2 Thessalonians 3

Tswana (BAEBELE e e Boitshepo) 1992

← Chapter 2 Jump to:

1Sa bofelo, bagaetsho, lo re rapelele, gore lefoko la Morena le siane, le galalediwe, fela jaaka le ntse mo go lona,

2le gore re gololwe mo bathong ba ba se nang megopolo, le ba ba bosula, gonne batho ga ba na tumelo botlhe.

3Morena o boikanngo, yo o tlaa lo tlhomamisang, a ba a lo dibela mo go yo o bosula.

4Re ikantse mo Moreneng ka ga lona, gore lo ntse lo a dira, le gone lo tlaa nna lo dira dilo tse re di laolang.

5A Morena a gogele dipelo tsa lona mo loratong lwa Modimo, le mo bopeloteleleng jwa ga Keresete.

6Jaana re a lo laola, bagaetsho, mo ineng la Morena wa rona Jesu Keresete, gore lo ikgoge mo go mokaulengwe mongwe le mongwe yo o tsamayang ka go tlhokomologa molao, a sa tsamaye ka fa dipolelong tse ba di amogetseng mo go rona.

7Gonne lo a itse ka losi ka fa lo tshwanetseng go etsa rona ka teng, gonne ga re a ka ra dira ka go tlhokomologa molao mo go lona;

8le gone ga re a ka ra jela motho ope dijo ka lefela, fa e se ka mofufutso le thekisego, re dira bosigo le motshegare, gore re se ka ra imela ope wa lona.

9Ga se go re, ga re na tshiamelo ya gone, e le go re re itire sekao mo go lona, gore lo etse rona.

10Gonne le e rile re le mo go lona, ra lo laola jalo ra re: Fa mongwe a gana go dira, le gone a se ka a ja.

11Gonne re utlwa ka ga bangwe ba ba tsamayang ka go tlhokomologa molao mo go lona, ba ba se keng ba dira gope, mme e le balotlhanyi fela.

12Jaana ba ba ntseng jalo re a ba laola, re ba re ba laya mo ineng la Morena Jesu Keresete, gore ba dire ka tidimalo, ba je dijo tse e leng tsa bone.

13Mme lona, bagaetsho, lo se ka lwa lapa mo go direng molemo.

14Fa motho mongwe a sa utlwe lefoko la rona ka lokwalo lo, lo ele motho yoo tlhoko, gore lo se nne bokopano nae, gore a tlhajwe ke ditlhong.

15Le fa go ntse jalo lo se ka lwa mo kaya mmaba, mme lo mo tlhagise jaaka mokaulengwe.

16Jaana a Morena wa kagiso ka esi a lo neye kagiso ka metlha yotlhe, ka mekgwa yotlhe. A Morena a nne le lona lotlhe.

17Tumediso ya me ke le Paulo e kwadilwe ka seatla sa me, se e leng sone sesupo mo lokwalong longwe le longwe, ke kwala fela jalo.

18A tshegofatso ya Morena wa rona Jesu Keresete e nne le lona lotlhe.

← Chapter 2 Jump to: