama kus esomakina ko okanisai ka Akuju ko Yudea, kamaka itung'a kang'ina kalu araito luka Yesu Kristo. Ibutu osi kodumutu icani lupeng'ulu alomun kamaka itung'a kus kikulopek lu abutu kesi kodumutu kamaka Iyaudin,

15lu abutu kwarata Lokapolon Yesu kiton ikadwarak, ka akisican siong'. Ikote kesi mam kitalakarito Akuju ai! Ikote kesi ededeng' ai kamaka ng'in itwan!

16Abutu kesi kotamakisi akirebokin siong' alimonokin luka akwap akirot na ebeikini alakun kesi. Ng'oli nes ekipone lo erikakinata kesi arokusio kes nu isomata kesi apelem. Kosiali abu anyunyura ka Akuju kuju kes!

17Konye siong' ikanacan ka akanacan, na agitarere siong' kama kus nedio, mere ka awomowomosia kosi, konye kakwaan bon, abu kimuu siong' anyun osi. Abutu siong' katamakisi anyun osi bobo!

18Akotosi siong' abong'un nama kus. Eong' elope abu katamaki abong'un irwana ipu, konye kirebokini Asatanit siong'.

19Anyena amuno kosi kere de anyena ailel kosi, kere de anyena atenikina na ipogatatare siong' koking'aren ka Lokapolon Yesu apaki na ebunia nesi? Mam kerait osi?

20Teni iraito osi atenikina naka epogi kosi kiton ailel!

← Chapter 1 Jump to: Chapter 3 →