Psalms 119

Teso

← Chapter 118 Jump to: Chapter 120 →

1Isirerenitoi ŋul luedolito cut korot, Luelosete kokisil loka EJAKAIT.

2Isirereniroi ŋul luericito aiteienunetake, Luemoete ŋes kekecetau kere.

3Eebo, mam ŋul iswamaete numam adolit, Elosenenete korotinike.

4Ibu kicorak sio aituutooretakon, Tetere kidunyakini airic kes.

5Okwe karai kicasito ikarotin: Tiaricenenei ikonikisila!

6Ŋes do mam kerumiata ileic Naacamunia akoniicorakineta kere.

7Kemalaenenei jo ketau loitenara, Naesisiaunia itubesiakon luedolito.

8Aricenenei ikonikisila: Okwe sirikiijal cut!

9Ikonakini ai ekatumunan italauni ekerot? Kocoite kwape eiaar akonikirot.

10Kamo eoŋ jo kekatau kere: Okwe, kenyek apaar kaicorakinetakon.

11Enadak eoŋ akonikirot otauka, Kenye adiakar kamakon.

12Kituritete jo, wu EJAKAIT: Kisisianakinai eoŋ ikonikisila,

13Alimonok eoŋ kakanaiep Itubesia kere luka aitukukon.

14Alelakinit eoŋ erot loka aiteienunetakon, Kwape alelakinitor abar kere.

15Aomoomoenenei aituutooretakon, Ido acamunit ikonirotin.

16Esiyalamikinit ikonikisila: Mam kemurwokini akonikirot,

17Kikonak ekonibulesit nukajokak, tetere ajari; Kasodi karic akonikirot.

18Kitikweny akakonye, Kaany nukaumokin kokisilakon.

19Arai eoŋ ekeboiororon kakwap: Sirikibwa akoniicorakineta kamakaŋ,

20Emwokolikin ekatau kanuka eimiel noi Itubesiakon apakio kere.

21Ibu kitoron luiturokina: Kikenoi luepaarete kaieorakinetakon.

22Kolema amoromoro ka amwanio kamakaŋ, Naarai aric eoŋ aitejenunetakon.

23Apotu ikapolok da kiboikinos kinerasi aluikin eoŋ: Konye abu ekonibulesit koomoomoi ikisilakon.

24Esiyalamikinit eoŋ aitejenunetakon, Eraas da iinerunetaka.

25Eminaikin ekatau apua: Kitaiarunai kwape ejaar akonikirot.

26Alimo ikarotin, ijo da ibu Koboŋok: Kisisianakinai ikisilakon.

27Kiteienunai erot loka aituutooretakon: Kasodi konyet aomoom aswamisiokon nukaumokin.

28Epirisiar ekatau kanuka alaŋir: Kitogogoŋoi kwape ejaar akonikirot.

29Kolema erot loka aiŋal kamakaŋ, Ido koinakinai ikonikisila kasianut.

30Aseu eoŋ erot loka amunonut: Ebwaik itubesiakon akonyeneka.

31Eminaikin eoŋ aiteienunetakon: Wu EJAKAIT, sirikiisurum ileic.

32Akerianari orot loka aicorakinetakon, Naitalalaaria ekatau.

33Wu EJAKAIT, kisisianakinai erot loka ikisilakon: Kasodi aricit aitodol awasia.

34Ae acoa, kasodi aidar ekonikisil: Eebo, arici eoŋ kekatau kere.

35Kitotoroi eoŋ osokot loka aicorakinetakon; Naarai esiyalamikinit eoŋ kes.

36Kogoŋak ekatau aitejenunetakon, Konye mere airananut.

37Kibelok akakonye kaite aamameak, Kitaiarai da korotinikon.

38Kitogogonik ekonibulesit akonikirot, Naerai naka ayoŋite jo,

39Kibelok akamorosit naketukuriani; Naarai ejokuka itubesiakon.

40Koany, emiela eoŋ airuutooretakon, Kitajarai kotoma adolitekon.

41Wu EJAKAIT, kadolokis eoŋ aitimesiakon, Aitaiarakon kwape ejaar akonikirot.

42Kwaŋin adumuni eoŋ aboŋokinet naabonokini yenikamoromoroi; Naarai amuno eoŋ akonikirot.

43Sirikilema akirot naka abeit kaitukuka: Naarai amunokin itubesiakon.

44Kasodi adunyakin airic ikonikisila, Ikar ka ikar.

45Kalakakin kalositeka; Naarai amoot aituutooretakon.

46Eneri da nuka aiteienunetakon kakonyen nuka ikabakan, Mam kerumete ileic.

