2 Chronicles 2

Teso

← Chapter 1 Jump to: Chapter 3 →

1Kidenyak do Solomon adukokin ekiror loka EJAKAIT etogo, ka etogo loka ajakanutuke.

2Kotiaku Solomon ituŋa ilukumin akaisakanykaarei aibwok abwokon, ka ituŋa ilukumin akaisakanykauni luajepete koroŋan, ka ilukumin iuni ka akwat akanykape luayaito kes.

3Kijuka Solomon mama ejai Kuram ekabaka loka Turo ebe, “Kwape kikonakinia ijo Daudi papaka, kijukak nes iresia adukokin etogo aiboio kotoma, kikonak eoŋ da kwaŋin.

4Koany, adukokini eoŋ ekiror laka EJAKAIT Ekadeke etogo, atiakun kanuke, aicweenen kakonyeneke lukisupurununo lueuru maa, kanuka emugati lokaitodikin lotir, kanuka ainakineta nuicweio tupuruc ka eboŋ, kasabaton, ka napilamununei elap, kopucin da lueseunitai luka EJAKAIT Edekekosi. Erai ŋin aicorakinet naka ikar kere koIsirael.

5Epol etogo loaduki eoŋ: naarai epol Ekosideke adepar idekesio kere,

6Konye iŋai epedori adukokin ŋes etogo, naarai mam akuj, ka akuj naka akuj epedori ailosikin ŋes? Aso iŋai bo eoŋ, adukokin ŋes etogo, dimarai aisupuruun lueuru maa kakonyeneke?

7Aso do kijukakinai eoŋ etuŋanan loepiriana aswam kesabu, kepuesa, kaisinin, kasua, ka lomuge, ka Iokareŋan, ka lobululu, loepiriana aigir iponesio kere luigirio, ajaun kituŋa luepiriaka luejaas keoŋ ko Yuda ka Yerusalem, luabu Daudi papaka kodumunite.

8Kijukakinai da ikito luka eres, ka ikito luka eberos, ka ikito lukajokak koLebanon: naarai ajeni ebe epiriaka ikonikejaanakinak aijep ikito koLebanon; ido koany, ejaununos ikakejaanakinak kaikonikejaanakinak,

9aitemonokin akito nuipu noi: naarai etogo loakoto aiduk eraun loepol lokaumokin.

10Ido koany, ainakini ikonikejaanakinak, luejepete ikito, aitemisio alukumin akaisaarei nuka alos nuecomom, ka aitemisio alukumin akaisaarei nuka esairi, ka akaalakanya alukumin akaisaarei nuka ebino, ka akaalakanya alukumin akaisaarei nuka akinyet.”

11Kosodi Kuram ekabaka loka Turo aboŋokin kaiwadika nuejukakinit Solomon ebe, “Naarai emina EJAKAIT iketuŋa, ŋes kitaraunia jo ekabakakec.”

12Ido kobala Kuram ebe, “Kituritete EJAKAIT, Edeke loka Isirael, lokesubi akuj ka akwap, loabu koinak Daudi ekabaka okoku lokacoa, loejaas kacobeu ka ajenun, loekot adukokin EJAKAIT etogo, ka etogo loka ajakanutuke.

13“Aso do kejukak etuŋanan loepiriana, loejaas kajenun loka Kuram papaka,

14Okoku loka aberu naka adwe nuka Dan, kerai papake etuŋanan loka Turo, epiriana aswam kesabu, ka epuesa, ka aisinin, ka asua, ka amor, kakito, ka lomuge, ka lobululu, ka ebaputa loejok, ka Lokareŋan: bobo da aigir epone kere loigirio: ka apwakun aputo kere: kojaun ŋesi aibois kaikonituŋa luepiriaka, ka ituŋa luepiriaka luka ejakaitika Daudi papakon.

15Aso do, luabu ekajakait kiner, akima ka esairi, ka akinyet ka ebino, kijukak ikekejaanakinak:

16kijepi isio ikito koLebanon, kotiai loipuda: kiyaŋaun mamakon kikaleleos kaŋolol kiton Yopa; ido da iyanaari Yerusalem,”

17Kimar Solomon imo kere lukejaas akwap naka Isirael, kwape ajaar aimar naabu Daudi papake kimar kes; aponi kodumunai ilukumin akwatat ka akaisakany ka luuni ka akwat akanykape,

18Kibwaik ilukumin akaisakanykaarei kakes aibwok abwokon, ka ilukumin akaisakanykauni luajepete koroŋan, ka ilukumin iuni ka akwat akanykape luayaito ituŋa lueswamaete aswam.

← Chapter 1 Jump to: Chapter 3 →