Obadiah 1

Tsonga Xitsonga (Bibele) 1929

Jump to:

1Hosi Yehovha u vulavula sweswo ehenhla ka Edomu, u ri: Hi twe mhaka leyi pfaka eka Yehovha, kutani murhumiwa u rhumiwe exikarhi ka matiko, u ri: “Pfukani, a hi pfukeni hi n'wi hlomela!”

2Vona, ndzi ku endle lontsanana exikarhi ka matiko u soriwa ngopfungopfu!

3Ku tikukumuxa ka mbilu ya wena ku ku xisile, wena la akeke emabakweni ya maribye, endlwini ya wena leyi tlakukeke; u ri embilwini ya wena: “I mani la nga ta ndzi wisela ehansi?”

4Ni loko u nga aka yindlu ya wena eku tlakukeni, ku fana ni gama, ni loko u nga tiveka exikarhi ka tinyeleti, na kona, ndzi ta ku xikisa, ku vula Yehovha.

5Loko makhamba ma ta eka wena, loko vayivi va ta yiva nivusiku, u nga onherisiwa ku yini! A va nga yivi leswi va ringanaka xana? Loko vakhi va vhinya va fika eka wena, a va nga siyi swidzumbanyana evhinyeni xana?

6Swilo swa Esawu swi lavisisiwe ku yini! Vuhlayiselo bya wena byi lavisisiwe ku yini!

7Vavanuna volavo hinkwavo u endleke xinakulobye na vona, va ku tlherisele endzilakaneni wa wena; vavanuna lava ingi va ri ni ku rhula na wena va ku xisile va ku hlurile. Lava ingi va dya vuswa bya wena, va ku celele marindzi. A ku na ku twisisa eka wena!

8Hi siku rolero, ku vula Yehovha, xana ndzi nga ka ndzi nga lovisi lava vutlhari etikweni ra Edomu, ni ku twisisa entshaveni ya Esawu xana?

9Tinhenha ta wena, Temani, va ta rhurhumela; ku ta herisiwa vavanuna hinkwavo entshaveni ya Esawu hi ku dlawa.

10Hikwalaho ka ku biha koloko u ku endleke eka makwenu Yakobo, u ta funengetiwa hi tingana, u lovisiwa makumu, hilaha ku nga heriki.

11Esikwini leri u nga yima ha rona emahlweni ka yena, esikwini leri valala va yena va phangaka mavandla ya yena, kutani vamatiko va nghena hi tinyangwa ta yena, va hlahluva Yerusalema hi vuhlolotwana, na wena a wu kotisa un'wana wa vona.

12Kambe wena u nga languti siku ra makwenu, siku ra khombo ra yena u nga tsakeli ku hela ka vana va Yuda hi siku ra ku hela ka vona; u nga ahlamisi nomu wa wena hi ku tikukumuxa hi siku ra ku xanisiwa.

13U nga ngheni hi nyangwa ya tiko ra mina hi siku ra ku xaniseka ka rona; u nga tsakisiwi hi ku vaviseka ka rona hi siku ra ku xaniseka ka rona; u nga yisi mavoko ya wena exumeni xa yena, esikwini ra khombo ra yena.

14U nga yimi emahandzeni ya tindlela ku dlaya vanhu va rona lava balekaka, u nga tshuki u nyiketa vabaleki va rona eka valala hi siku ra ku xaniseka.

15Hikuva siku ra Yehovha ri kusuhi, ra ku avanyisa matiko hinkwawo. Lexi u xi endleke, u ta xi endleriwa na wena; swiendlo swa wena swi vuyele Ehenhla ka nhloko ya wena.

16Hikuva kukotisa loko mi nwile entshaveni ya mina leyi hlawulekeke, matiko hinkwawo ma ta nwisa sweswo hi masiku; ma ta nwa ma mita, ma va tanihi loko ingi ma nga ri kona.

17Kambe lava poneke va ta va kona entshaveni ya Siyoni; xi ta va xivandla lexi hlawulekeke, kutani va yindlu ya Yakobo va ta fuma ndzhaka ya vona.

18Yindlu ya Yakobo yi ta va ndzilo, yindlu ya Yosefa yi va langavi; yona yindlu ya Esawu yi va malakarhi; va ta yi hisa, va yi lovisa, ku nga ka ku nga poni nchumu eka yindlu ya Esawu, hikuva Yehovha u vurisile.

19Va tlhelo ra dzonga va ta fuma ntshava ya Esawu, va le rivaleni va fuma tiko ra Vafilista; va ta fuma ni tiko ra Efrayimi ni tiko ra Samariya Benjamini, yena, a fuma Giliyadi.

20Va huvo yoleyo ya vana va Israele lava yisiweke evukhumbini va ta fuma tiko ra Vakanana ku fika eSarepta; va Yerusalema, lava yisiweke evukhumbini eSafarada, va ta fuma miti leyi nge tlhelo ra dzonga.

21Vaponisi va ta tlhandlukela entshaveni ya Siyoni ku ya avanyisa Mhaka ya Esawu; kutani ku fuma ku ta va ka Yehovha.

Jump to: