1 Timothy 4

Tsonga Xitsonga (Bibele) 1929

← Chapter 3 Jump to: Chapter 5 →

1Kambe Moya wu vurisile leswaku emikarhini ya le ndzhaku, van'wanyana va ta tlhela eku pfumeleni, va namarhela mimoya leyi kanganyisaka, ni tidyondzo ta mademona,

2hi ku ya hi ku kanganyisa ka vafundhisi lavo hemba, lava mapfalo ya vona ma feke, lava nga ta sivela vanhu ku tekana;

3va ku: A ku tshikiwe swakudya leswi Xikwembu xi swi vumbeleke lava pfumeleke ni lava tivaka ntiyiso, leswaku va xi amukela hi ku khensa;

4hikuva hinkwaswo leswi vumbiweke hi Xikwembu swi sasekile, kambe a ku na nchumu lowu faneleke ku cukumetiwa loko wu amukeriwa hi ku khensa;

5hikuva hinkwaswo swi kwetsimisiwile hi rito ra Xikwembu ni xikhongelo.

6Loko u hlamusela timhaka leti, u ta va nandza lonene wa Yesu Kriste, ni la kurisiweke hi marito ya ku pfumela, ni dyondzo leyinene, leyi u yi landzeleleke swinene.

7Kambe u ala timhaka ta swahava, ni mitsheketo ya swidyuhati, u titiyisa evukhongerini.

8Hikuva ku titiyisa emirini swa pfunanyana; kambe vukhongeri byi pfuna hinkwako, byi ni ku tshembisa ka vutomi bya sweswi ni ka lebyi nga ta ta.

9Mhaka leyi yi tiyile, yi fanele ku amukeriwa swinene.

10Hikuva, hikwalaho ka yona, a hi chavi mikarhalo ni ku sandziwa, hikuva hi langutele Xikwembu lexi hanyaka, a nga Mulondzovoti wa vanhu hinkwavo, ngopfu wa lava pfumelaka.

11Letela vanhu timhaka leti, u va dyondzisa tona.

12Ku nga tshuki ku va ni la tsan'waka vuntshwa bya wena, kambe u va wena xikombiso xa vapfumeri, eku vulavuleni, ni le ku tihanyeleni, ni le rirhandzwini, ni le ku pfumeleni, ni le ku tengeni.

13U tinyiketa ku hlaya, ni ku khongotela, ni ku dyondzisa, ndzi ko ndzi ta.

14U nga rivali nyiko leyi u nga na yona, leyi u yi nyikiweke hi ku bvumbha, hi ku tlhandleka ka mavoko ya nhlengeletano ya vakulukumba.

15Anakanya timhaka leti, u va eka tona, leswaku ku ya emahlweni ka wena ku voniwa hi vanhu hinkwavo.

16U tilangutela, wena, ni ku dyondzisa ka wena, kutani u tiya kona, hikuva loko u endlisa sweswo, u ta tihanyisa; u ta hanyisa ni lava ku yingisaka.

← Chapter 3 Jump to: Chapter 5 →