Judges 2

Tsonga Xitsonga (Bibele) 1929

← Chapter 1 Jump to: Chapter 3 →

1Kutani ntsumi ya Yehovha yi suka eGiligala yi tlhandlukela eBokimi, yi ku: “Ndzi te ndzi ta mi humesa eEgipta, ndzi mi tisa etikweni leri ndzi hlambanyeke leswaku ndzi ta ri nyika vatata wa n'wina; a ndzi te, ndzi nga ka ndzi nga onhi ni siku ni rin'we ntwanano wa mina lowu ndzi wu endleke na n'wina.

2A ndzi ku: ‘Na n'wina mi nga ka mi nga endli ntwanano ni lava akeke etikweni leri, kambe mi mbundzuxa tialitari ta vona.’ Kambe a mi yingisangi rito ra mina. Mi endlele yini sweswo xana?

3Loko swi ri tano, ndzi te: ‘Ndzi nga ka ndzi nga va hlongorisi emahlweni ka n'wina; va ta kotisa mitwa ematlhelweni ya n'wina, ni swikwembu swa vona swi ta va mitlhamu eka n'wina.’ ”

4Kakuloko ntsumi ya Yehovha ya ha vulavula timhaka teto eka vana va Israele hinkwavo, tiko ri kolola hi ku rila.

5Hikwalaho, va thya xivandla xexo vito ra Bokimi (varili), kutani va humesela Yehovha magandzelo kona.

6Yoxuwa, kuteloko a tlherisile tiko, vana va Israele va muka, un'wana ni un'wana endzhakeni ya yena ku fuma tiko.

7Kutani tiko ri tirhela Yehovha hi masiku hinkwawo ya Yoxuwa, ni masiku hinkwawo lawa vakulukumba va nga hanya ha wona endzhaku ka Yoxuwa, va ri lava voneke mitirho hinkwayo leyikulu leyi Yehovha a yi endleleke vana va Israele.

8Kutani Yoxuwa, n'wana Nuni, nandza wa Yehovha, a fa a ri ni malembe ya dzana ni khume.

9A lahliwa etikweni ra ndzhaka ya yena, eTiminata-Heresi, entshaveni ya Efrayimi, hitlhelo ra n'walungu ka ntshava ya Gaaxi.

10Na vona vanhu va nkarhi lowuya hinkwavo, va tlhelela eka vatata wa vona, kutani ku humelela vanhu va nkarhi lowu, lava nga tivangiki Yehovha, hambi yi ri mitirho leyi a yi endleleke Israele.

11Kutani Vaisraele va endla leswo biha emahlweni ka Yehovha, va tirhela Baali.

12Va fularhela Yehovha, Xikwembu xa vatata wa vona, la nga va humesa etikweni ra Egipta; va landzela swikwembu swin'wana, swi nga swikwembu swa matiko lawa ma va rhendzeleke, va swi khinsamela va karihisa Yehovha.

13Va fularhela Yehovha, va tirhela Baali ni va Astarte.

14Kutani ku kariha ka Yehovha ku pfurhela Vaisraele, a va nyiketa emavokweni ya vaonhi lava va onhaka, kutani a va nyiketa emavokweni ya valala va vona lava va va rhendzeleke; va tsandzeka ku yima emahlweni ka valala va vona.

15Hinkwako laha va yaka kona, voko ra Yehovha a ri lwa na vona, hilaha Yehovha a nga vula hakona, ni hilaha Yehovha a va hlambanyeleke hakona, kutani va va ekhombyeni lerikulu.

16Hambiswiritano, Yehovha a va humesela vaavanyisi, va va lamulela emavokweni ya lava va va onhaka.

17Na swona a va yingisangi vaavanyisi va vona, kambe va tinyiketa eka swikwembu swin'wana, va swi khinsamela, kutani va hatlisa ku hambuka endleleni leyi vatata wa vona va nga famba ha yona, loko va ri karhi va yingisa milawu ya Yehovha, kambe vona a va endlanga swona.

18Kakuloko Yehovha a a va humesela vaavanyisi, Yehovha a a ri ni muavanyisi, a a va lamulela emavokweni ya valala va vona hi masiku hinkwawo ya muavanyisi, hikuva Yehovha a a hundzuka hi ku twa swirilo swa vona loko va ririsiwa hi lava va va xanisaka ni lava va va karhataka.

19Loko muavanyisi a file, a va engeta va tionha va tlula vatata wa vona hi ku landzelela swikwembu swin'wana, leswaku va swi tirhela ni ku khinsama emahlweni ka swona, va nga hunguti nchumu eka mitirho ya vona ni mikhuva ya vona leyo nonon'hwa.

20Kutani ku kariha ka Yehovha ku pfurhela Vaisraele, a ku: “Leswi tiko leri ri onheke ntwanano lowu ndzi wu endleke ni vatata wa vona ri nga yingisanga rito ra mina,

21na mina ndzi nga ka ndzi nga hlongorisi munhu ni un'we wa matiko lama siyiweke hi Yoxuwa siku a faka.

22Ndzi ta ringa Vaisraele ha wona, ndzi ta vona loko kumbe va ta hlayisa ndlela ya Yehovha ku famba ha yona, kukotisa leswi vatata wa vona va nga yi hlayisa, kumbe a swi nga vi tano.”

23Hikwalaho Yehovha a siya matiko lawa, a nga hatlisi ku ma hlongorisa, hikuva a nga ma nyiketanga emavokweni ya Yoxuwa.

← Chapter 1 Jump to: Chapter 3 →