1 Corinthians 6

Tsonga Xitsonga (Bibele) 1929

← Chapter 5 Jump to: Chapter 7 →

1Munhu eka n'wina, loko a ri ni mhaka ya ku tengisana ni un'wana a nga chavi ha yini ku avanyiseriwa hi lavo biha, ku nga ri hi vakwetsimi xana?

2Xana a mi swi tivi leswaku vakwetsimi va ta avanyisa misava? Kutani loko misava yi avanyisiwa hi n'wina, xana a swi mi lulamelanga ha yini ku avanyisa mitengo leyitsongo xana?

3Xana a mi swi tivi leswaku hi ta avanyisa tintsumi xana? Loko swi ri tano, a hi nga ti avanyisa timhaka ta vutomi lebyi hi ku tlurisa ngopfu xana?

4Kutani loko mi ri ni mitengo ya vutomi lebyi, hlawulani lava soriwaka va Kereke ku va vaavanyisi!

5Ndzi vula sweswo ku mi khomisa tingana. Xana a ku na un'wana wo tlhariha exikarhi ka n'wina, hambi a ri un'we, la tivaka ku avanyisela munhu ni makwavo xana?

6Kambe makwa wa munhu u ya hehla makwavo, kutani va endlisa sweswo ni le mahlweni ka lava nga pfumeriki!

7Kasi i nandzu swinene ka n'wina, loko mi ri ni mitengo exikarhi ka n'wina. Xana a swi antswi eka n'wina ku xanisiwa kutsongo? Xana a swi antswi eka n'wina ku dyeleriwa kutsongo?

8Kasi sweswi, hi n'wina mi dyohelaka van'wana, hi n'wina mi va dyelelaka, kutani leswo, mi swi endla eka vamakwenu:

9Xana a mi swi tivi leswaku lavo biha va nga ka va nga dyi ndzhaka ya ku fuma ka Xikwembu xana?

10Mi nga tshuki mi lahleka: Loko va ri va thyaka, ni lava gandzelaka swifaniso, ni vaoswi, ni swipombolo, ni loko va ri va Sodoma, ni vayivi, ni lava navelaka rifuwo, ni vapyopyi, ni lava hlevaka van'wana, ni lava dyelelaka, lavo tano, va nga ka va nga dyi ndzhaka ya ku fuma ka Xikwembu.

11Kambe hi leswi van'wana ingi va ri swona eka n'wina; kambe mi hlantswiwile, kambe mi kwetsimisiwile, kambe mi hlayiwile lava lulameke hi vito ra Hosi Yesu, ni Moya wa Xikwembu xa hina.

12“Swilo hinkwaswo eka mina swa pfumeleleka,” kambe a hi hinkwaswo leswi nga ni vunene; “swilo hinkwaswo swa pfumeleleka eka mina,” kambe ndzi nga ka ndzi nga fumiwi hi xin'wana a swona.

13“Swakudya, i swa khwiri, kutani khwiri i ra swakudya”; kambe Xikwembu xi ta herisa swona na rona.

14Kambe miri a wu vumberiwanga vuoswi, kambe i wa Hosi; ni Hosi, i ya miri. Kambe Xikwembu xi pfuxile Hosi, na hina xi ta hi pfuxa hi matimba ya xona.

15Xana a mi swi tivi leswaku miri wa n'wina i swirho swa Kriste xana? Xana ndzi nga susa swirho swa Kriste ku swi endla swirho swa muoswi xana?

16E-e, ni ku ringa! Xana a mi swi tivi leswaku la tihlanganisaka ni mbiri u tiendla miri wun'we na yona xana? Hikuva va te: “Vambirhi yi ta va nyama yin'we ntsena!”

17Kutani la tihlanganisaka ni Hosi u tiendle moya wun'we na yona. Chavani vuoswi.

18Xidyoho xin'wana ni xin'wana lexi endliwaka hi munhu xi le handle ka miri wa yena; kambe la oswaka u tidyohela miri wa yena.

19Xana a mi swi tivi leswaku miri wa n'wina i tempele ya Moya lowo Kwetsima, lowu nga kona eka n'wina, lowu mi wu nyikiweke hi Xikwembu,

20ni leswaku a mi tifumi? Hikuva mi kutsuriwile hi nxavo lowo nonon'hwa; dzunisani Xikwembu hakona emirini wa n'wina, ni le moyeni wa n'wina leswi nga swa Xikwembu.

← Chapter 5 Jump to: Chapter 7 →