Nahum 1

Teso

Jump to: Chapter 2 →

1Abwokon naka Ninebe, Eitabo loka aitapoet naka Nakum Elikosit,

2Erai EJAKAIT Edeke lokekolo, inyaŋi da; Inyaŋi EJAKAIT, ileleba anyunyura; Inyaŋi EJAKAIT kama ka lukediŋeteke, Elilikini lukasurupoke,

3Iyapi EJAKAIT anyunyurikin, eili ili da akepedor, Lomam itojoki luegwaunito akiro. Ejai EJAKAIT ekerot otapipirio, kokwamin da, Idouon kes adae nuka akeieke,

4Iretakini ŋesi aŋolol, itooni, Itooni da icorin kere: Enonokiar Basan, ka Karumel, Enonokiar da aturot naka Lebanon.

5Emaranete ironan kakonyeneke, Ecalaros iukon; Ebuburiar akwap kakonyeneke, Eebo, akwapin, ka luibojete kotoma kere.

6Iŋai bo epedori abwoikin aisiopoke? Iŋai da epedori atitiŋikin adedeŋ naka anyunyurake? Ebukunio anyunyurake kwape akim, Etiyatiyai ŋesi imor.

7Ejok EJAKAIT, abwas kapaaran naka ican; Ejeŋi ŋesi nul luemunosi ŋes.

8Konye itanani eut aiboisike kakalele naelapara, Erukoria lukasurupoke kiton amuton.

9Anyoika nuitetemonorete kaomisio aluikin EJAKAIT? Itanani ŋesi cut: Mam irucakini bobo aitican.

10Naarai karaida esubito bala ikukwa luikodikodito, Epalala kesi da kanumatanakec, Idoporio kes cut kwape ariaŋ naconit de.

11Aiomu idiopet kamakon yenitetemor aronis aluikin EJAKAIT, Yenineruni nukaronok.

12Inera EJAKAIT kwanata ebe: “Karaida egogoŋ kes cut, ipu da, Ejepio kes, eoliorete. Karaida abu kareite jo, Mam bobo karei joo

13Kwana abili aiookotoke kamakon, Aaŋololedi irikoikon.”

14Abu EJAKAIT kicorak nukon ebe: “Mam bobo eyeio ekonikiror; Kotogo loka idekesiokon Ajepi aput naegerer, ka aput da naecalara. Etemokini atesikon; Naarai isiliana ijo.”

15Koany, akejen nuka aŋololol kaloeyauni akiro nukajokak, Loelimonokini ainapakin koronan! Kidar ipucinokon, ijo Yuda, Kitodol aiyaposiokon: Naarai mam ikaronon itori bobo tomakon; Egelario eut.

Jump to: Chapter 2 →