2 Peter 3

Umbundu Bible (Embimbiliya - Bíblia Sagrada em Umbundu)

← Chapter 2 Jump to:

1A vakuacisola, ulo owo ukanda wavali ndu soneheli. Vovikanda viaco, kavali kavio, nda vetiya ovitima viene viocili loku vu wivaluisa,

2okuti wivaluki olondaka via popia ale ovaprofeto va kola, locihandeleko ca Ñala, haeye Upopeli, cina wa ci popia lovapostolo vene.

3Tete limbuki okuti, koloneke via sulako, kuiya vakuetombo loku tomba, va enda loloñeyi viavo vietimba,

4vati, Ohuminyo yetukuluko lia Ñala yi kasi pi? Momo, tunde eteke akulu vetu va pekela, ovina viosi vi kasi ño ndeci via kala tunde kefetikilo lioluali.

5Ocipango cavo muẽle va ivalako okuti, londaka ya Suku, kosiahũlu ilu lia kala ale, kuenje ongongo ya ñualiwa lovava, haiyo ya tunda vokati kovava.

6Loluali lua kaile koloneke viaco lua nyõliwa lovava kuenje lua taka.

7Puãi londaka yaco haiyo, ilu li kasi ndeti longongo ya angiliyiwila ondalu, yi tãilili eteke liekanga hailio liokunyõleha kuomanu va tomba Suku.

8Puãi, a vakuacisola, ko ka ivaliko eci cokuti, eteke limuamue ku Suku lia soka ndohulukãi yalima, lohulukãi yalima ya soka ndeteke limuamue.

9Ñala ka livala lohuminyo yaye ndeci vamue va tukula vati, Oku livala, puãi o pandikisa lene, momo ka yongola okuti umue o nyõleha, puãi o yongola okuti vosi va likekembela akandu avo.

10Eteke lia Ñala puãi liya ndocimunu. Leci liya, ovailu a takata lokukẽlõha kua lua. Ovina viosi vi yenguluka londalu, longongo lovina viosi vi kasimo vi pia.

11Oco, omo ovina viaco viosi vi yenguluka ndomo, siti co sesameli okuti, kovimuenyo viene, vu kola kuenje vu sumbila Suku.

12Vu kala ndomo osimbu vu lavoka loku yayuisa etukuluko lieteke lia Suku. Mekonda lialio, ovailu a pia kuenje a yenguluka, lovina viosi vi yenguluiwa lowuya wa tokota.

13Puãi, mekonda liohuminyo yaye, tu lavoka ilu liokaliye loluali luokaliye omu mu kala esunga.

14Oco a vakuacisola, omo vu lavoka ovina evi, kolisiko okuti eci vu sangiwa laye, vu kala lombembua, amome mbu, ndaño atime.

15Sokololi okuti epandi lia Ñala yetu olio eyovo. Haicovo manjetu wa soliwa, Paulu, wo soneheli lolondunge via wihiwa.

16Vovikanda viaye viosi wa vangula ovina evi. Vovikanda viaye muli ovina vimue via tĩla oku vi yeva, kuenje ovina viaco vakuanumbi kuenda vakuavitima vivali va vi pengisila okunyõleha kuavo, ndeci va linga lovisonehua vikuavo.

17Oco ene, a vakuacisola, omo wa ci kũlĩhi ale osimbu ka ceyile handi, lunguki sanga wambatiwi lokulueya kua vakuakandu, kuenje vu lipumbisa epandi liene.

18Puãi kulili vocali kuenda vukũlĩhiso woku kũlĩha Ñala Yesu Kristu haeye Onjovoli yetu. Kokuaye ku kale ulamba etaili kuenda toke keteke ka li pui. Amene.

← Chapter 2 Jump to: