Colossians 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ame ndi Paulu, haime ndupostolo wa Kristu Yesu, omo oco Suku a panga, kuenda manjetu Timoteo,

2tu sonehela olosandu, haivo vamanji va kolelua vu Kristu va kasi ko Kolosai. Ocali lombembua yi tunda ku Suku Isietu yi kale lene.

3Olonjanja viosi eci tu vu likutilila tu imba olopandu ku Suku Isia ya Ñala yetu Yesu Kristu.

4Momo tua yeva ekolelo liene vu Kristu Yesu, locisola cene coku sola olosandu via Kristu,

5mekonda lielavoko lio solekiwilili vovailu. Elavoko eli wa li yevi tete eci wa yevi ondaka yocili haiyo ondaka yiwa.

6Ondaka yaco ya pitila ko kuene. Oku popia ocili yi kasi loku ima epako loku amamako oku kula voluali luosi. Yi kasi loku imavo epako loku amamakovo pokati kene, tunde keteke wa yevi ocili condaka yocali ca Suku kuenje yo lomboloki.

7Wa yi yevi ku manjetu wa soliwa kupange, Epafra, haeye ondingupange yocili ya Kristu. Wa litumbika ocili oku vu vumba

8kuenje wa tu sapuila ocisola vu tu kuetele vovitima viene.

9Oco, tunde keteke tua ci yeva, ka tua la liweka oku vu likutilila. Tu pinga ku Suku okuti o vu yukisa ukũlĩhiso wocipango caye poku wihi uloño lolondunge viocili, vina vi Espiritu,

10ho kali lovimuenyo vi soka leci ca posokela Ñala, haivio viu sanjuisa. Tu vu livela loku likutilila okuti, kovopange osi awa, wimi epako, kuenje wamamiko vukũlĩhiso wa Suku.

11Tu livela okuti okupama kuene kuamamako lunene wosi ndeci ca soka lunene wulamba waye, okuti vu likolisila ño loku enda lepandi lonjolela.

12Tu vu likutilila okuti wimbi olopandu ku Suku Tate, una wa tu angiliyila oku tambula onepa yetu yocipiñalo covocinyi ca tepiwila olosandu.

13Wa tu popela kuviali wowelema. Wa tu sondoluila kuviali w'Omõlaye wa soliwa.

14V'Omõlaye omu tu kuetele eyovo, olio ongecelo yakandu.

15Eye esetahãlo lia Suku u ka muiwa lovaso, haeye uveli pokati koviluvo viosi.

16Momo ovina viosi via sovuiwila vu Kristu. Ovina viosi viokilu, levi vioposi, evi vi muiwa, levi ka vi muiwa, ci kale ovialo violosoma viosi, pamue ovoviali, ci kale ovosoma, ci kale olombiali,— viosi eye wa vi lulikisa, haeye vio lulikiwila.

17Eye tete kovina viosi, kuenje ovina viosi via tokekisua vokuaye.

18Eye utue wetimba okuti wekongelo liaye. Eye efetikilo haeye uveli wava va tunda kokufa, okuti, kovina viosi. Kristu eye o linga watete.

19Momo Suku wa panga okuti eyuko liaye liosi li kala vu Kristu.

20Suku wa pangavo okuti Kristu inalisila kokuaye ovina viosi vioposi levi viokilu. Kristu wa nena ombembua losonde yaye yina ya pesekela kekulusu.

21Ene ale wa litepeli laye. Vovitima viene kuenda kovilinga viene via vĩha wa kaili ovanyali vaye.

22Cilo puãi, lokufa kuetimba liaye, wo winalisi okuti o vu tuala tupu kovaso a Suku vu kola, haene wa pui eko latondelo.

23Okuinalisa kuaco kuiya nda vu pandikisa vekolelo, okuti vu sevetiwa cocili loku pama, kuenje ka vu tundi kelavoko li kasi vondaka yiwa, yina wa yevi, haiyo ya kundiwila omanu vosi voluali. Lamevo ndi Paulu ñasi loku yi kunda kunda.

24Cilo nda sanjukila ohali ñasi loku vu talela. Vetimba liange ñasi loku tẽlisa eci ca kamba kohali Kristu a talela etimba liaye okuti ekongelo.

25Momo nda tumbikiwa la Suku oku vumba ekongelo lia Kristu. Ocikele caco ci kola ca nyihiwila okuti ndu vumbi ene, loku vu longisa ocili ondaka ya Suku.

26Toke cilo, ondaka yaco ya kaile elumbu lia sitikiwila oloneke viosi kovitumbulukila viosi. Cilo puãi ya situluiwa kolosandu viaye.

27Ovo Suku wa va nola okuti o va situluila unene wukuasi wulamba welumbu liaco pokati ka vakualofeka. Elumbu liaco lieli, Kristu volonulo viene, eye elavoko liulamba wiya.

28Eye tu kunda. Lolondunge vietu viosi tu lungula omanu vosi, omunu omunu, loku longisa omanu vosi, omunu omunu, okuti noke tu lekisa omanu vosi, omunu omunu, tu va lekisa tupu va pua atondelo vu Kristu.

29Oco nda litumbikila, haico ndi ci likolisila lolohõlo viosi eye a nyiha lunene waye.

Jump to: Chapter 2 →