47Esiyalamikini eoŋ aicorakinetakon, Nuamina.

48Ariori akakan mama ejaas aicorakinetakon, nuamina; Aomoomoi da nuka ikisilakon.

49Kiitu akirot kama ejai ekonibulesit, Naarai ibu kisumun eoŋ.

50Na ŋes alakaraka kotoma aiticanioka., Naarai akonikirot ketaiar eoŋ,

51Kesekeloto eoŋ noi luisosoloko: Konye mam apaarit kokisilakon.

52Eitu itubesiakon lukolo jo, wu EJAKAIT Alakara da.

53Kerum eoŋ anyunyura naepol, Kanuka ikaronok lueialete ikonikisila.

54Araunos ikisilakon ikakososinei Kotojo loka ejobiraneka.

55Wu EJAKAIT, eitu ekonikiror kuare, Arie ikonikisila.

56Ejai eoŋ ŋin Naarai aricit aituutooretakon.

57EJAKAIT ŋes akorakineteka: Abu kalimo ebe arici akonikiro.

58Abu kenaiŋa asianutukon kekatau kere: Kitimoi kwape eiaar akonikirot.

59Abu kaomoom irotinika, Kebeleu da akakeje mama ejaas aitejenunetakon.

60Abu kesunyak, mam abu ketumor, Airie aicorakinetakon.

61Kekodikodata aunoi nuka ikaronok; Konye mam kemurwokinito ikonikisila.

62Anyouni kidinebai aimal jo Kanuka itubesiakon luedolito.

63Arai eoŋ epaup loka ŋul kere Iukiyonito jo, Ka ŋul da luericito aituutooretakon.

64Wu EJAKAIT, ileleba akwap akoniitim: Kisisianakinai ikonikisila.

65Ibu kikonak ekonibulesit ejok, Wu EJAKAIT, kwape eiaar akonikirot.

66Kisisianakinai etube loejok ka aijen; Naarai eyuu akoniieorakineta.

67Eroko eoŋ kiticana abu kapaa; Konye kwana arieit akonikirot,

68Iiok ijo, ido iswamai nuejok; Kisisianakinai ikonikisila.

69Kenyonyoikis eoŋ luiturokina aiŋal: Arici aituutooretakon kekatau kere,

70Etariono ekeeetau bala asiepai; Konye eoŋ esiyalamikinit ikonikisila.

71Ejok keticani; Tetere esisiauni ikonikisila.

72Ekisil loka aitukukon ejok kamakaŋ, Adepar ilukumin luka esabu ka epuesa da.

73Akonikanin kasubete eoŋ keticata da; Ae acoa tetere esisiauni aicorakinetakon.

74Kaanyunete eoŋ ŋul lukiyonito jo kosodete aiyalamikin; Naarai amunokin akonikirot.

75Wu EJAKAIT, ajeni ebe edolito itubesiakon, Ebe da kitiean ijo eoŋ kotoma amunonut.

76Kenainait, ketalaka asianutukon-nakamln, Kwape eiaar akonikirot mama ejai ekonibulesit.

77Kadolokis eoŋ akoniitimesia nukajokak, tetere ajari: Naarai kesiyalamikinito ikonikisila.

78Kisurumai luiturokina ileic; naarai kebirosi kasabanakin: Konye eoŋ aomoomoi nuka aituutooretakon,

79Kibeleunos ŋul lukiyoniro jo mama ajai, Ejenunete da aiteienunetakon.

80Korau ekatau loedolit kokisilakon: Tetere mam kerumete ileje.

81Imwokolikin ekatau kanuka aitajarakon: Konye amunokin akonikirot,

82Ewariwarete akakonye kanuka akonikirot, Nape atemaria ebe, “Wori bo kitalakaaria?”

83Naarai asub bala eriagi loka emukule kotoma apuru: Konye mam kemurwokinito ikonikisila.

84Imwaasi ai apaarasia nuka ekonibulesit? Wori bo itodolio ijo etube mama ejaas ŋul lukemanito eoŋ?

85Kabokanakis luiturokina apanya, Lumam etupito ikonikisila.

86Aicorakinetakon kere eraas numunon: Kemanito kasabanakin; kiŋarakinai eoŋ.

87Nepetai kes amudiar eoŋ kakwap; Konye mam abu kajal aituutooretakon,

88Kitajarai kwape ejaar asianutukon-nakamin; Kwaŋin ariei aitejenunet naka aitukukon

89Wu EJAKAIT, icasit akonikirot Kotoma akuj ikar kere.

90Enatarit amunonutukon aturio kere: Iticat ijo akwap, ido iboie.

