Jude 1

Teso

Jump to:

1Yuda, ebulesit loka Yesu Kristo, onace loka Yakob, Mama ejaas luenyaritai, luminan toma Edeke Papa, luericakinitai Yesu Kristo:

2Kiyatanakin aitim mamakus, ka ainapakin, ka amin da.

3Luminan, eswamai kadunyanut kere aiwadikakin yes nuka aitajariowok nakimori, ketiŋaikinitai aiwadikakin yes kecor yes aut noi kanuka aiyuun naainakinitai lukalaunak irwan atipet bon.

4Naarai alomut icetuŋa kaiyeiyea, lukiwadikatai sek alomar otube lo, ituŋa lumam eyoŋito Edeke, luilocete asianut naka Edekewok araun abenyanut, eŋerete da Ekapoloniwok ediopet bon Ejakait Yesu Kristo.

5Konye akoto aisiitun yes karaida ijenut kere atipet bon, ebe kedau Ejakait aitajar ituŋa kakwap nako Misiri, akaulo kaŋun abu komudialumam eyuunito.

6Imalaikan da lumam apotu koricata ayaitekee, konye kinyeis akeceibois kikulepek, abu ŋesi kidar korikoi lumam edaunos kamuton kiton atubokinio naka apaaran nakapolon.

7Kwape ka Sodom ka Gomora, ka ireria da luerimorito kes, luapotu koluŋakinos adoteanut kopone loka ŋul, kotupata acekuan, ibwaikinitai araut aanyunet, iticanio kakim naka ikar kere.

8Konye kopone kaŋol ituŋa lu da kairujasiakee emunaarete akuan, Kerete ayaio, emoromoroete da lukaibuses.

9Konye nakeŋolopatar Mikael emalaika lokapolon kaSatan, epegas kanuka akuan naka Musa, mam abu koneikin aosan ŋes katubokinio nakamoromor, konye kobala ebe, “Kitoron Ejakait jo,”

10Konye ituŋa lu emoromoroete ŋun kere numam ejenete, konye ŋun nuejenete kaurunet, kwape itiaŋ luemamei acoa, kaŋun emudiario kes.

11Itukwi kes! Naarai elosete korot loka Kain, kokubokinos kapaar naka Balaam, kanuka eropit komudiarai kopeget loka Kora.

12Eraas lu amor numam etakanete kopueinokus luka aminanar, emorete kayes komam ekuriaka, icokiete bonik; idouon luemameete akipi luekutarete ikwamin; ikito luka akamu luemameete araito, luatwaka irwan aarei, luarutuno;

13akailan nuededeŋ nuka aŋolol, nuekuete ekuetete, lokileieikee; I aacer nuepaarete nuidarakinitai amuton nairiono cucucuc kiton ikar kere.

14Konye nuka ŋul abu Enok da, lokikanyetekaarei anyoun ka Adam, kodwarakinite ebe, “Koany, ebunit Ejakait nepepe ka lukalaunakake ilukumin itomon,

15aiswamakin kere etube, ka aitoron da kere lumam eyoŋito Edeke kanuka aswamisiokec kere nuka amamus ayoŋit Edeke, ido kanuka akiro kere nueninik nuenerata ikadiakanarak lumam eyoŋito Edeke asurokinia ŋes.”

16Eraas lu ikerurumak, ikaŋuurianak, luelosete kwape ejaar aiŋobelekec, ineras da aitukekec akiro nukasoga, emaete ituŋa adumunia ameda.

17Konye yes luminan, kiitut akiro nukolo kinerata ikiyakia luka Ejakaitiwok Yesu Kristo;

18apotu kolimokis yes ebe, “Kapak nakawasia ejaunete ikesekelok, luelosete kwape ejaar aiŋobelekec nakamamus ayoŋit Edeke.”

19Eraas lu lueyaunete atiakatiak, luka aijar kana, luemamei Emoyo.

20Konye yes, luminan, kodukonoros kaiyuunikus nakalaunan noi, kilipenenete kOmoyo Lokalaunan,

21kidaras bonik toma amin naka Edeke; kidareut aitim naka Ejakaitiwok Yesu Kristo kiton aijar naka ikar kere.

22Kitimoto ice, luebuonokinos;

23kitajarata ice, kouruput kotoma akim; kitimoto ice kakurian, kolaata anapito da naejai elos loka akuan.

24Mama ejai ŋol loepedori aidar yes kinyeis aiguikin, kaisibwo yes kakonyen nuka aibusesuke komamei aitoronet, kaiyalama naepol noi,

25mama ejai Edeke ediopet bon, Eketajaraniwok kanuka Yesu Kristo Ejakaitiwok, kojai aibuses, ka apedor, ka ailerit, ka apolou da, ageikin ikar kere, tinenikwana da, ido kiton ikar kere. Amen.

Jump to:

Recommended Reading

Commentary Jude Commentaries → Devotional Jude Devotional Guide → Get This Bible Teso Study Bible →