Mark 8

Tagalog (Ang Biblia 2001)

← Chapter 7 Jump to: Chapter 9 →

1Nang mga araw na iyon, nang magkaroong muli ng napakaraming tao na walang makain, tinawag niya ang kanyang mga alagad at sinabi sa kanila,

2"Nahahabag ako sa maraming tao sapagkat tatlong araw ko na silang kasama at walang makain.

3Kung sila'y pauuwiin kong nagugutom sa kanilang mga bahay, mahihilo sila sa daan at ang iba sa kanila ay nanggaling pa sa malayo."

4Sumagot ang kanyang mga alagad, "Paanong mapapakain ninuman ang mga taong ito ng tinapay dito sa ilang?"

5At sila'y tinanong niya, "Ilang tinapay mayroon kayo?" Sinabi nila, "Pito."

6Inutusan niya ang maraming tao na umupo sa lupa. Kinuha niya ang pitong tinapay at pagkatapos magpasalamat, pinagputul-putol niya ang mga ito at ibinigay sa kanyang mga alagad upang ihain. At inihain nila ang mga ito sa maraming tao.

7Mayroon din silang ilang maliliit na isda at nang mabasbasan ang mga ito, sinabi niya na ihain din ang mga ito.

8Sila'y kumain at nabusog. At may lumabis na mga piraso, pitong kaing na puno.

9Sila'y may mga apat na libo; at kanyang pinaalis na sila.

10At agad siyang sumakay sa bangka kasama ang kanyang mga alagad at pumunta siya sa lupain ng Dalmanuta.

11Dumating ang mga Fariseo at nagsimulang makipagtalo sa kanya na hinahanapan siya ng isang tanda mula sa langit, upang subukin siya.

12At nagbuntong-hininga siya nang malalim sa kanyang espiritu at sinabi, "Bakit humahanap ng tanda ang salinlahing ito? Katotohanan ang sinasabi ko sa inyo, walang tanda na ibibigay sa salinlahing ito."

13Sila'y iniwan niya at sa muling pagsakay sa bangka, tumawid siya sa kabilang ibayo.

14Noon ay nakalimutan ng mga alagad na magdala ng tinapay maliban sa iisang tinapay na nasa bangka.

15Kanyang binalaan sila na sinabi, "Mag-ingat kayo, iwasan ninyo ang lebadura ng mga Fariseo at ang lebadura ni Herodes."

16At sinabi nila sa isa't isa, "Ito ay sapagkat wala tayong tinapay."

17Yamang batid ito ni Jesus, ay sinabi sa kanila, "Bakit ninyo pinag-uusapan na wala kayong tinapay? Hindi pa ba ninyo nalalaman ni nauunawaan man? Tumigas na ba ang inyong mga puso?

18Mayroon kayong mga mata, ngunit hindi nakakakita? Mayroon kayong mga tainga, ngunit hindi nakakarinig? Hindi ba ninyo natatandaan?

19Nang aking pagputul-putulin ang limang tinapay para sa limang libo, ilang kaing na puno ng mga pinagputul-putol ang inyong pinulot?" Sinabi nila sa kanya, "Labindalawa."

20"Nang pagputul-putulin ang pitong tinapay para sa apat na libo, ilang kaing na puno ng mga pinagputul-putol ang pinulot ninyo?" Sinabi nila sa kanya, "Pito."

21Sinabi naman niya sa kanila, "Hindi pa ba ninyo nauunawaan?"

22Dumating sila sa Bethsaida. At dinala nila sa kanya ang isang lalaking bulag at ipinakiusap sa kanyang hipuin siya.

23Hinawakan niya sa kamay ang lalaking bulag at dinala niya sa labas ng nayon. Nang maduraan ang kanyang mga mata at maipatong ang kanyang mga kamay sa kanya, kanyang tinanong siya, "May nakikita ka bang anuman?"

24Tumingala ang lalaki at nagsabi, "Nakakakita ako ng mga tao, na parang mga punungkahoy na naglalakad."

25Saka ipinatong na muli sa kanyang mga mata ang kanyang mga kamay; siya'y tumitig at bumalik ang kanyang paningin. Nakita niya ang lahat ng bagay na maliwanag.

26At pinauwi niya siya sa kanyang bahay na sinasabi, "Huwag kang pumasok kahit sa nayon."

27Nagtungo si Jesus at ang kanyang mga alagad sa mga nayon ng Cesarea sa Filipos at sa daan ay tinanong niya ang kanyang mga alagad, "Sino raw ako ayon sa sinasabi ng mga tao?"

28At sinabi nila sa kanya, "Si Juan na Tagapagbautismo; at sabi ng iba, si Elias; at ng iba pa, isa sa mga propeta."

29At tinanong niya sila, "Ngunit, sino ako ayon sa sinasabi ninyo?" Sumagot si Pedro at sinabi sa kanya, "Ikaw ang Cristo."

30Mahigpit na iniutos niya sa kanila na huwag nilang sasabihin kaninuman ang tungkol sa kanya.

31Pagkatapos ay pinasimulan niyang ituro sa kanila na ang Anak ng Tao ay kinakailangang magdusa ng maraming bagay at itakuwil ng matatanda, ng mga punong pari, at ng mga eskriba, at patayin at pagkaraan ng tatlong araw ay muling mabubuhay.

32At maliwanag na sinabi niya ang salitang ito. Inilayo siya ni Pedro at pinasimulang siya'y sawayin.

33Subalit paglingon niya at pagtingin sa kanyang mga alagad, sinaway niya si Pedro at sinabi, "Umalis ka diyan Satanas! Sapagkat hindi mo iniisip ang mga bagay na ukol sa Diyos, kundi ang mga bagay na ukol sa tao."

34Tinawag niya ang maraming tao pati ang kanyang mga alagad, at sa kanila'y sinabi, "Kung ang sinuman ay nagnanais sumunod sa akin, siya ay tumanggi sa kanyang sarili, pasanin ang kanyang krus at sumunod sa akin.

35Sapagkat ang sinumang nagnanais iligtas ang kanyang buhay ay mawawalan nito at ang sinumang mawalan ng kanyang buhay dahil sa akin at sa ebanghelyo ay maililigtas iyon.

36Sapagkat ano ang mapapakinabang ng tao na makamtan ang buong sanlibutan, at mapahamak ang kanyang buhay?

37Sapagkat anong maibibigay ng tao na kapalit ng kanyang buhay?

38Sapagkat ang sinumang ikinahihiya ako at ang aking mga salita sa mapangalunya at makasalanang salinlahing ito ay ikahihiya rin naman siya ng Anak ng Tao, pagdating niyang nasa kaluwalhatian ng kanyang Ama na kasama ng mga banal na anghel."

← Chapter 7 Jump to: Chapter 9 →