91Iboiete lolo kwape ejaatar aicorakinetakon; Naarai iboro kere eraas ikonibulesin.

92Kedim eoŋ aisiyalamikinit ikonikisila, Ti do eoŋ kaolio kotoma aiticanioka.

93Mam eut kemurwokinete aituutooretakon; Naarai kes kitajaria ijo eoŋ,

94Arai eoŋ ekon, kitajarai; Naarai amoot eoŋ aituutooretakon.

95Kedareut ikaronok amudiar eoŋ; Konye eoŋ aomoomoi nuka aitejenunetakon.

96Aany esaŋe loka adolit kere; Konye elal noi akoniicorakinet.

97Amina ca ma eoŋ ikonikisila! Aomoomoi eoŋ nukec apaaran kere.

98Ketocout eoŋ aicorakinetakon adepar lukasurupoka, Naarai ejaenenas keoŋ tiritir.

99Epol eoŋ aijen adepar ikakesisianakinak kere; Naarai aomoomoenenei nuka aitejenunetakon.

100Ajeni eoŋ nuipu adepar imakio, Naarai aricit eoŋ aituutooretakon.

101Etikok akakeje aibe ŋolirot kere loerono, Tetere arici akonikirot.

102Mam apaarit kotubesiakon; Naarai kisisianak ijo eoŋ.

103Ewinyak ca ma akirokon kaŋajepeka! Eebo, ewinyak adepar esik kaitukuka!

104Aituutooretakon kes adumanakini eoŋ aijen: Kanuka ŋun alait ŋolirot loka aiŋal.

105Akonikirot ŋes atala naka akejeka, Aica da nakosokotoka.

106Eyapo, ido etogogoŋ ŋun ebe, Arici itubesiakon luedolito.

107Keticani noi: Wu EJAKAIT, kitajarai kwape ejaar akonikirot.

108Keŋaiŋait jo, kocam ainakineta nukakote nuka aitukuka, Wu EJAKAIT, kisisianakinai da ikonitubesia.

109Ejai ekatau ducuduc akanika; Konye mam kemurwokinito ikonikisila.

110Kalokata ikaronok keic; Konye mam abu kapaa kaituutooretakon.

111Etarau eoŋ aitejenunetakon bala airumet ikar kere; Naarai elelakinit ekatau kes.

112Agoŋak ekatau aitodol ikonikisila, Ikar kere, aitodol awasia.

113Alait eoŋ ŋul luka itauon iarei; Konye amina ikonikisila.

114ŋjo ŋes akaŋopis ekabuku da: Amunokin eoŋ akonikirot.

115Konyout kamaka yesi luiswamaete aronis; Tetere arici eoŋ aicorakineta nuka Ekadeke,

116Kigaŋai, kwape ejaar akonikirot, tetere ajari; Kenyeis ileic airum kotoma amunoka.

117Kigaŋai, keyamakin, Kasodi acamun ikonikisila ducuduc,

118Iner ijo ŋul kere luepaarete kokisilakon; Naarai aiŋalakec erai aamameak.

119Icaka ijo ikaronok kere luka akwap bala asusujo: Kanuka ŋun amina eoŋ aitejenunetakon,

120Emarani akakuan kanuka ayoŋit jo; Ido ayoŋit itubesiakon.

121Etodol eoŋ etube ka abeit: Sirikiijalak kama ejaas lukaroikinito eoŋ,

122Kobwaa ekonibulesit, kanuka ajokis: Kinyeis luiturokina aroikin eoŋ.

123Ewariwarete akakonye kanuka aitajarakon, Ido kanuka akirotokon naedolit.

124Kikonak ekonibulesit kwape ejaar akoniitim, Kisisianakinai da ikonikisila.

125Arai eoŋ ekonibulesit, ae acoa; Tetere ajenuni aitejenunetakon,

126Adol apak EJAKAIT aswam, Naarai etapalaut kesi ikonikisila.

127Kanuka ŋun amiria aicorakinetakon, Adepar esabu, eebo, adepar esabu loejok.

128Ŋes aderio aituutooretakon kere nuka akiro kere nuejok; Alait da ŋolirot loka aiŋal,

129Eumokina aitejenunetakon: Ŋes ericia ekatau kes.

130Naeŋaarotor akonikiro itacaikinete; Itejenikinete ijimat,

131Abu kaoon akaituk noi, abu keyeŋanakin; Naarai emiela aicorakinetakon.

132Kibelokin mama ajai, kitimoi, Kwape itapitor aikonanakin ŋul lueminas ekonikiror.

133Kiteten ekalose kakirotokon, Kinyeis numam adolit kere ayait eoŋ,

134Kolakunai karoikinio naka ituŋanan: Kwaŋin ŋes aricia aituutooretakon.

