James 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to:

1Kaliye alohuasi, lili loku liyuila ohali yi kasi loku iya kokuene.

2Ukuasi wene wa vola, lovowalo ene a liwa lapuka.

3Ulu wene lopalata yene via liwa longuyu. Onguyu yavio yu wimbili uvangi woku vu pisa kuenje yi lia ositu yene ndondalu. Wa solekeli ukuasi wene oloneke viesulilo.

4Yeveleli. Ofeto ya vakuopange va lombola ovapia ene, haiyo wa yi liañi, yi kasi loku vilikiya. Kuenje evilikiyo lia vakuakulombola lia pitila kovatui a Ñala Ukualohoka.

5Kilu lieve wa liali elau, wa tiameli kesanju. Wa netisi ovitima viene veteke lioku ipãla.

6Wa pisi vakuesunga kuenje wa va ipãli, okuti ka va tẽla oku tamalala lene.

7Oco, a vamanjange, pandikisi toke Ñala iya. Ivaluki okuti ongunja yi talamela ovaima a laika oku u tekula, toke a tunda posi, yi a kuetele epandi toke a lokiwa lohalula lombela yakupupu.

8Lenevo pandikisivo. Pami vovitima, momo etukuluko lia Ñala li kasi ocipepi.

9A vamanjange, ko ka liyeyeli pokati, oco ka vu pisiwa. Limbuki okuti onganji yi tãi ale puvelo.

10A vamanjange, upi ongangu yoku tala ohali leyi yepandi kovaprofeto va popia vonduko ya Ñala.

11Ava va pandikisa tu va tukula tuti, Va sumũlũha. Wa yevi epandi lia Yovi kuenje wa moli efulilo lialio lio wiha Ñala. Ñala ukuacikembe haeye ukuahenda.

12A vamanjange, cinene ceci, ko ka lisingi ndaño lilu, ndaño losi, ndaño lesingo liñi. Ondaka yene yi linge nda oco, oco, nda hacoko, hacoko, okuti ka vu fi vepiso.

13Pokati kene pali umue o kasi lohali? A likutilile. Pali umue wa sanjuka? A imbe esivayo.

14Pokati kene pali umue a vela? A kovonge akulu vekongelo kuenje vo likutilile loku u sieketa lulela vonduko ya Ñala.

15Kuenje ohutililo yekolelo yi popela u o vela, kuenje Ñala u pindula, kuenda vali, nda wa linga akandu ecelua.

16Oco, litaveli pokati akandu ene loku likutililila pokati okuti vu veluisua. Ohutililo yukuesunga o likutilila lutima wosi yi muisa unene wa Suku.

17Eliya wa kala omunu ukuavituwa ndetu, eye wa likutilila loku felevela okuti ombela ka yi loki, kuenje ombela ka ya lokele anyamo atatu kolosãi epandu.

18Noke wa likutilila vali, kuenje ilu lia eca ombela, losi ya ima apako ayo.

19A vamanji, nda umue pokati kene o pambuka kocili kuenje umue u tiula,

20a limbuke okuti u o tindula ukuakandu kokulueya kuaye, o popela omuenyo umue kokufa, kuenje imula akandu akahandangala.

← Chapter 4 Jump to: