Revelation 13

Tsonga Xitsonga (Bibele) 1929

← Chapter 12 Jump to: Chapter 14 →

1Kutani ndzi vona xivandza lexi humaka elwandle, xi ri ni timhondzo ta khume, ni tinhloko ta ntlhanu na timbirhi; etimhondzweni ta xona, xi rhwele tihari ta khume etinhlokweni ta xona, ku tsariwile mavito ya xisandzu.

2Xivandza lexi ndzi xi voneke, a xi fana ni yingwe, milenge ya xona yi fana ni milenge ya bere; nomu wa xona wu fana ni nomu wa nghala; kutani dragona yi xi nyika matimba ya yona, ni xiluvelo xa yona, ni vuhosi lebyikulu.

3Kutani ndzi vona nhloko yin'wana ya xona yi tlhaviwile, ingi yi lave ku fa; kambe mbanga ya yona leyi ngi yi fanele ku yi dlaya, yi hola; kutani misava hinkwayo yi hlamala, yi landza xivandza endzhaku.

4Kutani va gandzela dragona hikuva a yi nyikile xivandza matimba ya yona, va gandzela ni xivandza, va ku: “I mani la ringanaka ni xivandza, i mani la nga tiyaka ku lwa na xona?”

5Kutani xi nyikiwa nomu lowu tidzunisaka hi leswikulu, lowu sandzaka; xi nyikiwa ni matimba ya ku tirha hi tin'hweti ta mune wa makume na timbirhi.

6Kutani xi ahlamisa nomu wa xona ku sandza Xikwembu, ni ku sandza vito ra xona; ni tabernakela ya xona, ni lava akeke etilweni.

7Kambe xi nyikiwa ku lwa ni vakwetsimi ni ku va hlula; xi nyikiwa ni matimba ehenhla ka tinxaka hinkwato, ni tindzimi hinkwato, ni matiko hinkwawo, ni swivongo hinkwaswo.

8Kutani hinkwavo lava akeke emisaveni va ta, va ta xi gandzela, lava mavito ya vona ma nga tsariwangiki ebukwini ya vutomi ya Xinyimpfana lexi tlhaviweke, ka hari mpfhuka misava yi tumbuluka.

9La nga ni tindleve, a a yingise.

10Loyi a yisaka van'wana evukhumbini, u ta ya evukhumbini; loyi a dlayaka hi tlhari, na yena u ta fanela ku dlawa hi tlhari, Hilaha ku nga vonakalaka ku tiyisela ni ku pfumela ka vakwetsimi.

11Kutani ndzi vona xivandza xin'wana lexi tlhandlukaka, xi huma emisaveni; a xi ri ni timhondzo timbirhi leti fanaka ni ta xinyimpfana, kutani xi vulavula kukotisa dragona.

12Xi tirha hi matimba hinkwawo ya xivandza xo sungula emahlweni ka xona; kutani xi endla leswaku misava, swin'we ni lava akeke eka yona, va gandzela xivandza lexo sungula, lexi ngi xi ri ni mbanga ya rifu leyi nga hola.

13Xi endla ni masingita lamakulu, hambi ku ri ku xikisa ndzilo wa le tilweni, leswaku wu wela emisaveni emahlweni ka vanhu.

14Xi hambukisa lava akeke emisaveni hi masingita lawa xi nga nyikiwa matimba ya ku ma endla emahlweni ka xivandza, xi ri karhi xi byela lava akeke emisaveni leswaku va endlela xivandza lexi ngi xi ri ni mbanga ya tlhari, xi tlhela xi hanya, xifaniso.

15Kutani xi nyikiwa matimba yo nghenisa ku hefemula exifanisweni xa xivandza leswaku xifaniso xa xi vandza xi tiva ku vulavula, ni ku endla leswaku ku dlawa hinkwavo lava alaka ku gandzela xifaniso xa xivandza.

16Kutani xi endla leswaku vanhu hinkwavo, lavatsongo ni lavakulu, vafuwi ni swisiwana, lava nga fuyiwangiki ni lava fuyiweke va tsariwa mfungho evokweni ra vona ra xinene, hambi ku ri mimombyeni ya vona;

17ni leswaku ku nga tshuki ku va na munhu la tivaka ku xava, kumbe ku xavisa loko a nga ri loyi a nga ni mfungho, kumbe vito ra xivandza, kumbe ntsengo wa vito ra xona.

18Hilaha vutlhari byi nga kona: Loyi a tlhariheke a a ringanise ntsengo wa xivandza, hikuva i ntsengo wa munhu; kutani ntsengo wa xona i 666.

← Chapter 12 Jump to: Chapter 14 →