Zechariah 12

Teso

← Chapter 11 Jump to: Chapter 13 →

1Akirot naka EJAKAIT naka Isirael. Inera EJAKAIT lokepesikini akuj, lokepesi da apetetait naka akwap, lokesubi emoyo laka ituŋanan kotomake, ebe:

2“Koany, etuluor Yerusalem aikopo naka aigetigeta mama ejaas ituŋa kere luirimorito; ejaun mama ejai Yuda da kotoma airigaunio naka Yerusalem.

3Kosodi kanen, kapaaran kaŋin, etuluori Yerusalem amoru naelanir noi mama ejaas ituŋa kere; nul kere luedakete ŋes imusunanakinos noi. Etukonokinos atekerin kere nuka akwap asurokin ŋes,

4Ebala EJAKAIT ebe, Kapaaran kaŋin, esuumokini nolibalasit, esikeripikini ekebwanenonike. Konye esesenete akakonye ekek loka Yuda, naetumudakia ŋolibalasit loka ituŋa,

5Etemarete ijaka luka Yuda kotauonokec ebe, ‘Luibojete ko Yerusalem kes akagogoŋ kotoma EJAKAIT loka ajoresio Ekecedeke.’

6“Kapaaran kaŋin etusubi ijaka luka Yuda bala atido naka akim kotoma akito, ido bala akalas naka akim kotoma oisutan; idoporete ituŋa kere airimor, kakan nakoteten ka nakokediany da; eriŋa bobo iboie Yerusalem kaiboisike, ŋes Yerusalem,

7“Isiauni EJAKAIT aitaiar iweman luka Yuda, tetere mam itopolooritai aibuses naka ekek loka Daudi ka aibuses naka luibojete koYerusalem adepar Yuda,

8Kapaaran kaŋin eiikini EJAKAIT luibojete koYerusalem; ŋin da yenikalanyana kakesi kapaaran kaŋin eraun kwape Daudi; ekek da loka Daudi eraun kwape Edeke, kwape emalaika loka EJAKAIT kakonyenekee.

9Kosodi kanen kapaaran kaŋin amoi eoŋ amudiar atekerin kere nuepote asurokin Yerusalem.

10“Abukokini ekek loka Daudi, ka luibojete koYerusalem, emoyo loka asianut ka loka aiŋaiŋa; esesenete ŋol loapotu kicumata: ibworos ŋes, kwape ibworor ituŋanan okokuke loteluna, ekuudiani ŋes, kwape yenekuudiani ekiyaike.

11Kapaaran kaŋin ejaun aibworo naepol ko Yerusalem, kwape aibworo naka Kadad-rimon kaditot naka Megidon,

12Ibworos lukakwap, ŋolikek kowaike; ekek loka etogo loka Daudi kowaike, ka akecenor kowaikee; ekek loka etogo loka Natan kowaike, ka akecenor da kowaikee;

13ekek loka etogo loka Lebi kowaike, ka akecenor kowaikee; ekek loka Isimein kowaike, ka akecenor kowaikee;

14ikekia kere luedeunos, nolikek kowaike, ka akecenor da kowaikec.

← Chapter 11 Jump to: Chapter 13 →