Amos 9

Tsonga Xitsonga (Bibele) 1929

← Chapter 8 Jump to:

1Ndzi vonile Hosi yi yimile ekusuhi ni alitari, yi ku: “Bana xihlungwana xa yindlu, ku ninginika ni marimba ya nyangwa; u swi tshovela henhla ka tinhloko ta vona hinkwavo. Lava seleke ndzi ta va dlaya hi fumu; ku nga ka ku nga vi na un'we eka vona la nga ta baleka, ni loko a ri un'we la nga ta pona.

2Hambi va nga boxa xivandla xa vafi va chavela kona, na kona voko ra mina ri ta va humesa; ni loko va nga tlhandlukela etilweni ndzi ta va xikisa kona.

3Ni loko va nga tifihla enhlohlorhini ya Karmele, ndzi ta va lavisisa kona, ndzi va khoma; ni loko va tifihlela emahlweni ya mina eswidziveni swa lwandle kona ndzi ta lerisa nyoka leswaku yi va luma.

4Ni loko va ya evukhumbini, va byisiwa hi valala va vona, na kona, ndzi ta lerisa fumu leswaku ri va dlaya; ndzi ta va honokela hi mahlo ku va endla swo biha ku nga ri ku va endla swinene.”

5Hikuva la endlaka sweswo i Hosi, Yehovha wa tinyimpi; u khumba misava, kutani yi n'oka; hinkwavo lava akeke eka yona va hlomuka, yi kukumuka hinkwayo ku kota nambu, yi tlhela yi phya ku kota nambu wa Egipta.

6Wa aka tindlu ta yena leti tlakukeke etilweni, u veka tilo ri endla lwangu ehenhla ka misava, u vitana mati ya lwandle a ma halatela henhla ka misava; vito ra yena i Yehovha.

7“Xana eka mina a mi fani na vana va Kuxi, n'wina, vana va Israele?” ku vula Yehovha. “Xana a ndzi humesanga Israele etikweni ra Egipta, kukota loko ndzi humesile Vafilista eKafitoro, ni Vasiriya eKiri?

8Vonani, mahlo ya Hosi Yehovha ma honokele ku fuma loku teleke swidyoho, ndzi ta ku herisa ehenhla ka misava; ntsena ndzi nga lovisi yindlu ya Yakobo emakumu,” ku vula Yehovha.

9“Hikuva, vonani, ndzi ta lerisa, kutani ndzi ta hlela yindlu ya Israele exikarhi ka matiko hinkwawo, ku kota loko ku hlunguriwa mavele hi rihlelo, ku nga sali ni ndzhoho leyi welaka ehansi.

10Vadyohi hinkwavo va tiko ra mina lava nge: ‘Khombo ri nga ka ri nga va tshineleri, ri nga ka ri nga va khomi, va ta dlawa hi fumu.’

11“Hi siku rero, ndzi ta pfuxa ntsonga wa Davhida lowu weke, ndzi siva timfa ta khumbi ra wona, laha ri mbundzukeke ndzi ta ri lunghisa, ndzi ta wu aka wu fana ni le mikarhini ya khale;

12va ta fuma leswi saleke swa Edomu, ni matiko hinkwawo lama nga ta vitaniwa hi vito ra mina,” ku vula Yehovha, yena la nga ta endla sweswo.

13“Vonani, masiku ma ta,” ku vula Yehovha, “lawa la rimaka a nga ta landzela kusuhi la tshovelaka, ni la pfuvaka mihandzu ya vhinya a landzela la byalaka mbewu; kutani vhinyo leyintshwa yi ta khulukela etintshaveni, ni switsunga hinkwaswo swi ta pfelela yona.

14Ndzi ta tshunxa tiko ra mina ra Israele evukhumbini bya rona, kutani va ta pfuxa miti leyi onhakeke va aka kona; va ta rima masimu ya vhinya, va nwa vhinyo ya wona, va ta rima mitanga ya mirhi va dya mihandzu ya yona.

15“Ndzi ta va byala etikweni ra vona, a va nga ha tlheri va tsuvuriwa etikweni ra vona leri ndzi va nyikeke rona,” ku vula Yehovha, Xikwembu xa wena.

← Chapter 8 Jump to: