Judges 5

Teso

← Chapter 4 Jump to: Chapter 6 →

1Kosodete Debora ka Barak okoku loka Abinoam ayoore kapaaran kaŋin ebe,

2“Naarai apotu ikeŋarenok kinarenikis Isirael, Naarai apotu ituŋa kolunakinos ketau kaloejok, Kituroto yesi EJAKAIT!

3“Kopuputu, yes ikabakan; kitoikisi aki, yes ikapolok; Ayeikini eoŋ EJAKAIT: Ayei aiturit EJAKAIT, Edeke loka Isirael.

4“EJAKAIT, nailosio koSeir, Nailomunia komanikor loka Edom, Abu akwap komaran, kodou akuj da, Eebo, apotu idouon kitodoutu akipi,

5Apotu ironan koleleata kakonyen nuka EJAKAIT, Ijo da Sinai kakonyen nuka EJAKAIT, Edeke loka Isirael.

6“Kapaarasia nuka Samugar okoku loka Anat, Kapaarasia nuka Yael, amameete ituŋa korotin lukapolok, Etorito ikalotok orotin luekudukudo.

7Apotu ikayaitok konanata koIsirael, apotu konan ata, Aitodol naanyounio eoŋ Debora, Naanyounio eoŋ toto kotoma Isirael.

8Apotu koseut idekesio lukitetet; Kosodi ejie ajaun orutei: Atakanu kereka ebuku arai akwara Kaneajaas ilukumin akaisaoŋon luka Isirael?

9Eomit ekatau nuka ikayaitok luka Isirael, Luapotu kiiaikinos ketau loejok kotuna: Kituroto yesi EJAKAIT.

10“Kinerata ŋun, yes luibwanenito asigirian nul-akwanak, Yes luibojete komukekan luejok noi, Ka yes da luilosete korot.

11Itatamete aswamisio nuedolito nuka EJAKAIT, Aswamisio nuedolito nuka ayaiteke kotoma Isirael, Kolwana eeelet loka ikagumak, kaiboisio nuewokere akipi. Kosodete ituŋa luka EJAKAIT alosit orutei.

12“Kokweny, kokweny, Debora; Kokweny, kokweny, koye ekosio! Konyou, Barak, kijoreo lukijoreunokon, Ŋo okoku loka Abinoam.

13Kosodete luedeuna luka ikapolok ka ituŋa aiiesun; Abu EJAKAIT kijesun kanukan asurokin ikagogoŋok,

14Kopotu kotoma Epuraim ŋul luejai aliasitikee toma Amalek; Kitupito jo, Benyamin; kotunakon; Kopotu ikayaitok kotoma Makir, Ka nul da luetinito ebela loka ejakait kotoma Sebulun.

15Kojaas ikapolok luka Isakar kaDebora; Kwape ajaar Isakar, ajai Barak kwaŋin; Komotaros aditot kakejeke, Kalelesia nuka Reuben Abu kojaun ainerun naepol naka itauon.

16Kanukinyo ibu kiboikinor anukia nuka amerekekin, Aipup alamarun nuekutakinio isipanin? Kalelesia nuka Reuben Abu kojaun ainerun naepol naka itauon.

17Abu Gilead kiboikin okekwa loka Yorodan: Dan da, kanukinyo asalakinia ŋesi ameerin? Kiboikin Aser kopala kariri naka aŋolol, Kiboikin ociletake.

18Arai Sebulun etuŋat loabu kijaik aijarakee kiton atwanare, Naputali da, kaiboisio nuiceleleete nuka ais.

19“Kopotu ikabakan kojioto; Kosodete ikabakan luka Kanaan ejie, koTaanak kariri naka akipi nuka Megido: Mam apotu kodumut ameda naka apesan.

20Apotu lukokuju kojioto, Apotu aacer kitijioto Sisera kotoma alositokee.

21Abu ecor Kison kolelea kes cut, Ecor ŋol lokolosek, ecor Kison. Wu ekatau, kolot kagogoŋ!

22“Kosodete imageger luka ibalasin adamac Kanuka atakar, atakar naka ikagogonokokec.

23Abala emalaika loka EJAKAIT ebe, Kikenoto yesi Meros, Kikenoto yesi noi luibojete kotomake; Naarai mam apotu koponito aiŋarakin EJAKAIT, Aiŋarakin EJAKAIT aitiji ikagogoŋok.

24“Tsirerenio Yael adepar aŋor, Aberu naka Keber Ekenit, Isirerenio ŋes adepar aŋor kotoma oweman.

25Abu kilip ŋes akipi, koinak akile; Abu koinu ŋes akinyet katuba naejok,

26Abu kitin eloit kakekan, Kitin da anyul naka ekeswaman kakanike nakoteten; Kibubuk Sisera kanyulike, kibubuk akonke, Eebo, abu kicum aipelor ereeteke.

27Abu kokukum kakejeke, kibiror, koper: Abu kokukum kakejeke, kibiror: Neakukumio, nepenen ebirokin kotwana.

28“Abu ŋin kireik kadirisa, komony, Komony toto naka Sisera kadirisa ebe, ‘Kanukinyo eyapia akegali abunore? Kanukinyo erumorotor akokoron nuka agalike?’

29Apotu akenor nukacoa kobonokis ŋes, Eebo, abu ŋesi alopet Koboŋok ebe,

30Mam kes edumunito lunatan, mam kes ekorokoroto lunatan? Ŋinitunanan apese, arai bo apesur aarei; Sisera lunatan luka igoen luiculatai, Lunatan luka igoen luiculatai luesonyitai, Luka igoen luiculatai luesonyitai iwaitin kere, komurisina luka lunatan?’

31“Wu EJAKAIT kooliosi do lukasurupokon kere kwaŋin! Konye kosubito nul lueminasi ŋes bala akoloŋ naelomaria kotoma agogoŋuke.” Kiyen akwap ikar akaisaoŋon.

← Chapter 4 Jump to: Chapter 6 →