1 Thessalonians 4

Tsonga Xitsonga (Bibele) 1929

← Chapter 3 Jump to: Chapter 5 →

1Loko swi ri tano vamakwerhu, ha mi khongelela ni ku mi khongotela hi Hosi Yesu leswaku, kukota leswi mi dyondzeke eka hina hilaha mi faneleke ku famba hakona, ni ku tsakisa Xikwembu, swi endleni hi ku tlurisisa.

2Hikuva mi tiva ku lerisa loku hi mi nyikeke kona hi vito ra Hosi Yesu;

3hikuva ku rhandza ka Xikwembu hileswaku mi kwetsimisiwa, ni leswaku mi tshika vuoswi,

4ni leswaku un'wana ni un'wana wa n'wina a tiva ku hlayisa miri wa yena eku kwetsimeni ni le ku lulameni,

5ku nga ri ku navela swa thyaka kukota vahedeni lava nga tiviki Xikwembu.

6Munhu a nga tshuki a kandziyela makwavo, hambi ku ri ku n'wi dya, ni ku n'wi kanganyisa emhakeni, ni loko yi ri yin'we hikuva Hosi i murihiseri wa swilo hinkwaswo leswo tano, kukota leswi hi tshamaka hi mi byela khale hi ku vurisa loku tiyeke.

7Hikuva Xikwembu a xi hi vitanelangi ethyakeni, kambe eku kwetsimeni.

8Hikwalaho la hi sandzaka a nga sandzi munhu, kambe u sandza Xikwembu lexi ngheniseke Moya wa xana lowo saseka eka n'wina.

9Loko ku ri ku rhandzana ka vamakwavo, a hi mhaka leyi ndzi fanelaka ku mi tsalela ha yona, hikuva mi dyondzisiwe hi Xikwembu ku rhandzana,

10kutani hi swona leswi mi swi endlaka eka vamakwavo hinkwavo va le Makedoniya hinkwako; kambe ha mi khongotela, vamakwerhu, leswaku mi kula erirhandzwini rolero;

11kutani mi dyondza ku hanya hi ku rhula, mi endla swa n'wina ntsena, mi tirha hi mavoko ya n'wina, hilaha hi nga mi byela hakona;

12mi ta hanya hi mukhuva lowo fanelaka hikwalaho ka lava nga ehandle, mi nga ti pfumala nchumu.

13Kambe a ndzi rhandzi, vamakwerhu leswaku mi nga tivi timhaka ta lava tietleleleke, mi nga ti vaviseka kukota van'wana lava nga riki na ku tshemba.

14Hikuva loko hi pfumela leswaku Yesu a file a tlhela a pfuka, na kona, hi fanele ku pfumela leswaku lava etleleke, Xikwembu xi ta va pfuxa ha Yesu, xi va vuyisa na yena.

15Hikuva ha mi byela leswi hi rito ra Hosi leswaku, loko hi ri hina, lava nga ta hanya, lava nga ta salela ku ta ka Hosi, hi nga ka hi nga rhangeli lava etleleke;

16hikuva yona Hosi hi xiviri yi ta xika hi le tilweni, hi huwa leyi lerisiweke, hi rito ra ndhuna ya ntsumi, ni mhalamhala ya Xikwembu, kutani lava feleke ka Kriste va ta rhanga va pfuka;

17kutani hina lava hanyaka, lava hi salaka, hi ta tekeriwa emapapeni swin'we na vona, ku ya hlangana ni Hosi empfhukeni, kutani hi mukhuva wolowo hi ta va ni Hosi hilaha ku nga heriki.

18Hikwalaho-ke chavelelanani hi marito walawo.

← Chapter 3 Jump to: Chapter 5 →