2 Samuel 10

Umbundu Bible (Embimbiliya - Bíblia Sagrada em Umbundu)

← Chapter 9 Jump to: Chapter 11 →

1Kovaso yaco osoma ya va Amoni ya fa kuenje omõlaye Hanuni wa piñala komangu yaye.

2Daviti wa popia hati, Ndinga ohenda Hanuni, omõla a Nahase, ndomo soyaye a ndingaile ame ohenda. Oco Daviti wa tuma akuenje vaye oku ko lembeleka omo soyaye a fa. Akuenje va Daviti veya kofeka ya va Amoni.

3Puãi akulu va va Amoni va popia la cime cavo Hanuni vati, Ove nga wa soka okuti omo Daviti a tuma kokuove ava va ku lembeleka oco wa ci lingila esumbilo lia so? Daviti nga ka tumĩle akuenje vaye kokuove okuti va kũlihisa imbo lilo loku li lavulula loku li papulula?

4Oco Hanuni wa kuata akuenje va Daviti, wa va pemuisa olonjele onele yimosi, kuenda wa tetela uwalo wavo vombuelo yatako, oco wa va katula.

5Eci ca yevala ku Daviti oco wa tuma oku landula alume vaco omo va kala losõi yalua. Soma yu wa tuma hati, Sikili ko Yeriko toke olonjele viene via lepa oco wiyi noke.

6Eci va Amoni va limbuka okuti va suvukiwa la Daviti oco va Amoni va tuma oku pinga loku fetela va Suria va Beterehovi kuenda va Suria va Sova. Oco kokuavo kua tunda akũi avali kolohũlũkãi viasualali vakuakuendela posi. Soma ya Maaka layevo wa tuma ohũlũkãi yasualali. Va Tovi va tuma ekũi liolohũlũkãi kolohũlũkãi vivali viasualali.

7Eci Daviti a ci yeva oco wa tuma Yoava kumue lolohoka viasualali vakuasimbu haivo va lunguka.

8Va Amoni va tunda, va lialeka kepandavelo. Va Suria va Sova lava va Rehovi kuenda va Tovi la va Maaka va likalela kusenge.

9Eci Yoava a limbuka ocilunga ndomo ca kala okuti konyima yaye ovita, kovaso yaye ovita, oco wa nola vamue pokati kasualali va velapo va va Isareli kuenje wa va aleka ha va yaki la va Suria.

10Asualali vaye va supapo wa va eca peka lia manjaye Avisiai. Ovo wa va aleka ha va yaki la va Amoni,

11hati, Nda ame va Suria si va tẽla oco ove wiya o ñuatisa ame. Puãi nda ove va Amoni ku va tẽla oco njiya hu kuatisa ove.

12Kolisako. Tu lingi ndalume oku kuatisa omanu vetu loku kuatisa ovaimbo a Suku yetu. Yehova a linge eci co sunguluka.

13Oco Yoava lalume vaye veya ocipepi la va Suria ha va yaki lavo. Kuenje vo tila.

14Eci va Amoni va mõla okuti va Suria va tila lavovo va tila kovaso a Avisiai, kuenje va iñila vimbo. Oco Yoava wa tiuka koku yaka la va Amoni, weya ko Yerusalãi.

15Puãi eci va Suria va limbuka okuti va yuliwa la va Isareli oco va liongolola.

16Hadadesere wa tuma oku upa va Suria va kala kesinya liolui Ferati. Veya ko Helama. Usongui wavo, Siovaka, kesongo liovita via Hadadesere.

17Eci ca yevala ku Daviti oco eye wongolola va Isareli vosi. Wa yoka Yordão, weya ko Helama. Va Suria va lialekela Daviti, va yaka laye.

← Chapter 9 Jump to: Chapter 11 →