Jonah 2

Tsonga Xitsonga (Bibele) 1929

← Chapter 1 Jump to: Chapter 3 →

1Kutani Yehovha a rhuma nhlampfi leyikulu ku mita Yonasi;

2kutani Yonasi a tshama ekhwirini ra nhlampfi masiku manharhu ni vusiku byinharhu. Kutani Yonasi a khongela Yehovha, Xikwembu xa yena, a ri ekhwirini ra nhlampfi,

3a ku: “Ndzi huwelele eka Yehovha enhlomulweni wa mina, kutani u ndzi yingisile, ndzi huwelele ndzi ri ekhwirini ra xivandla xa vafi, kambe u yingisile rito ra mina.

4U ndzi cukumetile exidziveni, embilwini ya malwandle nambu wu ndzi rhendzele; mavimbi hinkwawo ya wena ni magandlati ya wena ma ndzi hundzele ehenhla.

5Mina a ndzi ku: ‘Ndzi hlongoriwe ekule ni mahlo ya wena; kambe ndzi ta tlhela ndzi vona tempele ya ku kwetsima ka wena!’

6Mati ma ndzi rhendzele, ma fika ni le moyeni wa mina; a ndzi tsondzeriwa hi xidziva; mabyanyi ya lwandle ma damarele nhloko ya mina.

7A ndzi xikile ku ya fika etimitswini ta tintshava; misava yi ndzi pfalerile makumu hi mipfungura ya yona kambe wena Yehovha, Xikwembu xa mina u ta tsavula vutomi bya mina esirheni!

8Kakuloko moya wa mina wu hlala endzeni ka mina ndzi tlhela ndzi ehleketa Yehovha, kutani ku khongela ka mina ku fikile eka wena, etempeleni ya ku kwetsima ka wena.

9Lava tinyiketaka eka leswa hava, va titsonela tintswalo.

10Kambe mina ndzi ta ku tisela mhamba ya mina, ndzi vula ku dzuneka ka wena; ndzi va ndzi hetisisa leswi ndzi swi hlambanyeke. Ku hlayiseka ku huma eka Yehovha.”

11Kavaloko Yehovha a lerisa nhlampfi, kutani yi ya hlanta Yonasi laha ku omeke.

← Chapter 1 Jump to: Chapter 3 →