Amos 9

Teso

← Chapter 8 Jump to:

1Abu kaany EJAKAIT ebwoi eiduny ketem: kotema ŋesi atiar, “Kinom acuneta, tetere ilokulokunos apeteta: Kobilibil kes kakwesikee kere; Aari yenegoli kakesi kekilen; Emameun idiokakesi yenekeri, Emameun da idiokakesi yenekui.

2“Karaida ebokete adolor Okatwak, Elemuni akakan kes kaŋina; Karaida edokarete kiton akuj, Etodokuni kes kaŋina da.

3Karaida eŋopete kaidi naka Karumel, Amoi alemun kes kaŋina da; Karaida ibwaio kes kakonyeneka kwap toma aŋolol, Ecorakini emun kaŋina, ekonyi kes,

4Karaida ijoreorio kakonyen nuka lukasurupokee, Ecorakini ekileŋ kaŋina, eari kes; Aseseni kes kakakonye ayaun aronis kwabo mere aiokis.”

5Naarai EJAKAIT, Edeke loka aioresio, Ŋes ŋol loetirori akwap ecalari, Ibworosi ŋul kere luibojete kocoma; Enyouni cut kwape Ecor; Eboŋori bobo, kwape Ecor loko Misiri.

6Ŋes ŋol loedukokini agolaike akuj, Etieat apetetake kakwap; Ŋol loenyarauni akipi nuka aŋolol, Ebukokini kes akwap, EJAKAIT ŋes ekekiror.

7Ebala EJAKAIT ebe, “Yes idwe luka Isirael, Mam iraas kamakaŋ kwape Itiopian? Mam kereka ketolomuni Isirael kakwap nako Misiri, Ka Ipilisitian anyoun koKaputor, Ka Isurian da koKir?

8Koany, esesenete akonye nuka Ejakait EDEKE ajakanut naerono, Amudiari eoŋ ŋes kakwap. Konye ebala EJAKAIT ebe, Dimarai mam amudiari eut ekek loka Yakob.”

9“Naarai koany, eeorakini, Ido ekekei ekek loka Isirael kotoma atekerin kere, Kwape ekekeia akima kotoma aikekeet, Konye mam idiokimait edoi kwap.

10Etwakete ikadiakanarak kere luka ikatuŋa kekilen, Luebalas ebe, ‘Mam aronis kidolikini, karaida airiamakin kaoni.’

11“Kapaaran kaŋin etonyouni ewema loka Daudi loebiroro, Epuci aciletake; Etonyouni da aaponoruke, Eteteuni kwape kapaarasia nukolono.

12Tetere irumete kesi aatoŋot naka Edom, Ka atekerin kere nuemaikinio ekakiror.” Ebala kwaŋin EJAKAIT loiswamai ŋun.

13Ebala EJAKAIT ebe, “Koany, epote apaarasia Nuedolokinio ekakorion ekasakan, Ka ŋol loipudapudai emusabibu ŋol loeyei ikinyom; Idonete ironan ebino loewiny, Eleleete iukon kere.

14Enyakuni bobo aijoreorio naka ikatuŋa Isirael, Edukete ireria lueswapito, iboikinos toma; Iraete ke si amanat nuka emusabibu, Emasete da ebinoke; Ekoriete imanikoria, enyamete da araitokee.”

15Ebala EJAKAIT Ekonideke ebe, “Eraikini eoŋ kes akwapukee, Mam bobo erutunio kakwapukee naainakinit kes.”

← Chapter 8 Jump to: