Romans 16

Tsonga Xitsonga (Bibele) 1929

← Chapter 15 Jump to:

1Febe, makwerhu wa wansati, a nga nandza wa kereke ya Kenikreya, ndza n'wi vula eka n'wina;

2mi n'wi amukela eHosini, kukota leswi vakwetsimi va fanelaka ku amukeriwa kutani mi n'wi pfuna eswilweni hinkwaswo leswi a nga swi lavaka eka n'wina, hikuva, na yena, u pfunile lavo tala, na mina hi xiviri.

3Ndzi runguleleni Prisila na Akwila vatirhikulorhi eka Yesu Kriste,

4hikuva va nyikete tinhloko ta vona ku ndzi ponisa; kambe a hi mina ntsena loyi a va khensaka, kambe na tona tikereke hinkwato ta vamatiko.

5Ndzi runguleleni ni Kereke leyi nga endlwini ya vona. Ndzi runguleleni na Epayineto, murhandziwa wanga, xi nga xirhangana xa Akaya eka Kriste.

6Ndzi runguleleni Mariya la hi tirheleke ngopfu.

7Ndzi runguleleni Androniko na Yuniya, maxaka ya mina, lava tshamaka va bohiwa na mina, kambe va twakele exikarhi ka vaapostola, na swona va ndzi rhangele eka Kriste.

8Ndzi runguleleni Ampliyato, murhandziwa wanga eHosini.

9Ndzi runguleleni Urbano, mutirhi-kulorhi entirhweni wa Kriste, na Stako, murhandziwa wanga.

10Ndzi runguleleni Apele la dzunisiwaka eka Kriste. Ndzi runguleleni ni va yindlu ya Aristobulo.

11Ndzi runguleleni Herodiyoni, xaka ranga. Ndzi runguleleni va yindlu ya Narkiso, lava nga le Hosini.

12Ndzi runguleleni Trifena na Trifosa, vavasati lava tirhelaka Hosi. Ndzi runguleleni Persida, wansati la rhandziwaka; na yena, u tirhile ngopfu entirhweni wa Hosi.

13Ndzi runguleleni Rhufasi, muhlawuriwa wa Hosi, ni mana wa yena, loyi a nga manana, ni le ka mina.

14Ndzi runguleleni Asinkrito na Filego, na Hermesi, na Patroba, na Hermasi ni vamakwavo lava nga na vona.

15Ndzi runguleleni Filologo, na Yuliya, na Neriya, ni makwavo, na Olimpa ni vakwetsimi hinkwavo lava nga na vona.

16Rungulanani hi ku ntswontswana loku hlawuriweke. Tikereke hinkwato ta Kriste ta mi rungula.

17Kutani, vamakwerhu, ndza mi khongotela, ndzi ri: Mi tivonela eka lava pfuxaka ku avana, ni ku khunguvanyisa, va onha dyondzo leyi mi yi dyondzeke; hambanani na vona.

18Hikuva lavo tano a va tirheli Hosi ya hina, Yesu Kriste, kambe va tirhela makhwiri ya vona ntsena; kutani va hambukisa timbilu ta lavo rivala hi marito lama tsakisaka, ma ku lwandla enon'wini.

19Kambe hinkwavo va tiva ku yingisa ka n'wina. Ndzi mi tsakela kwalaho; kambe ndzi rhandza leswaku mi valavo tlhariha eku sasekeni, ni lavo tenga eku biheni.

20Xikwembu xa ku rhula, hi xona lexi nga ta hatlisa ku pfotlosa Satana ehansi ka milenge ya n'wina. Tintswalo ta Yesu Kriste, Hosi ya hina, a ti ve na n'wina!

21Timotiya nakulorhi entirhweni, wa mi rungula; na Lukiyo, na Yaso, na Sosipatro, maxaka ya mina, va mi rungula.

22Mina Tertiyo, mutsari wa epistola leyi, ndza mi rungula eHosini.

23Gayo, loyi ndzi tshamaka eka Yena swin'we ni va Kereke hinkwayo, va mi rungula. Erasto, muhlayisi wa xuma xa muti, na Kwarto, makwerhu, va mi rungula.

24Tintswalo ta Hosi ya hina Yesu Kriste a ti ve na n'wina hinkwenu, Amen!

25Eka loyi a nga ni matimba ya ku mi tiyisa eEvhangelini ya mina, ni le ku dyondziseni ka Yesu Kriste, hi xikombiso xa xihundla lexi ingi xi funengetiwile emikarhini ya vukulukulu,

26kambe sweswi xi humelerisiwile hi matsalwa ya vaprofeta, hi ku lerisa ka Xikwembu lexi nga heriki, xi kombisiwile eka matiko hinkwawo, ma ta tshinela eku yingiseni ka ku pfumela,

27eka xona xi nga Xikwembu xa vutlhari xi ri xoxe, ku ve ku twala, ha Yesu Kriste, hilaha ku nga heriki! Amen!

← Chapter 15 Jump to: