Ruth 2

Tsonga Xitsonga (Bibele) 1929

← Chapter 1 Jump to: Chapter 3 →

1Nahumi a a ri ni xaka ra nuna wa yena, a nga munhu wa rifuwo ni matimba, wa ndyangu wa Elimeleke; vito ra yena a a ri Bowazi.

2Kutani Rhuti wa Mowabu a ku eka Nahumi: “Ndzi kombela ku ya emasin'wini, ndzi ta nkun'hula min'oko mi nga ri mingani, ndzi ta landza loyi ndzi nga ta kuma tintswalo emahlweni ka yena.” Kutani a n'wi hlamula, a ku: “Famba, n'wananga.”

3Kutani a famba, a nghena ensin'wini, a nkun'hula endzhaku ka lava tshovelaka. Kutani a kongomisa ensin'wini ya Bowazi a nga xaka ra Elimeleke.

4Enkarhini lowo Bowazi a pfa eBetlehema, a ku eka lava tshovelaka: “Yehovha a ve na n'wina!” Va n'wi hlamula, va ku: “Yehovha a a ku katekise!”

5Kutani Bowazi a ku eka nandza wa yena la langutelaka vatshoveri: “Wanhwana loyi i mani xana?”

6Nandza la langutelaka vatshoveri, a n'wi hlamula, a ku: “I wanhwana wa Mowabu la nga vuya na Nahumi a etikweni ra Mowabu;

7u te eka hina: ‘Ndzi kombela leswaku ndzi nga nkun'hula, ndzi hlengeleta swinyandzana swi nga ri swingani endzhaku ka lava tshovelaka.’ Kutani a ta, a tshama kona ku suka nimixo ku fika sweswi, a wisanyana ntsena endlwini.”

8Kutani Bowazi a ku eka Rhuti: “Yingisa, n'wananga, u nga tshuki u ya nkun'hula ensin'wini yin'wana; u nga humi kona; kambe sweswi, tshama ni malandza ya mina ya xisati.

9Languta nsimu leyi va nga ta tshovela eka yona, kutani u famba endzhaku ka vona. Ndzi arisile vanhu va mina ku ku khumba. Kutani loko u twa torha u nga ya makhuwaneni, u nwa mati lawa vanhu va mina va ma keke.”

10Kavaloko a wa ehansi hi mombo wa yena, a khinsama, a ku eka yena: “Ndzi kumise ku yini tintswalo emahlweni ya wena xana, leswaku u ndzi tiva, mina ndzi nga wamatiko?”

11Bowazi a hlamula, a ku: “Ndzi tivisiwile swilo hinkwaswo leswi u swi endleleke n'wingi wa wena eku feni ka nuna wa wena, hilaha u tshikeke tata wa wena ni mana wa wena, ni tiko leri u nga tswariwa eka rona, u tile etikweni leri u nga ri tivangiki ni tolo ni tolweni.

12Yehovha a a ku tlherisele leswi u swi endleke! U amukela hakelo leyi hetisekeke ya Yehovha, Xikwembu xa Israele, loyi u teke ku ta chavela etimpapeni ta yena!”

13Kutani a ku eka yena: “Hosi yanga! Ndzi kumile tintswalo emahlweni ka wena, hikuva u ndzi chavelele, u ndzi byerile hilaha mbilu ya mina yi rhandzaka hakona, hambi ndzi nga fani ni un'wana wa malandza ya wena.”

14Bowazi a engeta a ku eka yena enkarhini wa ku dya: “Tshinela, u dya vuswa, u peta buwu ra wena ka vhiniga.” Kutani a tshama ekusuhi ni lava tshovelaka; Bowazi a n'wi nyika tindzhoho leti oxiweke, a dya, a xurha, a veka leti saleke.

15Kutani a suka a ya nkun'hula. Bowazi a lerisa vanhu va yena, a ku: “A nga rholela exikarhi ka tinyandza, kambe mi nga tshuki mi n'wi khomisa tingana,

16kambe mi ta n'wi tshikela swinyandzana swi nga ri swingani ha vomu; mi n'wi tshikela swona a ta swi hlengeleta, mi nga n'wi tshinyi.”

17A nkun'hula ensin'wini ku fika madyambu, kutani a hula leswi a swi hlengeleteke, swi lava ku endla efa ya barley.

18Kutani a yi teka, a ya na yona ekaya, kutani n'wingi wa yena a vona leswi a swi rholeleke. A teka ni leswi a swi vekeke loko a xurhile, a n'wi nyika.

19Kavaloko n'wingi wa yena a ku eka yena: “U nkun'hule kwihi, namuntlha, u tirhe kwihi xana? A ku katekisiwe munhu la ku tiveke!” Kutani a byela n'wingi wa yena vito ra munhu loyi a nga ya tirha eka yena, a ku eka yena: “Vito ra munhu loyi ndzi nga tirha eka yena namuntlha i Bowazi.”

20Kutani Nahumi a ku eka n'wingi wa yena: “A a katekisiwe hi Yehovha! Hikuva u endle hi tintswalo eka lava hanyaka ni ka lava feke.” Nahumi a engeta a ku eka yena: “Munhu loyi i xaka ra hina, i un'wana wa vadyi va ndzhaka ya hina.”

21Kutani Rhuti wa Mowabu a engeta, a ku: “Kambe u ndzi byerile, a ku: ‘U nga tshuki u tshika malandza yanga, va ko va heta ku tshovela ka mina hinkwako.’ ”

22Kutani Nahumi a byela Rhuti, n'wingi wa yena a ku: “N'wananga! Swa saseka loko u huma ni malandza ya yena ya vavasati, u nga kumiwi ensin'wini yin'wana.”

23Kutani a namarhela malandza ya Bowazi, eku tshoveleni ka yena, ku kondza ku tshovela ka barley ni ka koro ku hela; kutani a tshama ni n'wingi wa yena.

← Chapter 1 Jump to: Chapter 3 →