2 Timothy 4

Tsonga Xitsonga (Bibele) 1929

← Chapter 3 Jump to:

1Ndza ku khongotela emahlweni ka Xikwembu ni Hosi ya hina, Yesu Kriste, loyi a nga ta avanyisa lava hanyaka ni lava feke, enkarhini wa ku humelela ka ku fuma ka yena, ndzi ri:

2Huwelela rito, u phikelela hi nkarhi, ni loko wu nga ri nkarhi; u laya, u tshinya, u khongotela hi ku yingisela hinkwako, ni ku dyondzisa.

3Hikuva ku ta humelela nkarhi lowu vanhu va nga taka va nga yingiseri dyondzo leyi hanyisaka; kambe hi ku navela ka vona, va ta tihlengeletela vafundhisi, va ri karhi va tiphumunha tindleve,

4kutani va ta hambukisa tindleve ta vona entiyisweni, va ta hundzukela emitsheketweni.

5Kambe wena, hiteka etimhakeni hinkwato, amukela makhombo, tirha ntirho wa muvuri wa Evhangeli, u hetisa ntirho wa wena.

6Hikuva, loko ndzi ri mina, ndzi kotisa mhamba leyi humesiwaka egandzelweni, kutani nkarhi wa ku suka ka mina wu le kusuhi.

7Ndzi lwile ku lwa lokunene, ndzi hetisile ku tsutsuma ka mina, ndzi hlayisile ku pfumela;

8leswi seleke hileswaku harhi ya ku lulama yi ndzi tshamele, leyi Hosi yi nga ta ndzi nyika siku lero, yena a nga muavanyisi lowo lulama; kambe a nga ka a nga nyiki mina ntsena, kambe hinkwavo lava nga ta va va rhandzile ku humelela eka yena.

9Hatlisa ku ta eka mina sweswi;

10hikuva Demasi u ndzi siyile hi ku rhandza swa nkarhi wa sweswi, kutani u tifambele eTesalonika; Kreskene u yile eGalatiya, na Tito u yile eDalamatiya;

11ku sele Luka ntsena na mina. Teka Marka, u ta na yena, hikuva u ndzi pfuna ngopfu entirhweni.

12Ndzi rhumile Tixiko eEfesa.

13Siku u taka, vuyisa jasi leri ndzi ri siyeke eTrowasi eka Karpo, na tona tibuku, ngopfu leta madzovo.

14Aleksandro, mufuri wa nsuku, u ndzi pfuxele makhombo layo tala; Hosi yi ta n'wi tlherisela leswi faneleke mitirho ya yena!

15U tivonela yena, hikuva u arile ngopfungopfu marito ya hina.

16A ku na loyi a ndzi yimeleke eku hlamuleni ka mina ka ku rhanga ehubyeni, kambe va ndzi fularhele hinkwavo; Xikwembu xi nga tshuki xi va hlayela nandzu wolowo.

17Kambe Hosi yi ndzi yimerile, yi ndzi tiyisile leswaku ku dyondzisa ku tiyisiwa ha mina, vamatiko hinkwavo va ta ku twa, kutani ndzi damurhutiwile enon'wini wa nghala.

18Kambe Hosi yi ta hamba yi ndzi damurhuta emitirhweni hinkwayo leyo biha, yi ndzi hanyisa ku nghena eku fumeni ka yona loku nga etilweni. Ku twala a ku ve ka yena hi mikarhi ni mikarhi! Amen!

19Rungula Prisila na Akwila, ni va yindlu ya Onesiforo.

20Erasto u sele eKorinto; loko a ri Trofimo, ndzi n'wi siyile eMileta a vabya.

21Hatlisa ku ta, vuxika byi nga si fika. Yubulo wa ku rungula, na Pude, na Lino, na Klawudiya, ni vamakwerhu hinkwavo.

22Hosi Yesu Kriste a yi ve ni moya wa wena! Tintswalo a ti ve na n'wina!

← Chapter 3 Jump to: