2 John 1

Teso

Jump to:

1Eoŋ ekimat ewadikakini ajakait naseuna ka idweke, luamina kabeit, ido mere eoŋ bon konye ŋul kere da luejenete abeit,

2kanuka abeit naesalit tomawok, ido ejaun nepepe kaoni ikar kere:

3Asianut, ka aitim, ka ainapakin ejaunete kaoni kama ka Edeke Papa, ido kama ka Yesu Kristo Okoku loka Papa, toma abeit ka amin.

4Abu keyalamikin noi naarai abu kadum ice kodwekon elosenenete kotoma abeit, kwape kidumunia aicorakinet kama ka Papa.

5Ido kwana ajakait, kelipi jo, mere bala kewadikakini jo aicorakinet nakitetet, konye ŋin nakijaatar ameun kageunet, kaminanaros bonik ka bonik.

6Na da ŋes amin, kalosenenete kwape ejaatar aicorakinetake; na ŋes aicorakinet, kwape ipupunitotor yesi ameun kageunet, ebe, kolosenenete kotoma amin.

7Naarai alomasi ikeŋalak luipu toma akwapin, lumam elimorete abunore naka Yesu Kristo kotoma akuan; ŋol ŋes ekeŋalan ido lokasurup loka Kristo.

8Kocoito kinyeis atwaniar nukiswamat, konye kijaut eropit loitekoro.

9Ŋin kere yenelitori komam esalit toma aisisianakin naka Kristo, emamei ŋin Edeke; yenesalit toma aisisianakin, ejai ŋin Papa ka Okoku da.

10Arai ebuni ituŋanan mamakus, komam eyaunit aisisianakin ŋin, sirikisukunyikis ŋes togo, karaida ayogan ŋes;

11naarai yeniyogai ŋes emorete kaŋes akeswamisio nukaronok.

12Ejaas nuipu aiwadikakin yes, konye mam akoto aitwasam apapula ka ebwino, konye amun abunore mamakus, kenerata kaituke, kosodi kodol awokokiyalama.

13Kiyogaete jo idwe luka inacikon naseuna.

Jump to: