1 Chronicles 22

Tsonga (BIBELE Mahungu Lamanene) 1989

← Chapter 21 Jump to: Chapter 23 →

1Hiloko Davhida a ku: “Yindlu ya HOSI Xikwembu yi ta va kwala; na yona alitari ya magandzelo lama hisiwaka, lama humesiwaka hi vito ra Vaisraele, yi ta va kwala.”

2Davhida a lerisa leswaku valuveri lava nga tikweni ra Israele va hlengeletiwa, a hlawula lava tivaka ku vatla maribye, a va rhwexa ntirho wa ku lulamisa maribye lama nga ta aka Tempele.

3Davhida a hlengeleta nsimbhi leyo tala ya ku endla swipikiri swo belela timbanti, ni ya ku endla swo manyisa marimba ha swona; Davhida a hlengeleta ni koporo yo tala ku tlula mpimo,

4ni timhandze ta kedari ta ntsandza-vahlayi, a hlawula eka timhandze leti va le Tiri ni va le Sidoni a va n'wi tiserile tona hi xitalo.

5Davhida a a ku: “N'wana wa mina Solomoni wa ha ri ntsongo, a nga si tiva swo tala. Kasi yindlu leyi yi nga ta akeriwa HOSI Xikwembu, yi fanele ku va leyikulu swinene, yi va ni ku twala, yi tiveka emisaveni hinkwayo; kutani mina ndzo fanela ku hlengeleta hi vutswatsi swilo leswi swi nga ta yi aka.” Hikokwalaho Davhida ú hlengeletile swilo leswo tala ngopfu swo aka ha swona, a nga si fa.

6Kutani Davhida a vitana Solomoni n'wana wa yena, a n'wi lerisa ku akela HOSI Xikwembu xa Israele eTempele,

7a ku ka yena: “N'wananga, a ndzi ri ni makungu ya ku aka Tempele, ndzi dzunisa HOSI Xikwembu xa mina ha yona.

8Kambe HOSI Xikwembu xi vulavurile na mina xi ku: ‘U halatile ngati yo tala, u tlhela a lwa tinyimpi letikulu; hikokwalaho a hi wena loyi a nga ta ndzi akela Tempele ni ku ndzi dzunisa ha yona; ngati leyi u yi halateke laha misaveni, yi tele ngopfu.

9Kambe u ta kuma n'wana wa xinuna la nga ta va munhu wa ndzhuti, wa ku rhula. Vaaki va matiko lama vandzakaneke na yena a va nga ha n'wi pfuki; ú ta thyiwa vito ra Solomoni (hileswaku “la rhuleke”). Enkarhini wa ku fuma ka yena, ndzi ta nyika Vaisraele ku rhula ni ku tshamiseka.

10Hi yena loyi a nga ta ndzi akela Tempele. Ú ta va n'wana eka mina, na mina ndzi va tatana eka yena. Ndzi ta tiyisa vuhosi bya yena exikarhi ka Vaisraele hilaha ku nga heriki.’ ”

11Davhida a engeta a ku ka Solomoni: “Sweswi we n'wananga, HOSI Xikwembu xa wena a xi ve na wena, leswaku u kateka entirhweni wa wena wa ku aka Tempele ya xona; minkateko ya kona, xi ku tshembisile yona.

12Kambe ngopfu ngopfu ndzi navela leswaku HOSI Xikwembu xa wena xi ku nyika miehleketo ni ku twisisa, leswaku loko xi ku veka ku fuma Vaisraele, u kota ku hlayisa Nawu wa xona.

13U ta humelela ntsena loko u hlayisa milawu ni swiletelo leswi HOSI Xikwembu xi swi leriseke Muxe, swi nga leswi yena a swi dyondziseke Vaisraele. Tiya, u komba vunhenha bya wena; u nga tshuki u hela mbilu, u nga chavi.

14Ndzi tikarhatile swinene ku hlengeleta swo aka Tempele ya HOSI Xikwembu ha swona, swi nga leswi: Nsuku wa tithani ta 4 100, ni silivhere ya tithani ta 41 000, ni koporo ni nsimbhi leyi nga pimekiki hi ku tala ka yona; timhandze ni maribye na swona ndzi swi hlengeletile, kambe wena wa ha ta engetela eka leswi hinkwaswo.

15“Naswona, u ni vavanuna lavo tala lava tivaka ntirho, va nga vaaki, ni vavatli va maribye, ni vavatli va timhandze, ni van'wana lavo tala lava kotaka ku tirha

16hi nsuku, ni silivhere, ni koporo, ni nsimbhi. Sweswi famba u ya tirha. HOSI a yi ve na wena!”

17Davhida a lerisa varhangeri hinkwavo va Israele ku pfuna Solomoni n'wana wa yena, a ku ka vona:

18“Xana HOSI Xikwembu xa n'wina a xi yimi na n'wina ke? A xi mi nyikanga ku rhula hi matlhelo hinkwawo xana? Vanhu lava khale a va akile etikweni leri, xi va nyiketile emavokweni ya mina; kutani va le hansi ka HOSI Xikwembu ni vanhu va xona.

19Sweswi lavani HOSI Xikwembu xa n'wina hi mbilu ni moya; tinyiketeni mi aka Tempele leyo hlawuleka leyi yi nga ta dzunisa HOSI Xikwembu, mi nghenisa ka yona Areka ya Ntwanano wa xona, ni swibya swa xona leswo hlawuleka.”

← Chapter 21 Jump to: Chapter 23 →