135Kitacaik ekonibulesit akonikonyen; Kisisianakinai da ikonikisila.

136Eleleete icorin luka akipi kakonyeka, Naarai mam ituŋa ericito ikonikisila.

137Wu EJAKAIT, idolit ijo, Ikonitubesia da itenara.

138Ibu kicorak aitejenunetakon kadolit, Ka amunonut naepol.

139Kerum eoŋ ekokote Naarai emurwokis Iukasurupoka akonikiro.

140Ililiauna akonikirot noi; Kanuka ŋun ŋes eminaritor ekonibulesit.

141Adite eoŋ kamenitai da: Konye mam kemurwokinito aituutooretakon.

142Adolitekon ŋes adolit namam enaŋi, Ikonikisila da kes abeit.

143Kadoikis eoŋ ican ka ariebo; Konye kesiyalamikinito aicorakinetakon.

144Edolite aitejenunetakon ikar kere; Ae acoa, tetere ajari.

145Abu kewone kekatau kere; koboŋokinoi, wu EJAKAIT: Arieenenei ikonikisila.

146Abu kewone jo; kitajarai, Tetere arici aitejenunetakon,

147Abu kanyou eroko etop kelomuna, kamony: Kamunokina akonikirot.

148Abu kakweny eroko akwenyuneta nuka akuare, Tetere aomoomoi akonikirot.

149Kiira eporotoka kwape ejaar akonisianut-nakamin: Wu EJAKAIT, kitajarai kwape ejaatar itubesiakon.

150Ikunyunete die luibwapito aronis; Elwaka kesi kokisilakon.

151Wu EJAKAIT, ijai ijo die, Akoniicorakineta da kere eraas abeit.

152Abu kajen apeŋo kaitejenunetakon ebe, Iticasit kes ikar kere.

153Koomoom aiticanitoika, ido koyu eoŋ; Naarai mam kemurwokinito ikonikisila.

154Kopurokinai akakirot, kolakunai: Kitajarai kwape ejaar akonikirot.

155Elwana aitajario kama ejaas ikaronok, Naarai mam kes emoete ikonikisila,

156Wu EJAKAIT, epolok noi aitimesiakon nuejok: Kitajarai kwape ejaatar itubesiakon.

157Ipu lukemanito ka lukasurupoka da; Konye mam eoŋ apaarit kaitejenunetakon.

158Abu kaany luemodomodoete, keturur; Naarai mam ericito akonikirot.

159Koomoom kwape aminar eoŋ aituutooretakon: Kitajarai, wu EJAKAIT, kwape ejaar asianutukon-nakamin.

160Etiai loka akirokon ŋes abeit; Itubesiakon luedolito kere ejaenenas ikar kere.

161Kemanata eoŋ ikapolok komam akirot, Konye ebwoi ekatau koyoŋite akonikiro.

162Alelakinit eoŋ akonikirot, Kwape ituŋanan yenedumuni iŋatan luipu,

163Alait eoŋ asacit da aiŋalanut; Konye amina ikonikisila.

164Keturenenei jo irwan akanykaarei apaaran; Kanuka itubesiakon luedolito.

165Lueminas ikonikisila ejaas ainapakin naepol; Emamei da adiokirot naisiguikini kes.

166Wu EJAKAIT, amunokin aitajarakon, Eswama da aicorakinetakon.

167Abu ekatau koric aitejenunetakon; Ido amina kes noi.

168Abu karic aituutooretakon ka aitejenunetakon; Naarai ejaas ikarotin kere akonyenekon.

169Wu EJAKAIT, kikuny aimonyoka neijai: Ae acoa kwape ejaar akonikirot.

170Kodol aiŋaiŋaka akonyenekon: Koyuunai kwape ejaar akonikirot.

171Kolim akaituk aiturit; Naarai kisisianakini ijo eoŋ ikonikisila.

172Koye akaŋajep akonikirot; Naarai edolito aicorakinetakon kere.

173Kitemokino akonikan aiŋarakin eoŋ; Naarai aseu aituutooretakon.

174Wu EJAKAIT, emiela aitajarakon; Esiyalamikinit ikonikisila.

175Kojar ekatau, kosodi aiturit jo; Keŋarakis da eoŋ itubesiakon.

176Apaa eoŋ bala amerekek naeoliorit; komou ekonibulesit; Naarai mam kemurwokinito aicorakinetakon.

← Chapter 118 Jump to: Chapter 120 →

Recommended Reading

Commentary Psalms Commentaries → Devotional Psalms Devotional Guide → Get This Bible Teso Study Bible →