bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Teso
/
Teso
/
1 Kings 13
1 Kings 13
Teso
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 14 →
1
Ido koany, konyou etuŋanan loka Edeke ko Yuda kakirot naka EJAKAIT kobu Betel: abwoi Yeroboam eiduny ketem aisupuruun lukisupuru.
2
Kilamak etem kakirot naka EJAKAIT, kotema atiar, “Wu etem, etem, inera kwanata EJAKAIT ebe, ‘Koany, ewuruunio ikoku kokek loka Daudi, ekekiror Yosia; einakini ŋesi kamakon isasedotin luka aiboisio nuiceleleete luisupuruunete lukisupurununo kamakon araun asuban, icweikinete kesi akojo nuka ituŋa kamakon.’”
3
Koinak aanyunet kapaaran kaŋin, ebe, “Na ŋes aanyunet naenera EJAKAIT: koany, eeila etem, ebukor ekurwon loejai tomake.”
4
Kosodi kanen, kepupu ekabaka akirot naka etuŋanan loka Edeke, naelamia ŋesi etem koBetel, kikia Yeroboam akekan kotem, kotema ebe, “Kikam ŋes.” Koono akekan naekiarit adoditor ŋes, komam epedori asukokin.
5
Kocila etem da, kobukor ekurwon kotem, kwape ajaar aanyunet naabu etuŋanan loka Edeke koinak kakirot naka EJAKAIT,
6
Koboŋok ekabaka kotema etuŋanan loka Edeke ebe, “Kinaina cabo asianut naka EJAKAIT Ekonideke, kilipakinai eoŋ, konaleu akakan.” Kiŋaina etuŋanan loka Edeke EJAKAIT, kitanaleunai akekan, kojaun kwape lem sek.
7
Kotema ekabaka etuŋanan loka Edeke atiar, “Kaloto ore, kikwaru, kainakini jo ainakinet.”
8
Kotema etuŋanan loka Edeke ekabaka atiar, “Arai kiinaki ijo eoŋ atutubet naka etogokon, mam eoŋ alosi kaio, idomam anyami atap karaida aimat akipi kaibois kana.
9
Naarai aponi kecorakinitete eoŋ kakirot naka EJAKAIT ebe, ‘Mam inyami atap, karaida aimat akipi, karaida aboŋor korot lokibunio.’’’
10
Kosodi kobono kecerot, mam abu kobono korot kaloabunio Betel,
11
Kiboienenei enabi lomoion koBetel; kobu ediopet kodweke kolimok ŋes aswamisio kere nueswama etuŋanan loka Edeke kapaaran kaŋin koBetel: akiro nuabu ŋesi kolimok ekabaka, ŋun da kolimokis papakee.
12
Kotema papakee kes ebe, “Etoro bo ŋesi orot ali?” Apotu odweke koanyut erot loetori etuŋanan loka Edeke, loabunit koYuda.
13
Kotema odweke atiar, “Kopesikinai lupetan asigiria.” Kosodete kesi apesikin lupetan asigiria: kibwanen ŋesi.
14
Kibwapak etuŋanan loka Edeke, kodum ŋes iboie kotolim kelua: kotema ŋes atiar, “Ŋo ŋes etuŋanan loka Edeke loabuni koYuda? “Kotema atiar, “Eoŋ lo,”
15
Kosodi atemar ŋes atiar, “Kabonosi oreka, konyam atap.”
16
Kotema atiar, “Mam apedori aboŋor kajo, karaida alomar kajo: mam da anyami atap karaida aimat akipi kajo kaibois kana:
17
Naarai aponi kalimokinitete kakirot naka EJAKAIT ebe, ‘Sirikinyam atap, karaida aimat akipi kaŋina, sirikiboŋo da korot loibu kobunio.’’’
18
Kotema ŋes atiar, “Eoŋ da enabi kwape kajo; abu emalaika kalimok eoŋ kakirot naka EJAKAIT ebe, ‘Kinyaku ŋes togokon, konyam atap, komat akipi.’’’ Konye abu kinalai.
19
Kwaŋin kobono kaŋes, konyam atap kotogoke, komat akipi.
20
Kosodi kanen enyamete, kobu akirot naka EJAKAIT mama ejai enabi loabu kinyaku ŋes:
21
Kiworo mama ejai etuŋanan laka Edeke loabunit koYuda ebe, “Inera EJAKAIT kwanata ebe, ‘Naarai ipaliiki ijo akirot naka EJAKAIT, mam irieit aicorakinet naeeoraki EJAKAIT Ekonideke jo.
22
Konye ibonu, inyama atap, imat akipi kaibois nakilimokinio jo ebe, “Sirikinyam atap, sirikimat akipi”; mam akuanakon idaikinio ates naka lukapapaakon.’”
23
Kosodi kanen kedau ŋesi ainyam atap, ka aimat, kopesik lupetan asigiria enabi loenyakuni ŋesi.
24
Napelosi, kiriamakinos kenaruny korot, koar eŋatuny ŋes, kocakak akekuan orot, kobwo asigiria die kaŋes; kobwo da eŋatuny die kakekuan,
25
Ido koany, kitoroto ituŋa, koanyutu akuan korot, eŋatuny da ebwoi die kates; kopotu, koyaut akiro ore neeboieneno enabi ŋol lomoion.
26
Kepupu ŋun enabi loabu kinyaku ŋes korot, kotema atiar, “Ŋes ŋol etuŋanan loka Edeke, loabu kipaliik akirot naka EJAKAIT: kanuka nun eiaiki EJAKAIT ŋes mama ejai eŋatuny, loapoopoo ŋes, aara da, kwape ajaar akirot naka EJAKAIT, naabu kiner kaŋes.”
27
Kolimok odweke ebe, “Kopesikinai lupetan asigiria.” Kopesikis.
28
Kolot, kodum aketes korot, ka asigiria ka eŋatuny ebwoete die kates: mam abu eŋatuny konyamite ates, karaida apoopo asigiria.
29
Kodaku enabi ates naka etuŋanan loka Edeke, kidokok asigiria, kinyaku ore, aibworo ka ainuk ŋes.
30
Kibwaik akuanake atesike elopet; kibworoto ŋes ebe, “Wu okwe onaceka!”
31
Kosodi kanen, kedau ainuk ŋes kotema odweke ebe, “Katwana eoŋ, konukakis eoŋ ates neenukuk etuŋanan loka Edeke; kibwaikis akakojo eiduny kakekoio,
32
Naarai abeit itodolikinio akirot naabu ŋesi kiworo kakirot naka EJAKAIT ilamakini etem koBet-el, ilamakini da itogoi kere luka aiboisio nuiceleleete nuejaas oreria luka Samaria.”
33
Akaulo kanun mam abu Yeroboam kobonu korotoke loerono, konye kiyatak aseun kotuna kere lukitarauni isasedotin luka aiboisio nuiceleleete: ŋol kere loekoto, kotiakuni, tetere ejaas isasedotin luka aiboisio nuiceleleete.
34
Koraun akirot ŋin adiakaret kokek loka Yeroboam, agelar ŋes, ka amudiar ŋes kakwap.
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 14 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
Recommended Reading
Commentary
1 Kings Commentaries
→
Devotional
1 Kings Devotional Guide
→
Get This Bible
Teso Study Bible
→