Acts 6

Umbundu Bible (Embimbiliya - Bíblia Sagrada em Umbundu)

← Chapter 5 Jump to: Chapter 7 →

1Koloneke viaco, eci oloñame via kala loku lua, oco va Helasi va fetika oku lisiõsuĩla va Heveru, vati, Ovimbumba vietu vi limalaiwa ño eci va eca eca okulia eteke keteke.

2Oco ekui liaco la vavali va kovonga owiñi woloñame, kuenje va popia lavo vati, Ka ca sungulukile okuti tu liweka oku kunda ondaka ya Suku ha tu vumbi olomesa.

3Oco a vamanji, pokati kene nolipo alume epanduvali va kolelua, ve yuka Espiritu lolondunge, ha tu va tukuila upange waco.

4Etu puãi, tu pandakaisa koku likutilila kuenda koku kunda ondaka.

5Ondaka eyi ya sunguluka kowiñi wosi, kuenje va nola Stefano, ulume we yuka ekolelo le Espiritu Sandu, la Filipu, la Prokoro, la Nikonoro, la Timone, la Parmena, kuenda Nikolau omongoloke yo ka Antiokea.

6Va va talamisa kovaso ovapostolo. Noke va likutilila kuenje va va kapa ovaka.

7Ondaka ya Suku ya sandoka, loloñame via luila ca lua vo Yerusalãi. Kuenje owiñi wa lua wovitunda wa tava ketavo liaco.

8Stefano, eye omunu we yuka ocali ca Suku kuenda unene, wa linga ovikomo kuenda ovilimbu vinene pokati komanu.

9Oco, vamue vakuasunangonga ya tukuiwa Yavavayovoka, okuti vamue va Kurene la vamue va Alesandria, kuendavo vamue va tunda ko Kilikiya lo ka Asia, va katuka kuenje va likumbulula la Stefano.

10Puai ka va tẽlele oku tamalala lolondunge viaye le Espiritu a popia lalio.

11Oco va kapapo alume va linga vati, Etu tuo yeva eci a popia etonãi ku Mose kuenda ku Suku.

12Oco va tutuminya omanu lakulu kuenda vakuavisonehua, kuenje oku wundumũhila, vo kuata, vo tuala vonjango.

13Va katula olombangi viuhembi viti, Omunu u ka liweka oku popia olondaka vi tomba ocitumalo cilo ci kola kuenda ovihandeleko.

14Momo tuo yeva, wa linga hati, Yesu u Nasara o nyõla ocitumalo cilo, kuenje o pongolola ovihõlo Mose a tu sila.

15Oco, vosi va tumala vonjango eci vo vanja va mola ocipala caye huti ño ocipala cungelo.

← Chapter 5 Jump to: Chapter 7 →