Ezra 7

Umbundu Bible (Embimbiliya - Bíblia Sagrada em Umbundu)

← Chapter 6 Jump to: Chapter 8 →

1Noke, kovava a Aretasesete, osoma yoko Persia, Esera, omõla a Seraya, omõla a Asariya, omõla a Hilikiya,

2omõla a Sialume, omõla a Sadoke, omõla a Ahituva,

3omõla a Amariya, omõla a Asariya, omõla a Merayote,

4omõla a Serahiya, omõla a Usi, omõla a Buki,

5omõla a Avisiwa, omõla a Finehase, omõla a Eleasara, omõla a Arone ocitunda cinene,—

6undeti Esera wa tunda ko Bavulono. Eye ukuavisonehua, haeye wa piãla oku kũlĩha ovihandeleko via Mose, vina via eciwa la Yehova, Suku ya va Isareli. Omo Yehova, Suku yaye, a kala laye oco Soma wa tava kovina viosi o pinga.

7Kulima wepanduvali wokovava a Soma Aretasesete, ko Yerusalãi kua endavo vamue va Isareli lovitunda vimue, kuenda vamue va Lewi, lolonjimbi, lolondavululi violombundi la vamue vakuakuvumba vonembele.

8Eye Esera wa pitila ko Yerusalãi kosãi yatãlo yulima wepanduvali wokovava a Soma.

9Wa katuka ko Bavulono keteke liatete liosãi yatete, kuenje, lohenda ya Suku, wa pitila ko Yerusalãi keteke liatete liosãi yatãlo.

10Esera wa litumbika ocili oku lilongisa ondaka ya Suku loku yi pokola loku longisa va Isareli ovihandeleko viayo lovisila viayo.

11Soma Aretasesete wa soneha ukanda kocitunda Esera haeye ukuavisonehua, haeye wa piãla oku kũlĩha ovihandeleko via Yehova lovisila viaye vioku va Isareli. Ukanda waco wowu:

12Ame Aretasesete, Soma yolosoma, sonehela Esera ocitunda haeye ulombololi wovihandeleko via Suku yovailu. Epasu liombembua.

13Ame muẽle njimba oluiya okuti nda vofeka yange muli vamue va Isareli, pamue ovitunda viavo, pamue vamue va Lewi, va yongola oku enda love ko Yerusalãi, ci tava, va ende.

14Momo ove wa tumiwa la Soma lakulu vaye epanduvali oku kũlĩhisa vo Yuda kuenda vo Yerusalãi ndomo va kasi kovina viovihandeleko via Suku vina o kasi lavio.

15Wa tumiwavo oku tuala opalata lulu vina via eca Soma lakulu vaye ku Suku ya va Isareli, una onjo yaye yi kasi vo Yerusalãi.

16O tualavo opalata yosi lulu wosi o sanga vofeka yosi ya Bavulono, kumosi lolombanjaile omanu lovitunda va eca locisola oku kuatisa onjo ya Suku yavo yi kasi vo Yerusalãi.

17Lolombongo viaco o ka landa lavio olonale violongombe lolomanga violomeme lomãla volomeme kuenda osema lovinyua vi lumbiwila kumosi lavio. O vi lumba kutala wonjo ya Suku yove yi kasi vo Yerusalãi.

18Evi vi supapo viopalata lulu, ove la vakuẽle vu linga lavio ndeci wa simi okuti ca soka locipango ca Suku yove.

19Lovikuata va kuiha vioku kuatisa efendelo lia Suku yove vonjo yaye, o vi tumbika ku Suku ya Yerusalãi.

20Kuenda vali cosi cikuavo ci sukiliwa oku kuatisa onjo ya Suku yene ci tava oku ci upa kombango ya Soma.

21Ame, Soma Aretasesete, ame njimbila vakalei vange vosi vofeka yokesinya oluiya lulo siti, Cosi ci sukila ocitunda Esera, haeye ukuavisonehua via Suku yovailu, ci eciwe kokuaye lonjanga.

22Toke ci pitila kocita colotalendo viopalata, lolohũlũkãi akuĩ akuãla kolokilu viotiliku, lolohũlũkãi vitatu kovita epandu kolo-litro viovinyu lolohũlũkãi vitatu kovita epandu kolo-litro viulela, lomongua wosi vu sukila, ka kuli oku pesalisa.

23Cosi ca popiwa la Suku yovailu ci lingiwile onjo ya Suku yovailu. Onyeño ya Suku yiyilila nye uviali wa Soma lomãla vaye?

24Ndu sapuilivo okuti ovitunda la va Lewi lolonjimbi lolondavululi la vosi vakuakuvumba vonjo yaco ya Suku ka ci tava oku va fetisa alisimu pamue ulambu pamue owombo.

25Love, a Esera, lolondunge Suku yove a kuiha, nola akulu lolonganji vi tetuluila omanu vosi vakuafeka yokesinya. Puãi nola ava va kũlĩha ovihandeleko via Suku yove, ava ka va vi kũlĩhile ove muẽle o va longisa.

26Kuenje wosi ka tava oku pokola kovihandeleko via Suku yove lovihandeleko via Soma va tete laye onimbu, pamue oku u wipaya, pamue oku u tundisa vofeka, pamue oku u nyeha ovikuata viaye, pamue oku u kapa vokayike.

27Yehova Suku yolosekulu vietu a sivayiwe. A sivayiwe, omo wa simisa Soma ocisimilo ca posoka coku posuisa onjo ya yehova yi kasi vo Yerusalãi.

28Haeye wa ñuatela ohenda kovaso a Soma lakulu vaye kuenda kovaso a vakesongo vaye. Nda kolisua omo nda limbuka okuti Yehova Suku yange wa kala lame, kuenje ndongolola akulu va va Isareli oku enda lame.

← Chapter 6 Jump to: Chapter 8 →