Haggai 2

Teso

← Chapter 1 Jump to:

1Kokaru lokiareit loka ekabaka Daŋo, kolap lokikanyetekaarei, kapaaran naka akaisaarei kanadjopet naka elap, kobu akirot naka EJAKAIT mama ejai Kagai enabi ebe,

2“Kolimok Serubabel okoku loka Sealutiel, ekayaiton loka Yuda, ka Yosua okoku loka Yekosadak, esasedoti lopeti, ka luedeuna kotuŋa ebe,

3‘Iŋai bo esalit kayesi loabu koanyunite etogo lo kaibusesuke nasek? Etakani kwana biai kamakus? Mere esubit kakonyenekus bala ibore yenitai?

4Konye ebala EJAKAIT ebe, Kogogonjor, ijo Serubabel; kogogonjor, ijo Yosua, okoku loka Yekosadak, esasedoti lopeti; kogogonjoros, yes ituŋa kere luka akwap; ebala EJAKAIT ebe, Kiswamata: naarai ebala EJAKAIT loka ajoresjo ebe, Ajai eoŋ kayes,

5kwape ajaar akirot naabu ketutukik yes nailomuniata koMisiri, iboienenei ekamoyo kotomakus: sirikikuriakaros.

6Naarai inera EJAKAIT loka ajoresjo kwanata ebe: Irwan atipet bobo, apak naedit, eianakini akuj, ka akwap, ka aŋolol, ka akwap naconit;

7ejaŋiiani atekerin, epote iboro luimielas atekerin kere: ebala EJAKAIT loka ajoresjo ebe, Elelebi aibuses togo lo.

8Ebala EJAKAIT loka ajoresjo ebe, Erai epuesa ekaij, esabu da ekaŋ.

9Ebala EJAKAIT loka ajoresjo ebe, Aibuses naka etogo kalo nakoinaren itelekari nasek: Ebala EJAKAIT loka ajoresjo ebe, Esinapikini aibois na,”

10Kapaaran naka akaisaarei ka nuoŋon kolap lokikanyetekaonon, kokaru lokiareit loka Daŋo, kobu akirot naka EJAKAIT mama ejai Kagai enabi ebe,

11“Inera EJAKAIT loka ajoresjo kwanata ebe: Kinit cani isasedotin nuka ikisila ebe,

12‘Arai kitiŋ ituŋanan akiriŋ nakalaunan katwele naka egoeke, kotiroria emugati, arai atap, arai ebino, arai akinyet, arai akiriŋ kere katweleke, araun kereka ŋin yenikalaunan?’” Kobonokis isasedotin ebe, “Mam.”

13Kosodi Kagai atemar atiar, “Arai ketiro yenimam elai kanuka akuan nakatwan idjopet koboro katjul eraun kereka nin yenimam elai?” Kobonokis isasedotin atiar, “Eraun yenimam elai.”

14Kosodi Kagai aboŋokin ebe, “Ebala EJAKAIT ebe, Ikote nen ituŋa lu, ikoni da nen ateker na kakonyeneka; ikoni nen ŋiniswam naka akaninikee; nin yeneinakinete kaŋina erai yenimam elai.

15Aso do, kenainait, koomoomata nuejaunete amear kapaaran kana ape. Eroko idokokino amoru kuju amoru koyekalu loka EJAKAIT: ipotu koiaas biai?

16Ameun kapaki kaŋin kere, naabunjo ituŋanan atukit naka aitemisjo akaisaarei, emwaasi do atomon bon; naabunjo ituŋanan acues naka ebino aokun amotii akaisakany, emwaasi do akaisaarei bon.

17Ebala EJAKAIT ebe, Abu kadany yes kaitukub, ka airouroun, ka akaka da kotoma aswamisjo kere nuka akaninikus; konye mam ipotu kibeleunos mama ajai.

18Kenainait, koomoomata amear kapaaran kana ape, amear kapaaran naka akaisaarei ka nuoŋon naka elap Jokikanyetekaoŋon. Amear kapaaran naasipokinere apetetait naka eyekalu loka EJAKAIT, koomoomata:

19eroko kereka ikinyom ejaas odula? Eroko teni mam erai emusabibu, ka etini, ka ekamamaga ka eseituni? Kesirereŋi yes ameari lolo,”

20Kobu akirot naka EJAKAIT irwan nakiareit mama ejai Kagai kapaaran naka akaisaarei ka nuoŋon naka elap ebe,

21“Kolimok Serubabel, ekayaiton loka Yuda ebe, Eianiiani aku; ka akwapin:

22abuburiari eicoloŋ loka ajakanuto; amudiari agogoŋ naka ajakanuto nuka atekerin; abuburiari agalin, ka nul da luibojete kotomakec; ibiroros abalasin ka lukebwanenokokee, ninitunanan kekileij loka onaceke.

23Ebala EJAKAIT loka ajoresjo ebe, Kapaaran kaŋin kayanaari jo, Serubabel ebulesitika, okoku loka Sealutiel; Ebala EJAKAIT ebe, Ketuluori jo egilut lokipucet, Ebala EJAKAIT loka ajoresjo ebe, Naarai kaseu jo.”

← Chapter 1 Jump to: