Joshua 16

Turkana (ABIBILIA NGAKIRO NAAJOKAK)

← Chapter 15 Jump to: Chapter 17 →

1Ekukuor a akwap ana atiakakinio ngalesea a Yosep alowae alo alokuju, esiakini alo Yorudan ana eyei diyete Yeriko, ana eyei kide ngileleae a Yeriko, toten nariet. Esiakini alo Yeriko kiriwor toten nakwap a ngimukur tanang Besel.

2Kisiak alo Besel, tanang Lus, kipor tanang Ataros Adar ni alomito Ngiarak.

3Kinapar too tanang nakwap a Ngiyapilet, alowae alo alokwap Bes-oron. Kisiak kaneni tanang Geser, tasalu ananam a Mediterenian.

4Apot ngitela a Yosep lu araakasi ngitela a Epiraim ka Too Manase nakinae akwap toliwor akech.

5Naga ngesi arai akwap a ngitunga a Epiraim. Esiakini ekukuor a akwap kech alo Ataros Adar kiriwor kide tanang kuju Bes-oron,

6kinapar tanang nanam a Mediterenian. Ebakit Mikimesas alokwap. Alo kide keng, torii ekukuor toten Taanas Chilo, kiporo alo kide tanang Yanoa.

7Sodi kisiak alo Yanoa tanang Ataros ka Naara, tanang tani Yeriko, sodi tasalu alo Yorudan.

8Kiriwor ekukuor too alo Tapua tanang nayanae a Kana, tasalu ananam a Mediterenian. Akwap ngina ngesi atiakakinio ngitunga a ekitela a Epiraim toliwor akech,

9imorikinio aapei ka ngadakarin na ayakasi nakwap a Manase, taraakas ngaka ngitunga a Epiraim.

10Apot kesi nyiitwarakis Ngikanaan lu alomito Geser. Eringa Ngikanaan elomito wapei ka ngitunga a Epiraim tani tokona. Apon kesi kidesikinae akisub etich loger a ngikedalak.

← Chapter 15 Jump to: Chapter 17 →