Micah 5

Tsonga Xitsonga (Bibele) 1929

← Chapter 4 Jump to: Chapter 6 →

1Sweswi, tilunghise, Siyoni wa mavandla! Hi ta rhendzeriwa hi valala; va n'wi ba hi xigombo erhameni, yena muavanyisi wa Israele!

2Loko u ri wena Betlehema-Efrata, u lontsongo ku hlayiwa exikarhi ka tinxaka ta Yuda, eka wena ku ta huma loyi a nga ta va hosi ya Israele, a nga loyi a nga kona ka ha ri eku sunguleni, emikarhini leyi nga riki na ku sungula.

3Hikwalaho u ta va nyiketa valala, ku ko ku fika nkarhi lowu muveleki a nga ta veleka ha wona, vamakwavo lava seleke va ta tlhela hinkwavo eka vana va Israele.

4U ta yima, a risa hi matimba ya Yehovha, ni ku kwetsima ka vito ra Yehovha, Xikwembu xa yena; va ta aka hi ku rhula, hikuva u ta va nkulukumba ku yisa emakun'wini ya misava.

5U ta vuyisa ku rhula. Kutakuloko Muaxuru a nghena etikweni ra hina a khandziya etindlwini ta hina ta vuhosi, hi ta va ni valanguteri va 7, hambi ti ri tihosi ta vanhu ta 8 ku n'wi sivela.

6Va ta risa tiko ra Asiriya hi fumu, va langutela ni le tinyangweni ta tiko ra Nimrodo; yena u ta hi lamulela eka Asiriya, siku a nghenaka etikweni ra hina, ni loko a tlula mindzilekana ya hina.

7Lava seleke va ka Yakobo va ta va exikarhi ka matiko lamanyingi kukotisa mberha leyi humaka eka Yehovha, ni mathonsi lama nga ehenhla ka byanyi; lama nga languteleki ku lerisa ka munhu, hambi ku ri ku fumiwa hi vana va vanhu.

8Kambe lava seleke va Yakobo va ta va exikarhi ka matiko ni tinxaka leto tala kukotisa nghala exikarhi ka swiharhi swa nhova, ni xinghalana exikarhi ka ntlhambi wa tinyimpfu; yi nga loko yi hundza yi kandziyela, yi handzula, ku nga ri na loyi a ponisaka!

9Voko ra wena a ri tlakukele lava ku xanisaka, valala va wena a va herisiwe hinkwavo!

10Hi siku lero, ku vula Yehovha, ndzi ta lovisa tihanci ta wena, ndzi herisa ni tigolonyi ta wena;

11ndzi ta lovisa miti ya tiko ra wena, ndzi nhlanhla makhokholo ya wena hinkwawo.

12Kutani ndzi ta susa ku kanganyisa evokweni ra wena, ni vangoma a va nga ha vi kona eka wena.

13Loko swi ri swifaniso swa wena leswi vatliweke ni leswi chuluriweke, ndzi ta swi herisa exikarhi ka wena, a ku nga ha khinsameri mitirho ya mavoko ya wena.

14Kutani ndzi ta tsuvula swifaniso swa Axera leswi nga eka wena, ndzi herisa miti ya wena;

15ndzi ta tirihisela hi vurhenha ni ku kariha ehenhla ka matiko lama nga yingisangiki.

← Chapter 4 Jump to: Chapter 6 →