Job 1

Tsonga Xitsonga (Bibele) 1929

Jump to: Chapter 2 →

1Munhu a a ri kona etikweni ra Usi, vito ra yena a a ri Yobo. A a ri munhu la fambaka hi ku tenga ni ku lulama; a chava Xikwembu, a tinga swo biha.

2A a velekile vana va ntlhanu na vambirhi, ni vanhwanyana vanharhu.

3Swifuwo swa yena a ti ri tinyimpfu ta 7 000, ni tikamela ta 3 000, ni tihomu leti ringanaka majoko ya 500, ni timbhongolo ta matswele ta 500, ni malandza layo tala; munhu yeloyi a a tlula vavanuna hinkwavo va le vuxeni hi vukulu.

4Vana va yena a va ri ni mukhuva wo endlelana mikhuvo etindlwini ta vona, un'wana ni un'wana hi siku ra yena; a va vitana ni vamakwavo va xisati lavanharhu ku ya dya ni ku nwa na vona.

5Kuteloko va hetile mikhuvo ya vona, Yobo a a va vitana ku ta va basisa, a pfuka nimixo, a tlhava magandzelo yo hisiwa lama ringanaka ntsengo wa vona hinkwavo, hikuva Yobo a a ku: “Kumbe vana va mina va dyohile; va rivele Xikwembu etimbilwini ta vona.” Yobo a a tshama a endlisa sweswo hi masiku hinkwawo.

6Siku rin'wana vana va Xikwembu va ya humelela emahlweni ka Yehovha na yena Satana a nghena exikarhi ka vona.

7Kutani Yehovha a ku eka Satana: “U huma kwihi?” Satana a hlamula, a ku eka Yehovha: “Ndzi huma emisaveni, a ndzi valanga kona.”

8Yehovha a ku eka Satana: “A ku tsundzukanga Yobo nandza wa mina xana? Hikuva a ku na munhu la fanaka na yena emisaveni, la fambaka hi ku lulama ni ku tenga, la chavaka Xikwembu ni ku fularhela swo biha.”

9Satana a hlamula, a ku eka Yehovha: “Xana Yobo a chava Xikwembu ntsena?

10Xana a hi leswi u n'wi sivelelaka yena, ni yindlu ya yena, ni swilo hinkwaswo swa yena-ke? A ku andzisanga mitirho ya mavoko ya yena, ni ku andzisa mitlhambi ya yena emisaveni xana?

11Wa nga tshambuluta voko ra wena u khumba hinkwaswo leswi a nga na swona, u ta vona xana a nga ka a nga ku sandzi emahlweni erivaleni-ke?”

12Yehovha a ku eka Satana: “Vona, leswi a nga naswo hinkwaswo, ndzi swi veka emavokweni ya wena; ntsena, u nga yisi voko ra wena emirini wa yena.” Kutani Satana a suka emahlweni ka Yehovha.

13Hi siku rin'wana, vana va Yobo va xinuna ni va xisati, kakuloko va dya, va nwa vhinyo endlwini ya hosi ya vona,

14ku fika ntsumi eka Yobo, yi ku eka yena: “Tihomu a ti rima, ni timbhongolo a ti dya ekusuhi na tona;

15kutani va ka Xeba va hi wela ehenhla, va teka swifuwo, va dlaya varisi hi matlhari; ku pona mina ntsena ndzi ku byelaka.”

16Kakuloko yeloyi a ha vulavula, ku fika un'wana, a ku: “Ndzilo wa Xikwembu wu wile hi le henhla, wu hisile tinyimpfu ni varisi, va herile; ku lo pona mina ntsena ndzi ku byelaka.”

17Yeloyi loko a ha vulavula, ku fika un'wana, a ku: “Vakalediya va mavandla manharhu va wele tikamela ehenhla, va ti byisa, va dlaya ni varisi hi matlhari; ku pona mina ntsena ndzi ku byelaka.”

18Yeloyi a ha vulavula, ku fika un'wana a ku: “Vana va wena va vavanuna ni va vavasati loko va ri karhi va dya, va nwa vhinyo endlwini ya hosi ya vona,

19moya lowukulu wu huma hi le mananga, wu ba tinhla ta mune ta yindlu, yi wela ehenhla ka vona, yi va dlaya, ku pona mina ntsena ndzi ku byelaka.”

20Yobo a yima, a handzula tinguvu ta yena, a byewula nhloko, a tiwisa ehansi a khinsama, a ku:

21“Ndzi humile ekhwirini ra manana ndzi ri hava nchumu, ndzi ta tlhelela kona ndzi ri hava nchumu. Yehovha u ndzi nyikile, Yehovha u tlhele a teka; a ku dzunisiwe vito ra Yehovha!”

22Eka swona hinkwaswo, Yobo a nga sandzanga, a nga vekangi nandzu eka Xikwembu, ni lowutsongo.

Jump to: Chapter 2 →