1 Samuel 19

Tsonga (BIBELE Mahungu Lamanene) 1989

← Chapter 18 Jump to: Chapter 20 →

1Siku rin'wana Sawulo a vulavula ni n'wana wa yena Yonatani, ni malandza ya yena hinkwawo, hi ta ku dlaya Davhida. Kasi Yonatani n'wana wa yena a a rhandza Davhida ngopfu,

2kutani a ya n'wi hlevela a ku: “Tata wa mina Sawulo ú ni makungu ya ku ku dlaya. Hikokwalaho, mundzuku loko ri xa, tivonele swinene, u tshama endhawini yin'wana, u tumbela kona.

3Kutani mina ndzi ta huma na tatana, hi ya yima kusuhi ni laha u nga ta va u tumberile kona emasin'wini. Ndzi ta ku khongelela eka yena, kutani loko ndzi vonile hilaha timhaka ti yimeke hakona, ndzi ta ku tivisa.”

4Yonatani a khongelela Davhida swinene eka Sawulo tata wa yena, a ku: “We hosi, u nga tshuki u hoxela nandza wa wena Davhida, hikuva na yena a nga ku hoxelanga nchumu, naswona mintirho ya yena yi ku pfunile swinene.

5A nga chavanga ku fa, siku a dlayeke Mufilista, kutani hi siku rero HOSI Xikwembu xi ponisile Vaisraele hinkwavo hi ndlela yo hlamarisa. Loko u vonile leswi, swi ku tsakisile. Hikwalaho ka yini u lava ku dlaya Davhida xana? Wa hoxa! Munhu loyi a nga na nandzu, u ta va u halata ngati ya yena mahala.”

6Kutani Sawulo a yingisa marito ya Yonatani, a hlambanya a ku: “Ndza tiyisa emahlweni ka HOSI Xikwembu lexi hanyaka, ndzi ri: Davhida a nga ka a nga dlayiwi!”

7Kwalaho Yonatani a vitana Davhida, a n'wi hlamusela timhaka leti hinkwato, kutani a n'wi tlherisela eka Sawulo. Davhida a ya emahlweni a tirhela Sawulo tanihi masiku.

8Nyimpi yi tlhela yi pfuka, kutani Davhida a huma a ya lwa ni Vafilista, a va hlasela swinene, va kondza va n'wi tsutsuma.

9Kambe moya lowo biha lowu rhumiweke hi HOSI Xikwembu wu nghena eka Sawulo. A a tshamile endlwini ya yena, a tamele tlhari, Davhida a ri karhi a n'wi chayela haripa,

10kutani Sawulo a ringeta ku tlhava Davhida hi tlhari leswaku a ta n'wi katsa ni khumbi, kambe Davhida a vhika, tlhari ri ya tlhava khumbi. Kutani vusiku byebyo Davhida a suka a tsutsuma, a ponisa sweswo.

11Kutani Sawulo a rhumela vanhu ekaya ka Davhida va ya n'wi rindza, leswaku a ta dlawa loko ri xile. Kambe Mikala a ku ka nuna wa yena Davhida: “Loko u nga tsutsumi vusiku byebyi, u tiponisa, mundzuku va ta ku dlaya.”

12Kavaloko Mikala a humesa Davhida hi ku n'wi nembeleta hi le fasitereni, kutani Davhida a tsutsuma, a ponisa sweswo.

13Mikala a teka xifaniso lexi vatliweke xa swikwembu, a xi lata esangwini, a seketela nhloko ya xona hi xinkumbana lexi lukiweke hi voya bya timbuti, kutani a xi funengeta hi nkumba.

14Loko Sawulo a rhumela vanhu ku ya khoma Davhida, Mikala a ku ka vona: “Wa vabya!”

15Sawulo a tlhela a rhuma vanhu lava, a ku ka vona: “Yanani, mi ya vona Davhida hi mahlo, mi n'wi rhwala hi sangu ra yena, mi vuya na yena haleno ka mina, ndzi ta n'wi dlaya.”

16Varhumiwa va lo na fika va nghena, va kuma leswaku ku ni xifaniso lexi vatliweke xa swikwembu esangwini, nhloko ya xona yi seketeriwile hi xinkumbana xa voya bya timbuti.

17Kutani Sawulo a vutisa Mikala a ku: “Hikwalaho ka yini u ndzi kanganyisile hi ndlela leyi, u tshika nala wa mina a tsutsuma a baleka, xana?” Mikala a hlamula Sawulo a ku: “Hi yena la nga te: ‘Loko u nga ndzi tshiki ndzi tsutsuma, ndzi ta boheka ku ku dlaya!’ ”

18Loko Davhida a balekile, a tsutsuma a ya fika eka Samiele emutini wa Rhama, a n'wi rungulela hinkwaswo leswi Sawulo a n'wi endleke swona; kutani va suka hi vumbirhi bya vona, va ya tshama eNayoto.

19Vanhu va tivisa Sawulo leswaku Davhida ú le Nayoto, le Rhama.

20Kavaloko Sawulo a rhumela vanhu ku ya khoma Davhida. Loko varhumiwa lava va fika, va vona ntlawa wa vaprofeta lava a va ri eku vhumbheni, va rhangeriwile hi Samiele, kutani na vona va ngheniwa hi Moya wa Xikwembu, va sungula ku vhumbha.

21Loko Sawulo a byeriwa timhaka leti, a rhumela van'wana vanhu, kutani na vona va fika va sungula ku vhumbha. Sawulo a engeta a rhumela ntlawa wa vunharhu, na wona wu fika wu sungula ku vhumbha.

22Hiloko a ya eRhama hi yexe. Loko a fika exihlobyeni lexikulu lexi nga eSeku, a vutisa a ku: “Xana Samiele na Davhida, va kwihi xana?” A byeriwa leswaku va le Nayoto, le Rhama.

23Kwalaho, a suka a ya kona. Loko a ha ri endleleni, na yena a ngheniwa hi Moya wa Xikwembu, a sungula ku vhumbha, ku kondza a ya nghena eNayoto le Rhama;

24a hluvula swiambalo swa yena ku fana ni vaprofeta, kutani a vhumbha emahlweni ka Samiele, a wela hansi, a tshama a nga ambalanga nchumu siku rero hinkwaro ni vusiku bya kona (xivuriso lexi nge: “Xana Sawulo na yena i un'wana wa vaprofeta xana?” xi sukela kwalaho).

← Chapter 18 Jump to: Chapter 20 →