2 Timothy 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ame ndi Paulu, haime ndupostolo wa Kristu Yesu omo oco Suku a panga ndohuminyo yomuenyo u kasi vu Kristu Yesu,

2Ndi sonehela omõlange wa soliwa, Timoteo. Ocali lohenda lombembua yi tunda ku Suku Isia lo ku Kristu Yesu Ñala yetu yi kale love.

3Eci hu ivaloka volohutililo viange, mandola Suku, u ñasi loku vumba lutima wa pua eko, ndeci ca linga olosekulu viange.

4Eci njivaluka asuelela ove, oco, lutanya luteke, ndi livela oku ku mola okuti oco ndi yuke esanju.

5Njivaluka ekolelo halioku luvikiyako o kasi lalio. Tete lia kala vu nyokulu Loisi, kuenda vu nyoho Eunike, kuenje cilo nda kolela okuti ove o kasivo lalio.

6Oco hu ivaluisa okuti o saminya ocali ca Suku ci kasi vokati kove, haico ca ku iyilila loku ku kapa ovaka ange.

7Momo Suku ka tu ihile utima wusumba, te wunene, kuenda wocisola loku lipokuisa.

8Oco, ku ka kuate osõi eci wimbila Ñala yetu uvangi. Ndaño ame, ndimandekua yaye, ku ka ñuatele osõi. Puãi tava ño, lunene wa Suku, oku tala ohali yi ku iyilila oku kunda ondaka yiwa.

9Suku wa tu popela, kuenje wa tu laleka lokulaleka ku kola, handovilinga vietuko, te locipango caye, kuenda locali caye, cina a tu iha vu Kristu Yesu kuna ka ku ci.

10Cilo puãi, Suku wa tukulula ocali caco eci a tukulula Upopeli wetu Kristu Yesu, u wa nyõla okufa, kuenje, londaka yiwa, wa nena kutanya omuenyo ko pui.

11Ame nda noliwila oku kunda ondaka yaco yiwa, loku yi longisa, haiyo nda kapiwila upostolo,

12kuenje oco ñasilili lohali eyi. Haimo si kasi losõi, momo u nda kolela ndu wi, kuenje ñolela okuti o tẽla oku lava ocikundi cange toke keteke liaco.

13Pokola kolondaka viocili wa yeva kokuange. Vi pokola vekolelo locisola vi kasi vu Kristu Yesu.

14Lava ocili cina ca kundikiwa kokuove le Espiritu Sandu o kasi vokati ketu.

15Ove o ci okuti va Asia vosi va njanduluka. Pokati kavo pali Fungelo la Hermogene.

16Ñala a linge ohenda onjo ya Onesiforo momo wa ñuatisa olonjanja via lua, kuenje ka kuatelele elienge liange osõi.

17Puãi, eci a pitila vo Roma, wa sanda ame lombili kuenje wa sanga.

18Ñala a ece kokuaye oku sanga ohenda ya Suku eci Eteke liya. Ndeci a kuatisa ve Efeso ove o ci.

Jump to: Chapter 2 →