Jeremiah 39

Tsonga (BIBELE Mahungu Lamanene) 1989

← Chapter 38 Jump to: Chapter 40 →

1[Leswi nga humelela loko valala va teka muti wa Yerusalema, hi leswi:] Hi lembe ra vu-9 ra ku fuma ka Sedekiyasi hosi ya Yuda, hi n'hweti ya vukhume, Nebukadnetsara hosi ya le Babilona a ta ni mavuthu ya yena hinkwawo ku ta hlasela Yerusalema, kutani a rhendzela muti.

2Kutani hi lembe ra vu-11 ra ku fuma ka Sedekiyasi, hi siku ra vu-9 ra n'hweti ya vumune, rirhangu ra muti ri boxiwa hi valala,

3kutani tindhuna hinkwato ta hosi ya le Babilona ti nghena, ti ya tshama kusuhi ni Nyangwa-ya-le-Xikarhi; a ku ri na Nergala-Sarezere, na Samigara-Nebo, na Sari-Sekimi ndhunankulu, na Nergala-Sarezere lowa xandla xa hosi, ni tindhuna tin'wana hinkwato ta hosi ya le Babilona.

4Loko Sedekiyasi hosi ya Yuda ni masocha ya yena hinkwawo va vona leswi humelelaka, va baleka nivusiku hi ndlela leyi hundzaka hi le ntangeni wa hosi, va huma emutini hi nyangwa leyi nga xikarhi ka makhumbi mambirhi, kutani va tsutsuma va kongomile enkoveni wa Yordani.

5Kambe mavuthu ya Vakalediya ma va hlongorisa, ma ya kuma Sedekiyasi erivaleni ra Yeriko. Loko Vakalediya va n'wi khomile, va n'wi yisa eka Nebukadnetsara hosi ya le Babilona, loyi a a ri eRibila etikweni ra Hamata, kutani Nebukadnetsara a n'wi vona nandzu.

6A lerisa leswaku vana va Sedekiyasi va dlayiwa emahlweni ka tata wa vona kwale Ribila, ku dlayiwa ni varhangeri hinkwavo va tiko ra Yuda.

7Sedekiyasi yena va n'wi boxa mahlo, va n'wi boha milenge hi tinketani, kutani va n'wi yisa eBabilona.

8Vakalediya van'wana va sala va hisa tindlu ta le ntsindza eYerusalema, ni tindlu ta vaaki van'wana va muti, va hirimuxa ni rirhangu ra Yerusalema.

9Vanhu lava a va sele emutini, ni lava a va tinyiketile eka Nebukadnetsara, ni masalela ya vavatli ni vaaki va yisiwa eBabilona evukhumbini hi Nebuzaradani ndhuna ya vasirheleri va hosi.

10Kambe loko va ri vanhu van'wana va swisiwana lava nga hava swa le mandleni, Nebuzaradani a va siya etikweni ra Yuda leswaku va ta sala va hlayisa mirhi ya mihandzu, va byala ni mavele.

11Kutani Nebukadnetsara hosi ya le Babilona a lerisa Nebuzaradani ndhuna ya vasirheleli va hosi hi tlhelo ra Yeremiya, a ku ka yena:

12“Teka muprofeta, u n'wi hlayisa swinene; u nga tshuki u n'wi xanisa, kambe u n'wi endlela leswi a swi kombelaka.”

13Hiloko Nebuzaradani ndhuna ya vasirheleri, na Nebuxazibani ndhunankulu, na Nergala-Sarezere xandla xa hosi, ni tindhuna tin'wana hinkwato ta hosi ya le Babilona

14va rhuma vanhu ku ya teka Yeremiya exivaveni xa varindzi, va vuya na yena. Kutani va kombela Gedaliya n'wana Ahikama wa Xafani leswaku a amukela muprofeta ekaya ka yena, a n'wi hlayisa. Kutani Yeremiya a tshama kona, exikarhi ka varikwavo.

15Siku rin'wana, loko Yeremiya a ha pfaleriwile exivaveni xa varindzi, HOSI Xikwembu xi vulavula na yena, xi ku:

16“Yana u ya tivisa Ebede-Meleke lowa Muetiyopiya leswaku ndzi ni mahungu na yena, mina HOSI ya matimba hinkwawo Xikwembu xa Israele. Mahungu ya kona hi lama nge: ‘Yingisa wena Ebede-Meleke, ndzi ta hetisa leswi ndzi swi vuleke ehenhla ka muti lowu wa Yerusalema; ndzi ta wu ba, ku nga ri ku wu katekisa, kutani ku biwa loku ku ta endliwa sweswi-sweswi, u ri karhi u swi vona hi mahlo.

17Kambe loko a ri wena, mina HOSI ndzi ri, a ndzi nga ku nyiketi emavokweni ya lava u va chavaka,

18kambe ndzi ta ku sirhelela, kutani u nga ka u nga dlayiwi hi valala. U ta ponisa vutomi bya wena, hikuva u vekile ku tshemba ka wena eka mina. Ndzi vula sweswo mina HOSI.’ ”

← Chapter 38 Jump to: Chapter 40 →