Song of Solomon 3

Tatar Crimean 2016 Bible - Къырымтатарджа [Crimean Tatar] (Мукъаддес Китап)

← Chapter 2 Jump to: Chapter 4 →

1Гедже бою тёшегимде севгилимни къыдырдым, къыдырдым, амма тапалмадым.

2«Турайым да, шеэр бою доланып, сокъакъларда ве мейданларда севгилимни къыдырайым», — деп тюшюндим. Мен оны къыдырдым, амма тапалмадым.

3Шеэрни бойлап юрген къаравуллар манъа расткельди. «Севгилимни корьмединъизми?» — деп сорадым.

4Олардан кетер-кетмез, севгилимни таптым. Туттым оны, йибермедим. Оны анамнынъ эвине, ич одасына кирсеттим.

5Эй, Ерусалим къызлары! Гъазеллер ве кийик сыгъынларнен емин этинъиз: севгимизни раатсызламанъыз, вакъты кельмегендже, онъа кедер этменъиз.

6— Бу ким экен чёльден чыкъаята? Тютюн диреклери киби, котериле, мюр ве темиз къокъулы мискънинъ, алыш-веришчилернинъ тюрлю къокъулы шейлерининъ къокъусыны даркъата.

7Мына, Сулейманнынъ тахты! Онынъ чевресинде — алтмыш аскер, исраилли джесюр батырлар.

8Эр бир аскернинъ къолунда — къылыч, олар дженк этмеге усталар. Гедже телюкелер олса, оларнынъ къылычлары азыр.

9Сулейман падиша тахтыны Ливан тереклеринден япты.

10Диреклери — кумюштен, темели — алтындан япылды. Отургъан ери — мавылы къырмызы, Ерусалим къызлары чадырнынъ ичини севгинен яраштырды.

11Келинъиз, эй, Сион къызлары, Сулейман падишагъа бакъынъыз! Онынъ башында — гузель тадж! Юреги ичюн къуванчлы кунюнде, Сулейман эвленген кунюнде онынъ анасы онъа бу таджны кийдирди!

← Chapter 2 Jump to: Chapter 4 →