Joel 3

Teso

← Chapter 2 Jump to:

1“Naarai, koany, kapaarasia kakwa, kapak kaya da, naenyakunia luejoreoritai luka Yuda ka Yerusalem,

2atukonokini atekerin kere, ayauni kes aditot naka Yekosapat; apurokini kakes kanuka ikatuŋa ka akairumet Isirael, luapotu kesi kisiarakis katekerin, ka akorokor da akakwap.

3Apotu kilamilamata eroet kanuka ikatuŋa: ainakis esapat itia naadote, agwelasi apese itia ajon, tetere kes emasete.

4“Eebo, inyoika kereka yesi kaneajai eoŋ? Ŋo Turo, ka Sidon, ka akwapin kere nuka Pilisitia? Kitacakinete kereka eoŋ eropit? Ido arai kitaeakinete eoŋ, kesunyak eoŋ ainyakakin atipet akwesikus nuipotu kiswamata,

5Naarai ipotu koyanaasi epuesaka, ka esabuka, kodakasi iboroka luejok luisiyalamikinito abilaikus.

6Ipotu kogwelasi da idwe luka Yuda ka idwe luka Yerusalem mama ejaas Iyonanin, tetere eyaŋaarete kes kama elwana koikorunokec.

7Koany, esidiki kes aitonyoun kaibois naipotu kogwelas kes, enyakakini nuipotu kiswamata akwesikus,

8Agwelari ikusidwe lusap ka lupesur akanin nuka idwe luka Yuda, kes da egwelarete kes mama ejaas ituŋa luka Seba, ateker naelwana: naarai ener EJAKAIT.”

9Kolimonokis ŋun katekerin; Kokapakinos ejie; Kisidikis ituŋa lukirigin; Kikunyutu ikajiok kere, kopotu.

10Kotatata imelekesikus aituluor ikileŋa, Ka ieilikikinikus lukidimet aituluor akwaras: Kolimok loenonok ebe, “Agogoŋ eoŋ.”

11Kisunyito yesi, kopotu, Yes atekerin kere nuirimorito, Kotukonokinos: Kitodok ikagogoŋokokon, wu EJAKAIT.

12Konyout atekerin, Kopotu aditot naka Yekosapat; Naarai eboikin kanen Atubokin atekerin kere nuirimorito.

13Kodumutu ecilikiki, naarai akono aidweny: Kopotu kipudapudata, naarai ileleba aicues. Ilapanaros akaalakanya, Naarai epol aronisikec.

14Ikodeta, ikodeta, kotoma aditot naka etube! Naarai eapiei apaaran naka EJAKAIT, Kaditot naka etube.

15Amutonor akoloŋ ka elap, Enyakasi da aacer aicakec.

16Egatuni EJAJCAIT koSion, Elimuni ekeporoto koYerusalem; Ŋaniiaŋun akuj ka akwap, Konye eraun EJAKAIT aŋopis naka ituŋake, Ka abwas da mama ejaas idwe luka Isirael.

17“Kwaŋin iienunete yesi ebe arai eoŋ EJAKAIT Ekusideke, Loeboie koSion emoruka lokalaunan. Kosodi Yerusalem araun Iokalaunan, Mam bobo imo itorete tomake.

18“Kosodi kanen kapaaran kaya, Idonete ironan ebino loewiny, Eleleete iukon akile, Eleleete da aguuruto kere nuka Yuda akipi; Elomuni atan kotogo loka EJAKAIT, Naisinauni aditot naka Sitim.

19“Esilior Misiri, Eraun Edom da amodiŋ naesil, Kanuka nukadeden nueswamakinitai idwe luka Yuda, Naarai abukosi aokot numam aronis kakwapukec.

20Konye ibojenenei Yuda ikar kere, Ka Yerusalem da kiton aturio kere.

21Etesegi eoŋ aokotokee numam etesegaarir, Naarai iboie EJAKAIT ko Sion.”

← Chapter 2 Jump to: