2 Chronicles 21

Umbundu Bible (Embimbiliya - Bíblia Sagrada em Umbundu)

← Chapter 20 Jump to: Chapter 22 →

1Yehosafata wa pekela lolosekulu viaye, yu vo kenda kumue lolosekulu viaye, vimbo lia Daviti, kuenje omõlaye Yehorama wa piñala komangu yaye.

2Eye wa kala lavamanjaye, omãla va Yehosafata, vava: Asariya la Yehiyele la Sakariya la Asariya la Mingeli kuenda Sefatiya. Ava vosi omãla va Yehosafata, Soma ya Isareli.

3Isiavo wa va iha olombanjaile vinene viopalata lulu lovikuata via tĩla kuenda ovaimbo a pama ko Yuda. Usoma puãi wa weca ku Yehorama, momo eye uveli.

4Eci a tambula omoko yusoma wa isiaye leci a lipamisa, oco wa ipa vosi vamanjaye losipata kumosi lolombuale vimue via Isareli.

5Yehorama wa kala lanyamo akuĩ atatu la avali eci a fetika oku viala, kuenje wa viala anyamo ecelala ko Yerusalai.

6Wa endaila vonjila yolosoma via Isareli, ndeci ca lingile epata lia Ahava, momo eye wa kuelele omõla a Ahava, kuenje wa linga eci civi kovaso a Yehova.

7Haimo lumue Yehova ka yonguile oku nyõla epata lia Daviti, mekonda liocisila a lisilile la Daviti lohuminyo yaye yoku wiha ocinyei, eye lomãla vaye otembo ka yi pui.

8Koloneke viaye, va Edome va ñualelapo uviali wa Yuda, yu va vialeka osoma yavo muẽle.

9Oco Yehorama wa va tundila kumue lavakesongo vaye lakalu aye osi. Wa katuka uteke, yu wa ipa va Edome vana vo ñualele ocingonja, eye lavakesongo liakalu.

10Oco va Edome va ñualelapo uviali wa Yuda, toke etaili lilo. Koloneke viaco, Livina lia ñualelapovo uviali waye, momo eye wa yandulukile Yehova, Suku yolosekulu viaye.

11Kuenda vali Yehorama wa tunga ovotala kolonumbuko violomunda via Yuda, kuenje wa kokela olonungi via Yerusalãi oku linga ukahonga, yu wa pambuisa Yuda.

12Kua wiyilila ukanda wa tunda kuprofeto Eliya, wuti, Ca popia Yehova Suku ya so Daviti, ceci, hati, Omo kua endelele volonjila via so Yehosafata, pamue volonjila via Asa, Soma ya Yuda,

13puãi wa endela vonjila yolosoma via Isareli kuenda wa kokela Yuda lolonungi via Yerusalãi oku linga ukahonga, ndeci ca lingile epata lia Ahava; kuenda vali wa ponda vamanjove, omãla va so, vana va ku velelepo;

14oco, tala, omanu vove lomãla vove lakãi vove, Yehova o va veta lefengi linene, kumue la cosi cove.

15Love le o kuatiwa luvei unene, uvei wovovãla, wamamako eteke keteke toke uvei waco u ku tundisila ovãla posamua.

16Yehova yu wa wenguila Yehorama onyeño ya va Filisiti la va Arabia, vana va lisungue la va Etiopia.

17Ovo va katukila Yuda, yu va iñilamo, kuenje va punda ovipako viosi va sanga vonjo ya Soma, loku ambata omãla vaye lakãi vaye. Lomue pomala vaye wo supilapo, te lika Yehoahasi, kuasula kuomãla vaye.

18Kovaso yovina evi viosi, Yehova wo veta vovãla aye luvei ka u kuete ekayo.

19Kovaso yoloneke, kesulilo lianyamo avali uvei waco wo tundisila ovãla posamua, yu wa fa lolongembia via piãla. Omanu vaye ka vo timihilile olosimbolua ndeci va lingilile olosekulu viaye.

20Eci a fetika oku viala, wa kala lanyamo akui atatu la avali, kuenje wa viala ko Yerusalãi anyamo ecelala. Wa fa kuenje okufa kuaye lomue kua vala. Vo kenda vimbo lia Daviti, puãi havayambo olosomako.

← Chapter 20 Jump to: Chapter 22 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →